Jesús yerïl rtzeqelbʼëy chuchiʼ mar

Taq Jesús xkʼüt yän riʼ chkiwäch ri apóstoles, Pedro xbʼerchapaʼ kär pa mar rchë Galilea. Tomás, Santiago, Juan chqä nkʼaj chik xebʼä äl rkʼë. Jun aqʼaʼ xkikanuj kär pero majun xkichäp ta.

Taq xsaqirsan pä, jun achï ri paʼäl chuchiʼ yaʼ xkʼutuj reʼ chkë: «¿Kʼo chik kär ichapon?». Ryeʼ xkiʼij: «Majun ta». Ri achï xuʼij reʼ chkë: «Tikʼaqaʼ iyaʼl jkʼan chik che rä ri barco». Taq xkiʼän riʼ, ri yaʼl kan xnuj chë kär, rma riʼ ma yekowin ta wä chik nkijtobʼaʼ chpan ri barco. Juan xtzʼët chë yë wä Jesús najin ntzjon kikʼë, rma riʼ xuʼij: «¡Yë ri Ajaw!». Rma riʼ, Pedro xkʼäq äl riʼ pa yaʼ y xbʼä kʼa chuchiʼ yaʼ. Ri nkʼaj chik xkitzeqelbʼej äl chpan ri barco.

Taq xeʼapon chuchiʼ yaʼ, xkitzʼët chë kʼo wä kär pa rwiʼ qʼaqʼ chqä pan. Jesús xuʼij chë tkiyaʼ jojun kär che rä ri kʼa xkichäp rchë nuyaʼ chqä pa rwiʼ qʼaqʼ. Chrij riʼ xuʼij chkë chë kewaʼ.

Taq xkikʼïs waʼin, Jesús xkʼutuj reʼ che rä Pedro: «¿Yinawajoʼ más chkiwäch re kär reʼ?». Pedro xuʼij: «Rït ataman chë yatinwajoʼ Ajaw». Jesús xuʼij: «Si ke riʼ, keʼatzuquʼ nkarneʼl». Jmul chik, Jesús xkʼutuj reʼ che rä: «Pedro, ¿yinawajoʼ?». Pedro xuʼij: «Ajaw, rït ataman chë yatinwajoʼ». Jesús xuʼij: «Keʼayuqʼuj taq nkarneʼl». Pa rox mul, Jesús xkʼutuj chik jmul ya riʼ che rä. Pedro kowan xbʼison, y xuʼij reʼ che rä: «Rït ataman jontir Ajaw. Rït ataman chë yatinwajoʼ». Jesús xuʼij reʼ che rä: «Keʼatzuquʼ taq nkarneʼl». Chrij riʼ xuʼij: «Majun bʼëy kinayaʼ ta qa».