Jesús ntzolin chkaj

Jesús xmöl riʼ kikʼë rtzeqelbʼëy chlaʼ Galilea. Ryä xuʼij reʼ chkë: «Jäx chwäch le Rwachʼlew y keʼitjoj ri winäq rchë yeʼok ntzeqelbʼëy. Tikʼutuʼ chkiwäch jontir ri nkʼutun rïn chiwäch y keʼibʼanaʼ bautizar». Chrij riʼ xuʼij: «Ma timestaj ta chë ronojel mul xkijeʼ iwkʼë».

Taq xkʼasöx yän pä, Jesús 40 qʼij xkʼüt riʼ chkiwäch ye kʼïy rtzeqelbʼëy chriʼ Galilea chqä Jerusalén. Xkʼüt kʼïy naʼoj chkiwäch chqä xeruʼän kʼïy milagros. Pa rkʼisbʼäl, xmöl riʼ kikʼë rapóstoles pa jyuʼ Olivos. Jesús rbʼin wä reʼ chkë: «Ma kixel ta äl Jerusalén. Tiyoʼej na ri rtzjun Ntataʼ».

Ri apóstoles ma xqʼax ta chkiwäch ri xuʼij Jesús chkë. Rma riʼ, xkikʼutuj reʼ che rä: «¿Ya xkatok rey pa rwiʼ Israel?». Jesús xuʼij: «Jehová ma nrajoʼ ta na chë yinok rey. Pero xa jbʼaʼ chik, ryä xtyaʼ pä ri loqʼoläj rchqʼaʼ pan iwiʼ ri xtyaʼ iwchqʼaʼ, y xkixok ntestigos. Rma riʼ tibʼetzjoj chwij rïn chlaʼ Jerusalén, chlaʼ Judea, chlaʼ Samaria y chwäch jontir le Rwachʼlew».

Chrij riʼ, Jesús xbʼä äl chkaj y xkuchtäj rma jun sutzʼ. Ri rtzeqelbʼëy xkitzuʼ äl, pero chaq kʼateʼ ma xkitzʼët ta chik.

Ri rtzeqelbʼëy Jesús xeʼel äl chriʼ pa jyuʼ Olivos y xetzolin Jerusalén. Ryeʼ rkʼulun wä chkë nkimöl kiʼ chriʼ chqä nkiʼän orar chpan jun jay. Chqä kiyoʼen wä chë Jesús nuʼij pä chkë achkë más nkʼatzin nkiʼän.