¿Achkë rma Dios najin nyaʼ q’ij chë nqatäj poqän?

¿ACHKË KOMÄ NUNAʼ DIOS TAQ NQRTZʼËT CHË NQATÄJ POQÄN?

Michelle: Xbʼä qʼij Sofía. Kiʼ nkʼuʼx xatinwïl chojay.

Sofía: Rïn chqä kan kiʼ nkʼuʼx xatintzʼët chik jmul.

Michelle: Ri jmul qa xipë xqtzjon chrij achkë nunaʼ Dios taq röj nqatäj poqän.a Rït xaʼij chwä chë kan kʼïy tiempo akʼutun pä ya riʼ, y más taq ateʼ xrïl accidente. ¿Achkë rbʼanon ryä?

Sofía: Kʼo qʼij ütz y kʼo qʼij manä. Ye kʼa komä ütz jbʼaʼ.

Michelle: Ütz riʼ, rïn nbʼij chë kʼo mul kwest nuʼän chiwäch.

Sofía: Kʼo mul nquʼ, jaruʼ tiempo más xtqatäj na poqän.

Michelle: Ma itzel ta ri ke riʼ naquʼ. Taj nnatäj chawä ri rkʼisbʼäl mul xqtzjon xinkʼutuj chawä, ¿achkë rma Dios ryaʼon q’ij chë nqatäj poqän si ryä kʼo rchqʼaʼ chë nresaj jontir riʼ?

Sofía: Jaʼ, nnatäj chwä.

Michelle: Rchë nqatzʼët ri nuʼij le Biblia chrij riʼ, naʼäy nwajoʼ nnataj chawä jojun naʼoj ri xqatzjoj rij rkʼisbʼäl mul.

Sofía: Ütz k’a.

Michelle: Xqatamaj chrij jun achï ri nutzjoj le Biblia. Ryä xkʼutuj chë Dios achkë rma ryaʼon q’ij kʼo tijöj poqonal y Dios ma xchapon ta che rä nixta xuʼij che rä chë majun ta rkʼuqbʼäl kʼuʼx.

Sofía: Jaʼ, kantzij ya riʼ ma ntaman ta wä rïn.

Michelle: Chqä xqatamaj chë Jehová kan itzel nutzʼët taq röj nqatäj poqän. Le Biblia nuʼij chë ojer qa taq rtinamit xrïl kʼayewal, «xtiʼon ran ryä»b. ¿Tapeʼ kan nkʼuqbʼaʼ qakʼuʼx taq nqatamaj chë Dios nutäj poqän qkʼë?

Sofía: Jaʼ ke riʼ.

Michelle: Pa rkʼisbʼäl xqatamaj qa, chë rma Dios kowan rchqʼaʼ, xtkowin xtchüp rwäch ri tijöj poqonal taq ryä xtzʼët chë ya ütz chik nuʼän riʼ.

Sofía: Ya riʼ ri ma nqʼax ta chi nwäch. ¿Si ryä kʼo ronojel uchqʼaʼ pa rqʼaʼ rchë nresaj ri tijöj poqonal, achkë rma ma rbʼanon ta riʼ?

¿ACHKË NAJIN NTZʼUKÜ TZIJ?

Michelle: Naʼäy tqatzʼetaʼ ri nuʼij Génesis, ri naʼäy wuj kʼo chpan le Biblia ¿Akʼoxan chkij Adán y Eva chqä chrij ri cheʼ ri ma ütz ta wä nkitäj rwäch?

Sofía: Jaʼ, xkikʼüt chi nwäch chpan ri catecismo. Dios xuʼij chkë chë ma tkitäj ta rwäch jun chkë ri cheʼ, ye kʼa ryeʼ ma xkinmaj ta tzij.

Michelle: Jaʼ, ke riʼ. Ye kʼa tqatzʼetaʼ ri xbʼanatäj naʼäy chwäch riʼ, rma kan rkʼwan riʼ rkʼë ri tijöj poqonal ri kʼo komä. ¿Nawajoʼ naskʼij rwäch Génesis, capítulo 3, 1 kʼa 5?

Sofía: Ütz kʼa ke reʼ nuʼij: «Ye kʼa, chkë jontir ri chköp rchë pa qʼayis ri xeruʼän Jehová Dios, ri kumätz ya riʼ ri kʼo más rnaʼoj chkiwäch ri nkʼaj chik. Ryä xuʼij kʼa reʼ che rä ri ixöq: ‹¿Kantzij chë Dios xuʼij chiwä chë ma ütz ta nitäj kiwäch jontir ri cheʼ ri ye kʼo chwäch ri jardín?›. Ri ixöq xuʼij kʼa reʼ che rä: ‹Ütz nqatäj kiwäch ri cheʼ ri ye kʼo chwäch ri jardín. Ye kʼa ri rwäch ri cheʼ ri kʼo pa rnikʼajal ri jardín, Dios xuʼij: «Ma titäj ta rwäch nixta tichäp apü. We xtiʼän riʼ, xkixkäm»›. Chrij riʼ, ri kumätz xuʼij kʼa che rä ri ixöq: ‹Ma xkixkäm ta. Rma Dios rtaman chë ri qʼij ri xtitäj rwäch re cheʼ reʼ, xtjaqatäj iwäch chqä xkixok achiʼel Dios: xtitamaj ri ütz chqä ri ma ütz ta›».

Michelle: Matyox. Tqanukʼuj kij re versículos reʼ. Naʼäy nuʼij chë jun kumätz xtzjon rkʼë Eva. Chpan jun peraj chik che rä le Biblia nuʼij chë yë ri Diablo, o Satanás, ri xksan ri kumätz rchë xtzjon rkʼë Eva.c Ryä xkʼutuj che rä Eva achkë rma Dios xuʼij chkë chë ma ütz ta nkitäj rwäch jun chkë ri cheʼ. ¿Achkë xuʼij Dios chkë Adán y Eva ri xtbʼanatäj kikʼë we ma nkinmaj ta rtzij?

Sofía: Chë xkekäm.

Michelle: Jaʼ ke riʼ. Chrij riʼ, ri Diablo xuʼän jun mamaʼ tzʼukün tzij chrij Dios. Tatzʼetaʼ ri xuʼij: «Ma xkixkäm ta». ¡Najin nuʼij chë Dios jun aj tzʼuküy tzij!

Sofía: Ri najin natzjoj chwä ma nkʼoxan ta wä.

Michelle: Taq Satanás xuʼij chë Dios xa jun ajtzʼuküy tzij, xkʼatzin na xqʼax kʼïy tiempo rchë xqʼalajin we tzij o manä. ¿Ataman achkë rma?

Sofía: Mmm... Ma ntaman ta.

Michelle: Rchë nqʼax chawäch tqaquʼ rij reʼ. Jun qʼij yipë y nbʼij chawä chë rïn kʼo más wchqʼaʼ chawäch rït. ¿Achkë rbʼanik nakʼüt chi nwäch chë xa yïn sachnäq?

Sofía: Rkʼë bʼaʼ ütz nqajnamaj qachqʼaʼ.

Michelle: Jaʼ, rkʼë jbʼaʼ ütz nqakanuj jun cosa ri kan kʼo ralal. Y nqatzʼët achkë chqë chöj kaʼiʼ ri kan nkowin nuyäk. Riʼ ma kwest ta xtqʼalajin.

Sofía: Ya riʼ kantzij.

Michelle: Ye kʼa, ¿si pa rkʼexel riʼ rïn nbʼij chawä chë yït jun ajtzʼuküy tzij? Riʼ ma chaq bʼaʼ ta xtqʼalajin, ¿tapeʼ?

Sofía: Jaʼ.

Michelle: Riʼ ma xtqʼalajin ta xa xuʼ rkʼë najnamaj awchqʼaʼ.

Sofía: Kantzij.

Michelle: Rchë ri nkʼaj chik nkitzʼët chë ma ke riʼ ta anaʼoj, nkʼatzin na nqʼax kʼïy tiempo.

Sofía: Riʼ kantzij.

Michelle: Tqatzʼetaʼ chik jmul ri nuʼij Génesis. ¿Xuʼij komä ri Diablo chë ryä kʼo más rchqʼaʼ chwäch Dios?

Sofía: Manä, ma ke riʼ ta xuʼij.

Michelle: Xa ta ke riʼ xuʼij, chaq bʼaʼ ta xuʼän chwäch Dios xkʼüt chë yë ryä kʼo más rchqʼaʼ. Ye kʼa Satanás achiʼel ta xuʼij reʼ che rä Eva: «Ryä najin nutzʼük tzij chawäch; rïn kantzij ri najin nbʼij chawä».

Sofía: Ya riʼ majun bʼëy nkʼoxan ta rïn.

Michelle: Dios kan kʼo rnaʼoj y rtaman chë rchë nqʼalajin chë ma tzij ta ri xuʼij ri Diablo chrij, nkʼatzin nqʼax na kʼïy tiempo. Xa xuʼ ke riʼ nqʼalajin, achkë riʼ ri najin ntzʼukü tzij.

ACHKË QÄS XBʼANATÄJ

Sofía: Ye kʼa taq xkäm Eva, xqʼalajin chë Dios kantzij tajin ntzjon ¿tapeʼ?

Michelle: Jaʼ, ke riʼ jbʼaʼ. Ye kʼa ri xuʼij Satanás ma chriʼ ta xkʼis wä qa. Tatzʼetaʼ napeʼ chik jmul ri nuʼij ri versículo 5. ¿Achkë chik jun xuʼij ri Diablo che rä Eva?

Sofía: Chë si xttäj rwäch ri cheʼ xtjaqatäj rwäch.

Michelle: Jaʼ, ke riʼ. Chqä chë si xttäj rwäch ri cheʼ xttok achiʼel Dios, xttamaj ri ütz chqä ri ma ütz ta. Achiʼel nqatzʼët, tajin chqä nuqʼabʼaj chrij Dios chë kʼo ütz rewan chkiwäch ri winäq.

Sofía: Jaʼ, ya riʼ chqä ntzʼët rïn.

Michelle: Y ya riʼ jun nüm qʼabʼan tzij.

Sofía: Ya riʼ ma kan más nqʼax chi nwäch.

Michelle: Rkʼë ri xuʼij, ri Diablo xuʼän chë Eva xquʼ chë ri winäq ma nkʼatzin ta Dios pa kikʼaslemal. Jehová rtaman chë rkʼë ya reʼ chqä xkʼatzin xyaʼ tiempo chë Satanás, rchë xtkʼüt si kantzij ri najin nuʼij. Rma riʼ xyaʼ qʼij chë rä chë xtqʼät tzij pa rwiʼ le Rwachʼlew. Rma riʼ komä kowan tijöj poqonal kʼo: rma ri najin nchʼobʼonäj chwäch le Rwachʼlew yë Satanás, ma yë ta Dios.d Yë kʼa kʼo jun ütz nwajoʼ nbʼij chawä.

Sofía: ¿Achkë riʼ?

Michelle: Le Biblia kʼo ütz nuʼij chrij Dios. Nuʼij chë Jehová kʼo chqanaqaj taq nqatäj poqän. Tqatzʼetaʼ napeʼ ri xuʼij ri qʼatöy tzij David chpan Salmo 31:7. Ryä kowan xtäj poqän, pero tatzʼetaʼ napeʼ ri xuʼij che rä Dios. ¿Nawajoʼ naskʼij rwäch re versículo reʼ?

Sofía: Ütz kʼa, nuʼij: «Kan kiʼ nkʼuʼx xtinbʼän rma ri nimaläj awajowabʼäl, rma atzʼeton chë najin ntäj poqän y ataman chë kowan najin nchʼpü nkʼuʼx».

Michelle: Rma riʼ, tapeʼ kowan najin nutäj poqän, David jaʼäl xnaʼ ran taq xquʼ rij chë Jehová najin nutzʼët jontir ri najin nuqʼaxaj. ¿Nukʼuqbʼaʼ akʼuʼx rït chë Jehová nutzʼët pä jontir, yajün ri achkë yeqïl ri nuʼän chë nqbʼison tapeʼ nkʼaj chik ma nqʼax ta chkiwäch achkë nqanaʼ?

Sofía: Jaʼ, kan nkʼuqbʼaʼ nkʼuʼx.

Michelle: Le Biblia nuʼij chë Dios ma xtyaʼ ta qʼij chë kan kʼïy tiempo xtqatäj poqän. Chqä nukʼüt chë xa jbʼaʼ chik nrajoʼ rchë xtchüp rwäch ri rqʼatbʼäl tzij Satanás y xtchojmij jontir ri kʼayewal ryaʼon pa kiwiʼ ri winäq. Yajün ri rpoqonal awlon rït chqä ateʼ. Nwajoʼ nkʼüt chawäch achkë rma ütz nqayaʼ chwäch qan chë xa jbʼaʼ chik Dios xtresaj ri tijöj poqonal. ¿Nawajoʼ chë yitzolin pä le jun chik semana awkʼë?e

Sofía: Ütz kʼa.