Jehová ma xtmestaj ta jontir ri xaʼän chuyaʼik ruqʼij

Kʼo mul, rkʼë jbʼaʼ nqanaʼ chë majun achkë ntzʼetö ri utzil nqaʼän pa kiwiʼ ri nkʼaj chik o chë kan chanin yemestäx. Ye kʼa, ¿achkë nbʼanatäj rkʼë ri nqaʼän rma Jehová? Ryä jun Dios ri kan ntyoxin, rma riʼ majun bʼëy numestaj ta jontir ri nqaʼän chuyaʼik ruqʼij. Tapeʼ rït ma kan ta kʼïy chik yakowin naʼän chpan rusamaj Jehová rma chaq taqïl yayawäj, ryä majun bʼëy xkaturyaʼ ta qa (Heb 6:10).

TAQ XATZʼËT YÄN RI VIDEO JEHOVÁ MA NUMESTAJ TA RI NQAʼÄN, KEʼAQʼALAJSAJ RE KʼUTUNÏK REʼ:

• ¿Achkë jalajöj rubʼanik xkʼüt ri qachʼalal David chë kan kuw xsamäj chuyaʼik ruqʼij Jehová?

• ¿Achkë rubʼanik xkʼüt Jehová chwäch ri qachʼalal David chë ma xmestaj ta qa taq xkäm rixjayil chqä taq ryä ma kʼïy ta chik xkowin xuʼän rma ya xrjïx?

• ¿Achkë rma nqaʼij chë ri qachʼalal David kan kiʼ rukʼuʼx xuʼän rma xksaj rukʼaslemal rchë xyaʼ ruqʼij Jehová? (Pr 10:22).