Ma taxiʼij ta awiʼ chwäch ri xkebʼanatäj chqawäch apü

Xa jbʼaʼ chik nrajoʼ rchë Jehová xtchüp ruwäch ri itzelal. Taq xtbʼanatäj riʼ, ryä xtchüp kiwäch ri religiones ri ma pa rubʼeyal ta nkiyaʼ ruqʼij, jun molaj qʼatöy tzij xkekatäj pä chrij rutinamit chqä ryä xtchüp kiwäch jontir ri itzel taq winäq chpan Armagedón. Jontir röj kan qayoʼen chë nbʼanatäj riʼ.

Ye kʼa, kʼo kʼïy ri ma qataman ta chrij ri nimaläj tijöj poqonal, achiʼel ajän xtchapatäj. Chqä ma qataman ta achkë xtkiʼij ri qʼatbʼäl taq tzij chrij ri achkë rma xkekatäj pä chkij ri religiones. ¿Jaruʼ xtyalöj ri kʼayewal xtyaʼöx pa ruwiʼ rutinamit Dios chqä achkë chë kʼayewal xtyaʼöx pa ruwiʼ? ¿Y achkë xtksaj Jehová rchë xtchüp kiwäch ri itzel taq winäq pan Armagedón? Ma kan ta qataman.

Tapeʼ ke riʼ, majun ta rma nqaxiʼij qiʼ chwäch ri xtbʼanatäj chqawäch apü, rma le Biblia nuʼij jontir ri nkʼatzin nqatamaj rchë ma nsach ta qakʼuʼx. Tqaquʼ rij reʼ. Röj qataman chë yoj kʼo chik pa rukʼisbʼäl chkë ri «rukʼisbʼäl taq qʼij» (2Ti 3:1). Chqä qataman chë ri kʼayewal xtyaʼöx pa kiwiʼ ri religiones «xa xtqʼat» rchë ma nchaʼ ta chiʼ rutinamit Dios (Mt 24:22). Y röj kan qayaʼon chwäch qan chë Jehová xtköl rutinamit (2Pe 2:9). Chqä qataman chë Jehová ruchaʼon jun ri kʼo ruchqʼaʼ chqä kan pa ruchojmil nqʼatö tzij rchë nuchüp kiwäch ri itzel taq winäq chqä rchë yeruköl rusamajelaʼ Dios chpan Armagedón (Ap 19:11, 15, 16).

Taq xtbʼanatäj jontir riʼ, «ri winäq kan xkekäm chë xbʼïn-ïl» (Lu 21:26). Ye kʼa röj ma xtbʼanatäj ta ya riʼ qkʼë. We nqaskʼij chqä nqaquʼ rij achkë rubʼanik xtoʼ Jehová rutinamit ojer chqä ri rubʼin pä chqë chrij ri xtbʼanatäj chqawäch apü, xtqkowin xtqaʼän ri nuʼij Lucas 21:28: «Chöj kixpaʼeʼ y tiyakaʼ ijolon, rma ri ikolotajik xa naqaj chik kʼo pä».