Tatzʼetaʼ chik jmul ri naʼoj ri kʼo más kiqʼij

Taq nakʼïs natjoj awiʼ chrij le Biblia o chkij qapublicaciones, ¿kʼayewal nuʼän chawäch nnatäj chawä ri xaskʼij? Jontir röj kʼo mul nbʼanatäj ya riʼ qkʼë. ¿Achkë xtqtoʼö rchë xtnatäj chqë ri xqaskʼij? Ri xtqtoʼö ya riʼ nqatzʼët chik jmul ri naʼoj ri kʼo más kiqʼij.

Taq kʼo jun najin naskʼij rwäch, tatnabʼaʼ qa jbʼaʼ rskʼixik y taquʼ rij ri naʼoj najin natamaj qa. Kan ya riʼ xuʼij ri apóstol Pablo chkë ri cristianos ri najin wä nkiskʼij rwäch rcarta ryä. Pablo xuʼij reʼ chkë: «Ri más rejqalen chpan ri najin nqatzjoj, ya reʼ» (Heb. 8:1). Kikʼë ri tzij riʼ, ryä xertoʼ ri cristianos riʼ rchë nkitzʼët achkë naʼoj nrajoʼ nukʼüt ryä chkiwäch chqä achkë rbʼanik kikʼwan kiʼ ri naʼoj riʼ.

Ronojel mul taq kʼo jun xtaskʼij rwäch, taksaj jbʼaʼ tiempo rchë naquʼ rij ri naʼoj kʼo más kiqʼij, rkʼë jbʼaʼ ri rkʼisbʼäl 10 minutos rchë ri tiempo ri naksaj rchë natjoj awiʼ. We ma kan ta nnatäj ri naʼoj chawä, taskʼij chik jmul ri subtítulos o ri naʼäy taq tzij kichë ri párrafos. Taq kʼo jun kʼakʼakʼ naʼoj xtatamaj, takamluj ri naʼoj riʼ, ye kʼa taq naʼän riʼ ma taskʼij ta chwäch wuj. We rït natzʼët chik jmul ri naʼoj ri kʼo más kiqʼij, ma xa xuʼ ta ma xkeʼamestaj ta, xa xkakowin chqä xtatzʼët achkë rbʼanik xtasmajij pan akʼaslemal.