Jun pregunta ri xa bʼa achkë chqë röj nkowin nbʼanö

Ya María chqä Juana ya riʼ jun kʼlaj qachʼalal ri ye kʼo chpan jun tinamït ri akuchï ye kʼïy winäq aj Filipinas yeʼapon rchë yebʼesamäj. Y ryeʼ nkitzjoj le Biblia chkë ri winäq riʼ. Taq najin wä ri COVID-19, ya María xertjoj ye kʼïy winäq chrij le Biblia, jojun chkë ri winäq riʼ ye kʼo chpan rtinamit ryä y nkʼaj chik jukʼan chik tinamït ye petenäq wä. ¿Achkë rbʼanik xerïl ri winäq riʼ rchë xertjoj?

Ya María nukʼutuj wä ya reʼ chkë restudiantes: «¿Kʼo chik jun ataman rwäch rït ri nrajoʼ nutjoj ri chrij le Biblia?». We ryeʼ nkiʼij che rä chë kʼo jun kitaman rwäch, ryä nuʼij wä ya reʼ chkë: «¿Nawajoʼ yinatoʼ rchë yitzjon rkʼë?». Re pregunta reʼ ri ma kwest ta naʼän kan kʼïy mul ütz lenäq chwäch. ¿Achkë rma? rma ri winäq ri nkiloqʼoqʼej Rchʼaʼäl Dios kan nkajoʼ nkitzjoj chkë kichʼalal chqä kamigos ri achkë nkitamaj. Tqatzʼetaʼ achkë xuʼän ya María.

Jun chkë restudiantes ri Jasmin rbʼiʼ, xtoʼ rchë xtamaj kiwäch ye kajiʼ winäq ri nkajoʼ nkitjoj kiʼ chrij le Biblia. Jun chkë ryeʼ ri Cristina rbʼiʼ, kan kowan xqä chwäch xtjoj riʼ chrij le Biblia, rma riʼ xkʼutuj chë tyaʼöx rtjonik kaʼiʼ mul pa jun semana. Taq ya María xkʼutuj che rä we kʼo chik jun rtaman rwäch ri nrajoʼ nutjoj riʼ chrij le Biblia, ya Cristina xuʼij che rä: «Jaʼ kʼo, nwajoʼ natamaj kiwäch jojun wamigas». Xa pa jun kayoxiʼ semanas ya Cristina xtoʼ ya María rchë xtzjon kikʼë kajiʼ ramigas ri nkajoʼ nkitamaj más chrij le Biblia. Jbʼaʼ chrij riʼ, ya Cristina xtoʼ chik jmul ya María rchë xtamaj kiwäch nkʼaj chik winäq, y jojun chkë ryeʼ ke riʼ chqä xkiʼän.

Taq ya Cristina xtoʼ yän ya María rchë xtamaj kiwäch ramigas, ryä chqä xrajoʼ chë ri rfamilia ri ye kʼo Filipinas nkitjoj kiʼ chrij le Biblia. Rma riʼ xtzjon rkʼë ral, ri Andrea rbʼiʼ. Pa naʼäy, ya Andrea xquʼ ya reʼ: «Ri Testigos xa ye jun secta. Ma nkinmaj ta chrij Jesús y xa xuʼ nkiksaj ri Antiguo Testamento». Ye kʼa taq xtjoj riʼ naʼäy mul chrij le Biblia, xqʼalajin chwäch chë ma ke riʼ ta achiʼel xquʼ. Taq nyaʼöx wä rtjonik, ryä nuʼij wä ya reʼ: «Si kan yë le Biblia nbʼin, ¡reʼ ntel chë tzij chë ya reʼ ri kantzij!».

Jbʼaʼ chrij riʼ, ya Andrea xuʼän chë ya María xtamaj kiwäch kaʼiʼ ramigas chqä jun rchiʼil pa samaj, ryeʼ chqä xkichäp xkitjoj kiʼ chrij le Biblia. Chqä ya Andrea kʼo wä jun rchʼututeʼ ri Angela rbʼiʼ, ryä ma nkowin ta ntzuʼun chqä nuyaʼ wä rxkïn taq ya Andrea nyaʼöx wä rtjonik rma ya María. Ye kʼa ya María, ma rtaman ta wä riʼ. Kʼo jun qʼij ya Angela xuʼij che rä ya Andrea chë nrajoʼ ntzjon rkʼë ya María rma nrajoʼ nutjoj ri chrij le Biblia. Ya Angela kan kowan xqä chwäch ri xtamaj. Majanä wä tuʼän jun ikʼ y ryä ya kʼo wä chik kʼïy textos pa rjolon. Chqä xuʼij che rä ya María chë nrajoʼ nutjoj riʼ kajiʼ mul pa jun semana. Rkʼë rtoʼik ya Andrea ryä xchäp xuʼän conectar riʼ pa qamoloj pa internet.

Taq ya Cristina nyaʼöx wä rtjonik, Josué ri rchjil, njeʼ wä qa chriʼ naqaj rchë nukʼoxaj achkë nkitzjoj. Taq ya María xunaʼej xkʼutuj che rä we nrajoʼ njeʼ kikʼë. Ryä xuʼij che rä: «Ütz kʼa ye kʼa xuʼ xtinkʼoxaj, rma riʼ majun ta takʼutuj chwä. Si xtaʼän riʼ xkibʼä äl». Majanä wä tuʼän cinco minutos y ryä kʼo más xkʼutuj yän che rä ya María chwäch ya Cristina. Chqä xuʼij chë nrajoʼ nutjoj riʼ chrij le Biblia.

Rma ri xkʼutuj ya María chkë restudiantes, kan ye kʼïy winäq xkichäp xkitjoj kiʼ chrij le Biblia. Ryä xkʼutuj rtoʼik chkë nkʼaj chik qachʼalal rchë xekitjoj jojun chkë ri winäq riʼ. ¡28 winäq, kichë kajiʼ tinamït xkichäp xkitjoj kiʼ chrij le Biblia rkʼë ya María!

Ri naʼäy restudiante, ya Jasmin, xqasäx pa yaʼ pa abril rchë 2021. Ya Cristina xqasäx pa yaʼ pa mayo rchë 2022 y komä kʼo chik jmul rkʼë rfamilia chlaʼ Filipinas. Kaʼiʼ chik estudiantes ri xetjöx rma ya María, xeqasäx chqä pa yaʼ. Ri kaʼiʼ winäq riʼ ye ya Cristina xtoʼö rchë ya María rchë xtamaj kiwäch. Jojun ikʼ chrij riʼ, ya Angela xqasäx pa yaʼ y komä precursora regular. Y Josué rchjil ya Cristina, chqä ya Andrea, ral ya Cristina chqä nkʼaj chik estudiantes, najin na nkitjoj kiʼ chrij le Biblia chqä najin nkiʼän ri nqä chwäch Jehová.

Pa naʼäy siglo, ri ütz taq rtzjol chrij Rqʼatbʼäl tzij Dios, chanin xel rtzjol kikʼë ri familias chqä kikʼë nkʼaj chik winäq (Juan 1:41, 42a; Hech. 10:24, 27, 48; 16:25-33). We ütz nuʼän chawäch takʼutuj ya reʼ chkë awestudiantes o chkë nkʼaj chik winäq ri nkajoʼ nkitamaj más chrij Rchʼaʼäl Dios: «¿Kʼo chik jun ataman rwäch rït ri nrajoʼ nutjoj riʼ chrij le Biblia?». Rkʼë re pregunta reʼ ri xa bʼa achkë chqë röj nkowin nbʼanö, ma qataman ta jaruʼ xtkajoʼ xtkitjoj kiʼ chrij le Biblia qkʼë.