Kikʼutunik ri yeskʼin rwäch qawuj

¿Kʼa ajän ma xtqatzjoj ta chik ri ütz taq rtzjol?

Jesús xuʼij: «Ri ütz taq rtzjol chrij Rqʼatbʼäl Tzij Dios xttzjöx chwäch jontir Rwachʼlew rchë jontir winäq xkekʼoxan rchë, y chrij riʼ xtchup rwäch ronojel ri itzelal» (Mat. 24:14). Chpan re versículo reʼ —y chpan chqä ri versículo 6 y 13—, ri tzij griego ri xbʼan traducir «xtchup rwäch ronojel ri itzelal» ya riʼ télos. Re tzij reʼ ntzjon chrij ri qʼij taq jurayil xtchup rwäch rqʼatbʼäl tzij Satanás chpan Armagedón (Apoc. 16:14, 16). Reʼ ntel chë tzij chë röj xtqatzjoj na ri ütz taq rtzjol kʼa taq xa jbʼaʼ chik nrajoʼ rchë xtbʼeqä ri qʼij riʼ. Rbʼanon qa, ma ke riʼ ta wä qʼaxnäq chqawäch, ye kʼa komä xqʼax más re naʼoj reʼ chqawäch.

Kʼa komä, röj qʼaxnäq wä chqawäch chë ma xtqatzjoj ta chik ri ütz taq rtzjol taq xtchup rwäch Babilonia la Grande y xtchapatäj ri nimaläj tijöj poqonal (Apoc. 17:3, 5, 15, 16). Röj qanman wä chë taq xtchapatäj ri nimaläj tijöj poqonal, ya riʼ taq xtkʼis «ri tiempo ri akuchï ri winäq xkekowin na xtkiʼän chë Jehová kiʼ rkʼuʼx xtuʼän kikʼë» (Is. 61:2). Chqä xqaquʼ chë xa xuʼ xkekolotäj qa ri winäq ri xkinmaj rtzij Jehová taq majanä tchapatäj ri nimaläj tijöj poqonal. Xqaʼij chqä chë ryeʼ ye achiʼel ri judíos ri xekolotäj qa taq xchup rwäch Jerusalén chpan ri jnaʼ 607 taq majanä tpë Jesús. Ri judíos riʼ achiʼel ta xyaʼöx ketal rchë xekolotäj qa rma xkiyaʼ rqʼij Jehová chqä xkitzelaj ri ma ütz ta (Ezeq. 5:11; 9:4). Ye kʼa ya reʼ ma rkʼwan ta riʼ rkʼë ri xuʼij Jesús chpan Mateo 24:14, rma chriʼ nuʼij chë rkʼë jbʼaʼ ye kʼo jojun winäq xtkinmaj ri ütz taq rtzjol, yajün taq xa jbʼaʼ chik nrajoʼ rchë xtchup rwäch ri itzelal chpan Armagedón.

Ri nuʼij chpan Mateo 24:14 nuʼän chë nqajäl ri qanman pä chrij ri nuʼij Apocalipsis 16:21, ri akuchï ntzjon chkij nmaʼq taq saqbʼöch. Taq nqanukʼuj más rij ri kaʼiʼ textos riʼ, nqatzʼët chë ri nuʼij jun texto nutzʼaqatsaj ri nuʼij le jun chik. ¿Achkë rma nqaʼij riʼ? Nqatamaj riʼ we nqatzʼët achkë kinaʼoj nkikʼüt ri winäq taq ntzjöx ri ütz taq rtzjol chkë. Achiʼel xuʼij ri apóstol Pablo, chkiwäch «ri winäq ri ye bʼenäq chpan ri bʼey akuchï xkekolotäj wä», ri ütz taq rtzjol riʼ «kan jubʼül rxlaʼ kʼaslemal rma xtyaʼ kikʼaslemal». Ye kʼa chkiwäch rkʼulel Dios, «xa rxlaʼ kamïk», y ya riʼ ma ütz ta rtzjol (2 Cor. 2:15, 16). Ryeʼ kan ma ütz ta nkikʼoxaj ri ütz taq rtzjol, rma ri rtzjol riʼ nukʼüt chë kikʼwan jun itzel kʼaslemal, chë yë Satanás najin nqʼatö tzij pa kiwiʼ chqä chë ya xtchup rwäch ri rbʼanik kʼaslemal kikʼwan (Juan 7:7; 1 Juan 2:17; 5:19).

Chqä, ri kʼambʼäl tzij ri nqïl chpan Apocalipsis 16:21 nuʼij chë ri nmaʼq taq saqbʼöch ri xtqä pä chkij ri winäq, kan xtqʼax rwiʼ xtuʼän. Ya reʼ nukʼüt chë rkʼë jbʼaʼ, taq najin chik ri nimaläj tijöj poqonal, rtzjoxik le Biblia xtjeʼ más rchqʼaʼ chqä xttzjöx chkë más winäq. Ya reʼ xtuʼän chë más winäq xtkitamaj rbʼiʼ Jehová (Ezeq. 39:7). ¿Ntel chë tzij riʼ chë taq ya xchup yän rwäch Babilonia la Grande ye kʼo winäq kan jaʼäl xtkikʼoxaj ri xtqatzjoj chkë, kan achiʼel ta najin nkisäq jun aqʼon ri kan jubʼül rxlaʼ? Rkʼë jbʼaʼ. Rkʼë jbʼaʼ xtnatäj chkë o xtkitamaj chë ri testigos de Jehová kan pa jnaʼ kitzjon pä chë ri religiones ri ma yeqä ta chwäch Dios xtchup kiwäch.

Ke riʼ chqä jbʼaʼ xbʼanatäj Egipto taq xekʼis yän ri 10 plagas. Taq Jehová xkʼüt yän chë ri kidioses ri egipcios majun ta kichqʼaʼ, kan ye kʼïy winäq ri jalajöj kitinamit chqä ma ye israelitas ta xebʼä rkʼë rtinamit Dios (Éx. 12:12, 37, 38). Rkʼë jbʼaʼ ri winäq riʼ xkiʼän riʼ rma xkitzʼët achkë rbʼanik xebʼanatäj ri 10 plagas ri xtzjoj Moisés.

Xa bʼa achkë winäq ri xttok chpan rtinamit Jehová taq xchup yän rwäch Babilonia la Grande, xtkowin na xkertoʼ rchʼalal Cristo ri kʼa ye kʼo na chwäch Rwachʼlew, y rma xtuʼän riʼ xttok chpan ri molaj winäq ri nbʼix karneʼl chkë (Mat. 25:34-36, 40). Ye kʼa ri winäq xa xuʼ xkekowin xtkiʼän riʼ taq majanä tchapatäj ri Armagedón, taq ri qachʼalal ri yechaʼon rma Dios majanä tyaʼöx kikʼaslemal chlaʼ chkaj.

Komä ke xqʼalajsäx ya reʼ chqawäch, nqʼax más chqawäch chë Jehová kowan najowan chqä kan nupoqonaj qawäch. Kantzij wä, ryä «ma nrajoʼ ta chë kʼo ta jun nchup rwäch, xa kan nrajoʼ chë jontir nkitzolij kiʼ» (2 Ped. 3:9).