Kikʼutunik ri yeskʼin rwäch qawuj

¿Achkë xrajoʼ xuʼij ri xtzʼibʼan ri Proverbios 30:18, 19 taq xuʼij chë ma nqʼax ta chwäch achkë «rbʼanik nukʼwaj riʼ jun achï rkʼë jun qʼopoj»?

Ye kʼïy winäq, yajün ri biblistas, nkikʼutuj qa chkiwäch achkë ntel chë tzij ri tzij riʼ. Chpan ri Traducción del Nuevo Mundo ke reʼ nuʼij re versículos reʼ: «Kʼo oxiʼ ri majanä keqʼax pa njolon [o «kan nqä nmayej chkë», nota pa kaxlän], kajiʼ ri ma nqʼax ta chi nwäch: ri rbʼanik nxikʼan ri águila chlaʼ chkaj, ri rbʼanik nbʼä äl jun kumätz pa rwiʼ jun abʼäj, ri rbʼanik nbʼä jun barco pa nkʼaj mar chqä ri rbʼanik nukʼwaj riʼ jun achï rkʼë jun qʼopoj» (Prov. 30:18, 19).

Rbʼanon qa, ri tzij «ri rbʼanik nukʼwaj riʼ jun achï rkʼë jun qʼopoj» qʼaxnäq wä chqawäch chë xa chrij jun ma ütz ta najin ntzjon wä. ¿Achkë rma? Rma ri contexto najin nutzjoj rij jojun cosas ri ma ye ütz ta chqä majun bʼëy nkiʼij ta ¡Ma nwajoʼ ta chik! (Prov. 30:15, 16). Y ri versículo 20 nutzjoj rij jun ixöq ri rkʼwan jun tzʼil kʼaslemal y nuʼij chë majun ta jun itzel najin nuʼän. Rma riʼ xqaquʼ chë ri jnan jbʼaʼ nkiʼän ri águila, ri kumätz, ri barco chqä ri achï, ya riʼ chë taq yeslon o kʼo yekiʼän, majun ta jun nnaʼen kichë. Ya riʼ xbʼanö chqë chë xqaquʼ chë ri tzij «ri rbʼanik nukʼwaj riʼ jun achï rkʼë jun qʼopoj», najin ntzjon chrij jun achï ri nuqʼöl jun qʼopoj rchë nqä pa rqʼaʼ.

Ye kʼa, kʼo rma nqaʼij chë re textos reʼ kʼo ütz najin nutzjoj. Ri xtzʼibʼan re proverbio reʼ xa xuʼ wä najin nutzjoj jojun ri kan xel rkʼuʼx xertzʼët o kan xqä rmayej chkij.

Ri rollos rchë ojer ri xetzʼibʼäx pan hebreo, nkiʼij chqä chë Proverbios 30:18 xa ütz najin nutzjoj. Kʼo jun diccionario bíblico nuʼij chë ri tzij hebreo ri xbʼan traducir «ri majanä keqʼax pa njolon» chpan re versículo reʼ, «najin ntzjon chrij jun ri kan nqä amayej chrij, ma chaq nbʼanatäj ta o kan sbʼläj jaʼäl» (Theological Lexicon of the Old Testament, rchë Ernst Jenni chqä Claus Westermann).

Ri profesor Crawford Howell Toy, ri kʼo pa Universidad rchë Harvard (Estados Unidos), xuʼij chqä chë re versículo reʼ ma najin ta nutzjoj jun ri ma ütz ta. Ryä xuʼij chë ri xtzʼibʼan re proverbio reʼ, najin wä nuʼij chë kan xqä rmayej chkij ri nutzjoj re texto reʼ.

Rma riʼ ütz nqaʼij chë Proverbios 30:18, 19 najin nutzjoj rij jojun ri kan kowan jaʼäl chqä chë rkʼë jbʼaʼ nixta nqʼax pa qajolon ri yekiʼän. Achiʼel ri xtzʼibʼan re proverbio reʼ, röj chqä kan jaʼäl nqatzʼët achkë rbʼanik yexikʼan ri águilas, achkë rbʼanik yebʼä ri kumätz pa rwiʼ abʼäj tapeʼ majun ta kaqän, achkë rbʼanik yebʼä pa rwiʼ mar ri nmaʼq taq barcos y achkë rbʼanik jun kʼajol chqä jun qʼopoj nukʼän riʼ kiwäch, nkajoʼ kiʼ chqä kiʼ kikʼuʼx nkiʼän pa kikʼaslemal.