¿Kan kʼo komä ri Diablo?
Ri nukʼüt le Biblia
Jaʼ, ri Diablo kan kʼo. Ryä jun ángel ri xuʼän itzel rnaʼoj chqä ma xnmaj ta chik rtzij Dios. Le Biblia nuʼij chë yë ryä ri «qʼatöy tzij rchë le Rwachʼlew» (Juan 14:30; Efesios 6:11, 12). Y chpan le Biblia kʼo jojun rbʼiʼ nyaʼöx re ángel reʼ rchë nukʼüt achkë rnaʼoj. Tqatzʼetaʼ jojun chkë riʼ:
Satanás, ri ntel chë tzij «Ri nupabʼaʼ riʼ chwäch Dios» (Job 1:6).
Diablo, ri ntel chë tzij «Ajtzʼuküy Tzij» (Apocalipsis 12:9).
Kumätz, ri nbʼix che rä jun ri nqä chwäch yerqʼöl ri nkʼaj chik (2 Corintios 11:3).
Ajtzʼuküy Tzij (Juan 8:44).
Ma jun kʼambʼäl tzij ta rchë ri itzelal nixta ya riʼ ri itzelal kʼo pa qan
Ye kʼo winäq nkinmaj chë ri Diablo xa nukʼambʼej tzij ri itzelal o chë ya riʼ ri itzelal ri kʼo pa qan jontir, yajün Dios. Ye kʼa chpan le Biblia nuʼij chë kʼo jun qʼij Dios xtzjon rkʼë ri Diablo. Rma riʼ, ¿achkë ta rbʼanik xuʼän riʼ si Dios majun ta mak chrij chqä kan loqʼoläj jontir ri nuʼän? (Deuteronomio 32:4; Job 2:1-6). Chqä tnatäj chqë chë le Biblia nuʼij chë ri Diablo xkanuj rbʼanik chë Jesús, ri majun ta wä mak chrij, nuqʼäj rtzij Dios (Mateo 4:8-10; 1 Juan 3:5). Achiʼel nqatzʼët, le Biblia nukʼüt chë Satanás kan kʼo, y ma xa xuʼ ta nukʼambʼej tzij ri itzelal.
Ye kʼïy winäq nkinmaj chë majun bʼëy xbʼejeʼ ta ri Diablo. ¿Achkë komä rma nbʼanatäj riʼ? Le Biblia nuʼij chë Satanás nukanuj rbʼanik rchë yerqʼöl ri winäq rchë nkiʼän ri nrajoʼ ryä (2 Tesalonicenses 2:9, 10). Y jun ri kan ütz lenäq chwäch ya riʼ nuʼän chë ri winäq nkiquʼ chë ryä majun bʼëy xbʼejeʼ ta (2 Corintios 4:4).
Ri nbʼix chrij ri Diablo ri ma tzij ta
Ri nbʼix chrij: Lucifer ya riʼ chik jun rbʼiʼ ri Diablo.
Ri nukʼüt le Biblia: Ri tzij hebreo ri bʼanon qa «Lucifer» che rä chkipan jojun biblias ntel chë tzij «ri ntzʼitzʼan» (Isaías 14:12). Re tzij reʼ xeksäx taq xyaʼöx jun profecía, y ri contexto nukʼüt chë najin wä ntzjöx kij ri qʼatöy taq tzij aj Babilonia, ri rma kan kowan wä nkinaʼ kiʼ xttzaq wä kikʼïx rma Dios (Isaías 14:4, 13-20). Chpan re profecía reʼ, taq ri qʼatöy taq tzij aj Babilonia nchup kiwäch, nbʼix ri «yetzʼitzʼan» chkë rchë ntzaq kikʼïx.
Ri nbʼix chrij: Ri Diablo xa rsamajel Dios.
Ri nukʼüt le Biblia: Ri Diablo xa rkʼulel Dios, ma rsamajel ta. Satanás chqä itzel yertzʼët ri nkiyaʼ rqʼij Dios, rma riʼ nuyaʼ kʼayewal pa kiwiʼ chqä nutzʼük tzij chkij (1 Pedro 5:8; Apocalipsis 12:10).