RI QʼOPOJIʼ KʼOJOLAʼ NKIKʼUTUJ QA REʼ CHKIWÄCH
¿Achkë rubʼanik yirutoʼ le Biblia? Rukaʼn peraj: Ri ütz naʼän rchë kan xtqä chawäch xtaskʼij ruwäch le Biblia
Jun kʼajol ri rubʼiniʼan Will nuʼij: «Rkʼë jbʼaʼ kan nikʼo akʼuʼx naskʼij ruwäch le Biblia. Ye kʼa ke riʼ nanaʼ taq ma ataman ta achkë rubʼanik naskʼij ruwäch».
¿Nawajoʼ natamaj achkë ütz naʼän rït rchë kan xtqä chawäch xtaskʼij ruwäch a-Biblia? Ri naʼoj ri ye kʼo chpan re peraj reʼ kowan xkatkitoʼ.
Taquʼ rij ri najin naskʼij
Rchë naʼän riʼ, tabʼanaʼ ya reʼ:
Tachaʼ jun tzijonem ri nawajoʼ natjoj awiʼ chrij. Rkʼë jbʼaʼ jun ri xbʼanatäj ojer, jun peraj rchë jun Evangelio o nakʼoxaj ri ruskʼixik jojun peraj che rä le Biblia ri kʼo pa qa-sitio pa Internet jw.org.
Taskʼij ruwäch ri tzijonem riʼ. Ütz naʼän riʼ pan ayonïl, taq yït kʼo rkʼë a-familia o kikʼë awachiʼil. Jun chiwä rïx ütz nuskʼij ruwäch ri najin ntzjon chpan ri tzijonem y ri nkʼaj chik nkiʼän kichʼaʼäl ri nkʼaj chik winäq ri yetzjon chqä chpan ri tzijonem riʼ.
Ütz nasmajij jojun chkë re naʼoj reʼ:
Tabʼanaʼ jun dibujo rchë ri najin naskʼij o jalajöj dibujos ri nkikʼüt achkë najin nbʼanatäj. Chqä tatzʼibʼaj qa achkë najin yebʼanatäj chkipan ri achbʼäl riʼ.
Taq naskʼij chrij jun winäq chpan le Biblia, tatzʼibʼaj chwäch jun wuj achkë runaʼoj xuʼän chqä achkë qäs xeruʼän chpan rukʼaslemal. Chrij riʼ, tatzʼetaʼ achkë rubʼanik kikʼwan kiʼ kikʼë ri utzil ri xeyaʼöx pa ruwiʼ rma Dios.
Taq naskʼij jun peraj chpan le Biblia, tabʼanaʼ che rä chë kan achiʼel ta najin yatzjon kikʼë ri winäq ri yetzjöx chpan ri peraj riʼ chqä chë kan achiʼel ta najin naʼän kʼutunïk chkë.
We chpan ri peraj ri najin naskʼij ntzjöx rij jun winäq ri kʼo jun ma ütz ta xuʼän, taquʼ achkë ta xbʼanatäj xa ta ri winäq riʼ ma ta xuʼän riʼ. Jun tzʼetbʼäl, taquʼ rij ri xbʼanatäj rkʼë Pedro taq xuʼij chë ma retaman ta ruwäch Jesús (Marcos 14:66-72). ¿Achkë kʼo ta chë xuʼän Pedro rchë ma ta xuʼij ya riʼ?
We ütz nuʼän chawäch, tatzʼibʼaj jun aw-historia. Rchë naʼän riʼ, ütz nakʼän anaʼoj chrij jun tzijonem ri kʼo chpan le Biblia. Chqä, tatzʼibʼaj qa achkë utziläj taq naʼoj natamaj qa chpan ri tzijonem riʼ (Romanos 15:4).
YRït yakowin naʼän chë kan achiʼel ta najin yebʼanatäj ri najin naskʼij chpan le Biblia.
Takanuj más naʼoj chrij ri najin naskʼij
We kan naquʼ rij jontir ri najin yebʼanatäj chpan jun tzijonem ri najin naskʼij chpan le Biblia, kan kʼo más utziläj taq naʼoj xtatamaj qa chpan. Kʼo mul, xa jun o kaʼiʼ tzij nkiʼän chawä chë ri najin naskʼij njeʼ más ruqʼij chawäch.
Jun tzʼetbʼäl, tajnamaj ri nuʼij Mateo 28:7 rkʼë ri nuʼij Marcos 16:7.
¿Achkë rma Marcos ma xa xuʼ ta xuʼij chë Jesús xtkʼüt riʼ chkiwäch ri rutzeqelbʼëy, xa kan xuʼij chqä chë xtkʼüt riʼ chwäch Pedro?
Re naʼoj reʼ xkaturtoʼ: Marcos ma kʼo ta wä chriʼ; achiʼel ta yë Pedro ri xtzjon ya riʼ che rä.
Ri utziläj naʼoj ri nqatamaj qa: ¿Achkë rma kan xkʼuqbʼaʼ rukʼuʼx Pedro ri xtamaj chë Jesús xrajoʼ xtzʼët chik jmul? (Marcos 14:66-72). ¿Achkë rubʼanik xkʼüt Jesús chë xok jun utziläj rachiʼil Pedro? ¿Achkë rubʼanik nakʼän anaʼoj rït chrij Jesús we nawajoʼ yatok jun utziläj achiʼil?
Taq naquʼ rij ri naskʼij chpan le Biblia chqä nakanuj más naʼoj chrij ri najin naskʼij, kan más xtqä chawäch xtaskʼij ruwäch a-Biblia.