¿Achkë wä rubʼanik ri kʼaslemal pa Edén?

Dios kʼïy utzil xyaʼ pa kiwiʼ Adán y Eva (Génesis 1:28).

Jehová xuʼän Eva, ri naʼäy ixöq, rchë xok rixjayil Adán (Génesis 2:21, 22).

Taq Jehová xeruʼän Adán y Eva, ryeʼ majun ta wä mak chkij. Jehová kan ütz xuʼän qa che rä kichʼobʼonik chqä che rä kichʼakul.

Ryeʼ xeyaʼöx chwäch jun utziläj ulew ri xbʼiniʼaj Edén. Ri ulew riʼ janina jaʼäl rma ye kʼo wä cheʼ chqä chköp chwäch, y nqʼax wä jun mamaʼ raqän yaʼ chpan.

Jehová xtzjon wä kikʼë ryeʼ chqä xerutjoj chrij ri achkë kʼo chë nkiʼän. Ryä chqä xuʼij chkë chë ma xkekäm ta we nkinmaj rutzij.

Dios xuʼij chkë Adán y Eva chë ma tkitäj ta ruwäch jun chkë ri cheʼ (Génesis 2:16, 17).

Dios xuʼij chkë Adán y Eva chë ma tkitäj ta ruwäch jun cheʼ ri kʼo chwäch ri utziläj ulew Edén, rma xkekäm we xtkiʼän riʼ.

Kʼo jun ángel ri ma xnmaj ta chik rutzij Dios. Ri itzel ángel riʼ ya riʼ Satanás, ri Diablo.

Satanás ma xrajoʼ ta chë Adán y Eva xkinmaj rutzij Jehová. Rma riʼ, xksaj jun kumätz rchë xuʼij che rä Eva chë ma xtkäm ta we nutäj ruwäch ri cheʼ riʼ. Chqä kan xuʼij che rä chë xttok achiʼel Dios. ¡Riʼ kan jun mamaʼ tzʼukün tzij! (Génesis 3:1-5).