¿Achkë rbʼanik yeʼitjoj iwalkʼwal?

Taq Jehová xuʼän ri familia, pa kiqʼaʼ ri teʼej tataʼaj xyaʼ wä qa ri nkichajij kalkʼwal (Colosenses 3:20). Rïx ri yïx teʼej tataʼaj nkʼatzin yeʼitjoj iwalkʼwal rchë nkajoʼ Jehová, ya riʼ xketoʼö rchë xkeʼel ütz taq winäq taq xkekʼïy qʼanäj (2 Timoteo 1:5; 3:15). Rïx chqä nkʼatzin nitamaj achkë kʼo pa kan. Kantzij na wä chë ri tzʼetbʼäl niyaʼ chkiwäch kan kowan rejqalen. Rchë yixkowin nikʼüt Rchʼaʼäl Dios chkiwäch iwalkʼwal, nkʼatzin pan iwan rïx naʼäy njeʼ wä (Salmo 40:8).

1 TABʼANAʼ CHË RI AWALKʼWAL MA NKIXIʼIJ TA KIʼ YETZJON AWKʼË

RI NUʼIJ LE BIBLIA: «Naʼäy tiyaʼ ixkïn chkë ri nkʼaj chik chqä ma chanin ta kixtzjon apü» (Santiago 1:19). Rkʼë jbʼaʼ rït nawajoʼ chë awalkʼwal ma nkixiʼij ta kiʼ yetzjon awkʼë. Ye kʼa rchë nbʼanatäj riʼ, nkʼatzin nayaʼ axkïn chkë ronojel mul taq ryeʼ nkajoʼ yetzjon awkʼë. Tatjaʼ aqʼij rchë majun chʼaʼoj njeʼ chpan awachoch, ke riʼ ryeʼ ma xtkixiʼij ta kiʼ xtkiʼij chawä ri achkë kʼo pa kan (Santiago 3:18). We ryeʼ xtkitzʼët chë rït xa más yachapon, rkʼë jbʼaʼ ma kan ta xtkiʼij chawä ri kʼo pa kan. Ma tikʼo ta akʼuʼx kikʼë y chaq taqïl taʼij chkë chë kowan yeʼawajoʼ (Mateo 3:17; 1 Corintios 8:1).

RI ÜTZ NAʼÄN:

• Tayaʼ axkïn chkë awalkʼwal taq nkajoʼ yetzjon awkʼë

• Ronojel mul katzjon kikʼë awalkʼwal, ma xa xuʼ ta taq kʼo kʼayewal kilon

2 TATJAʼ AQʼIJ RCHË NQʼAX PAN AJOLON RI NKAJOʼ NKIʼIJ

RI NUʼIJ LE BIBLIA: «Ri winäq ri nuksaj rnaʼoj taq kʼo jun nuʼän o kʼo jun nusöl kan ütz xtuʼän chwäch» (Proverbios 16:20). Jantäq ma xa xuʼ ta rkʼë ri nkiʼij nitamaj achkë qäs nkinaʼ iwalkʼwal, rma ri qʼopojiʼ kʼojolaʼ, kʼo mul kʼo yekiʼij ri ma kan ta ya riʼ nkinaʼ. Le Biblia nuʼij reʼ: «We jun winäq nchʼö yän apü taq majanä tkʼoxaj jontir ri xbʼanatäj, xa majun ta rnaʼoj» (Proverbios 18:13). Rma riʼ ma chanin ta tpë iyowal (Proverbios 19:11).

RI ÜTZ NAʼÄN:

• Xa bʼa achkë nuʼij awalkʼwal chawä, tatjaʼ aqʼij rchë ma naqʼät ta rtzij nixta tkatäj ayowal chrij

• Tnatäj chawä achkë xanaʼ chqä achkë kʼo más rejqalen chawäch taq jnan wä ajnaʼ rkʼë ri awalkʼwal

3 TIYAʼ CHIWÄCH ACHKË RBʼANIK YEʼIQʼÏL IWALKʼWAL

RI NUʼIJ LE BIBLIA: «Rma riʼ walkʼwal, tayaʼ axkïn taq atat yaturpixabʼaj y ma tayaʼ ta qa kisamajxik ri naʼoj xkʼüt ateʼ chawäch» (Proverbios 1:8). Jehová pa kiqʼaʼ ri teʼej tataʼaj ryaʼon wä qa yekiqʼïl kalkʼwal. Che kaʼiʼ nkʼatzin nkikʼüt chkiwäch kalkʼwal chë nkʼatzin yenman tzij chqä chë ma nkiqasaj ta kiqʼij ri nkʼaj chik (Efesios 6:1-3). Ryeʼ nkitzʼët taq ri teʼej tataʼaj ma jnan ta rbʼanon kiwäch (1 Corintios 1:10). Rma riʼ, we kʼo jun ma jnan ta niquʼ chrij, ma titzjoj ta chkiwäch iwalkʼwal, rma ya riʼ xa xtuʼän chë ma xtjeʼ ta chik iqʼij chkiwäch.

RI ÜTZ NAʼÄN:

• Tiyaʼ chiwäch achkë rbʼanik yeʼiqʼïl iwalkʼwal

• We ma jnan ta niquʼ chrij ri rbʼanik yeʼitjoj iwalkʼwal, tatjaʼ aqʼij rchë nqʼax pan ajolon achkë rma ke riʼ nuquʼ akʼlaj

4 TICHʼOBʼOʼ ACHKË RBʼANIK YEʼITJOJ IWALKʼWAL

RI NUʼIJ LE BIBLIA: «Takʼutuʼ chwäch ri akʼal achkë bʼey kʼo chë nukʼwaj» (Proverbios 22:6). We rïx niwajoʼ yeʼitoʼ iwalkʼwal, kan tichʼobʼoʼ achkë rbʼanik yeʼitjoj chqä achkë rbʼanik yeʼiqʼïl (Salmo 127:4; Proverbios 29:17). Ri naqʼïl jun akʼal ma xa xuʼ ta ntel chë tzij nachʼäy, xa kan ntel chqä chë tzij natoʼ rchë nqʼax pa rjolon achkë rma kʼo jojun naqʼät chwäch (Proverbios 28:7). Chqä keʼatoʼ rchë nkiloqʼoqʼej Rchʼaʼäl Dios chqä rchë nqʼax pa kijolon ri naʼoj ye kʼo chpan (Salmo 1:2). Ke riʼ xtkitjoj kiconciencia rchë nkiʼän ri ütz (Hebreos 5:14).

RI ÜTZ NAʼÄN:

• Keʼatoʼ awalkʼwal rchë nkinmaj chë Dios kantzij kʼo chqä chë ütz nkikʼuqbʼaʼ kikʼuʼx chrij

• Keʼatoʼ rchë nkitamaj achkë riʼ ri ma ütz ta chqä achkë xketoʼö rchë ma yeqä ta chpan, achiʼel ri kʼo pa internet chqä pa redes sociales. Takʼutuʼ chkiwäch achkë rbʼanik nkitoʼ kiʼ chkiwäch ri xa nkajoʼ nkiʼän tzʼil taq bʼanobʼäl kikʼë