Tnatäj rxjayil Lot chawä

Lot chqä Abrahán, ri rtío, jnan wä ye kʼo chpan ri tinamït Canaán. Rma kan xekʼiyär kichkop, ma yerqʼiʼ ta wä chik akuchï ye kʼo wä. Rma riʼ, Abrahán xuʼij reʼ che rä Lot: «Ma ütz ta chik jnan nqjeʼ. Tabʼanaʼ utzil, tachaʼ akuchï nawajoʼ yabʼä wä y rïn xkibʼä chik jkʼan». Kan ütz rnaʼoj Abrahán, ¿tapeʼ?

Lot xtzʼët chë kʼo wä jun peraj ilew ri kan jaʼäl, rma kʼïy yaʼ chqä kʼïy qʼayis kʼo chwäch. Rma riʼ xchaʼ ri ilew riʼ chqä xkʼwaj äl rfamilia chriʼ, chunaqaj ri tinamït Sodoma. Pa rkʼisbʼäl, xbʼejeʼ kachoch chpan ri tinamït riʼ.

Chunaqaj Sodoma kʼo chqä ri tinamït Gomorra. Ri winäq riʼ kan itzel kinaʼoj. Rma riʼ, Jehová xuʼij chë xtchüp kiwäch. Pero Dios ma nrajoʼ ta wä chë Lot chqä rfamilia yekäm. Rma riʼ xertäq kaʼiʼ ángeles rchë xkibʼeʼij reʼ chkë: «¡Chanin! ¡Kixel äl chpan re tinamït reʼ! ¡Rma Jehová xtchüp rwäch!».

Pero Lot chqä rfamilia ma chanin ta xkiʼän riʼ. Rma riʼ, ri ángeles xkichäp äl chkiqʼaʼ y kan chanin xekesaj äl chpan ri tinamït riʼ. Ryeʼ xkiʼij reʼ chkë: «¡Chanin! ¡Kixanmäj äl rchë ma yixkäm ta, y ma kixtzuʼun ta chiwij! Si xtiʼän riʼ, xkixkäm».

Taq ryeʼ xeʼapon pa tinamït Zóar, Jehová xuʼän chë xpë qʼaqʼ pa rwiʼ Sodoma y Gomorra. Ri tinamït riʼ kan xchup kiwäch. Ri rxjayil Lot xtzuʼun chrij chqä xbʼeʼok jun estatua chë atzʼan. Pero Lot chqä rmiʼal ma xekäm ta. Rkʼë jbʼaʼ kan kowan xebʼison rma rxjayil Lot ma xnmaj ta tzij, pero kan ütz chqä xkinaʼ rma ryeʼ xkinmaj rtzij Jehová.