Jun kʼajol ri nunmaj rtzij Dios

Jacob kan ye kʼïy rkʼajol xejeʼ. Jun chkë ri más koʼöl ya riʼ José. Jacob más wä nrajoʼ José. ¿Achkë naquʼ rït chë xkinaʼ rnmal? Ryeʼ kan itzel xkinaʼ che rä. Kʼo jun qʼij, José xtzjoj chkë rnmal kaʼiʼ achïkʼ ri xeruʼän. Ryeʼ xkiquʼ chë ri achïkʼ riʼ yeʼel chë tzij chë jun qʼij xkexkeʼ na chwäch, rma riʼ más na chik itzel xkinaʼ che rä.

Kʼo jun qʼij, ri rnmal José najin wä yekiyuqʼuj kikarneʼl chunaqaj ri tinamït Siquem. Rma riʼ Jacob xtäq äl José rchë yebʼertzʼetaʼ rchʼalal. Taq xkitzʼët apü, ryeʼ xkiʼij: «Chriʼ xpë wä ri xa xuʼ nachkʼan. ¡Tqakamsaj!». Rma riʼ xkichäp chqä xkikʼäq qa chpan jun jül. Pero Judá, jun chkë rnmal, xuʼij: «Ma tikamsaj ta. Más ütz tqakʼayij äl». Y kan ya riʼ xkiʼän. Ryeʼ xkikʼayij äl chkë jojun achiʼaʼ aj Madián ri ye bʼenäq wä Egipto chë 20 raqän plata.

Chrij riʼ, ri rnmal José xkijuʼ rtzyaq chpan rkikʼel jun kʼsïkʼ, xkikʼwaj äl che rä kitat y xkiʼij reʼ che rä: «¿Ma rtzyaq ta akʼajol reʼ?». Jacob xquʼ chë jun chköp xkamsan José. Rma riʼ kowan xbʼison y majun ta wä jun nkowin nbʼuchiʼin.

Taq ri aj Madián xeʼapon Egipto, Potifar, jun achï ri kan kʼo rqʼij, xlöqʼ José rchë ntok rmos. Pero Jehová kʼo wä rkʼë José. Potifar xtzʼët chë José ütz nsamäj chqä chë ütz nakʼuqbʼaʼ akʼuʼx chrij. Rma riʼ, xyaʼ qa pa rqʼaʼ José jontir ri kʼo rkʼë.

Ri rxjayil Potifar xtzʼët chë José jaʼäl ntzuʼun chqä chë kʼo rchqʼaʼ. Rma riʼ chaq taqïl xuʼij che rä chë twär rkʼë. ¿Achkë xuʼän José? Ryä ma xrajoʼ ta chqä nuʼij wä reʼ che rä: «Manä, ya riʼ ma ütz ta. Ri wajaw rkʼuqbʼan rkʼuʼx chwij, y rït yït rxjayil. Si rïn yiwär awkʼë, xa xkimakun chwäch Dios».

Kʼo jun qʼij, ri rxjayil Potifar xrajoʼ chë José xwär rkʼë. Rma riʼ xchäp chë rtzyaq, pero José xanmäj äl. Taq Potifar xapon chrachoch, ri rxjayil xuʼij chë José xrajoʼ xchäp, pero ya riʼ ma tzij ta. Potifar xpë ryowal, rma riʼ xyaʼ José pa cárcel. Pero Jehová ma xmestaj ta qa José.