Jehová ma numestaj ta José

Taq José kʼo wä pa cárcel, ri faraón, rey rchë Egipto, xeruʼän jojun achïkʼ ri majun ta jun xkowin xbʼin achkë yeʼel chë tzij. Ya riʼ taq jun rmos ri faraón xuʼij che rä chë José nkowin nuʼij achkë yeʼel chë tzij rachïkʼ. Rma riʼ ri faraón chanin xtäq rkʼamarik José.

Ri faraón xuʼij reʼ che rä: «¿Yakowin rït naʼij achkë yeʼel chë tzij ri achïkʼ xinbʼän?». José xuʼij: «Chkipan siete jnaʼ, kan kʼïy rkïl wäy xtjeʼ Egipto. Chrij riʼ, siete jnaʼ xtjeʼ wayjal. Takanuj jun achï ri kʼo rnaʼoj rchë nukʼöl ri rkïl wäy riʼ, ke riʼ ri winäq ma xkekäm ta rma wayjal». Ri faraón xuʼij: «¡Rït xkatok ri achï riʼ! Jontir Egipto xtnmaj atzij. Xa xuʼ rïn xtjeʼ más nqʼij chawäch rït». ¿Achkë xtoʼö José rchë xtamaj achkë yeʼel chë tzij rachïkʼ ri faraón? Yë Jehová xtoʼö rchë.

Chkipan siete jnaʼ, José xkʼöl xa bʼa jaruʼ rkïl wäy xkowin. Chrij riʼ, xpë wayjal chwäch jontir le Rwachʼlew, achiʼel xuʼij ryä. Rma riʼ, ri winäq xeʼapon rkʼë rchë xkilöqʼ rkïl wäy. Taq Jacob, ri rtataʼ, xtamaj chë kʼo rkïl wäy Egipto, xertäq äl 10 rkʼajol rchë nkibʼeloqʼoʼ rkïl kiway.

Ri rkʼajol Jacob xeʼapon rkʼë José, y ryä chanin xtamaj kiwäch. Pero rnmal ma xkitamaj ta rwäch. Ryeʼ xexkeʼ chwäch José, kan achiʼel xrachkʼaj ryä taq kʼa kʼajol na. José xrajoʼ xtamaj si kʼa itzel na nkinaʼ che rä, rma riʼ xuʼij reʼ chkë: «Rïx xa xuʼ yïx petenäq rchë nitzʼët achkë rbʼanon ri tinamït». Ryeʼ xkiʼij: «¡Ma ke riʼ ta! Röj yoj aj Canaán y yoj wä 12 qachʼalal qiʼ, pero jun ya xkäm yän, y ri más koʼöl kʼo rkʼë qatataʼ». Rma riʼ José xuʼij: «Tikʼamaʼ pä ichaqʼ y kʼa riʼ xtinmaj ri niʼij». Chrij riʼ, ryeʼ xetzolin chkachoch.

Taq rfamilia Jacob xkʼis chik jmul kiway, ryä xertäq äl chik jmul rkʼajol Egipto. Re mul reʼ xkikʼwaj äl Benjamín, ri kichaqʼ. Rchë nutzʼët si rnmal kijalon chik kinaʼoj, José xrewaj rcopa ri bʼanon rkʼë plata chpan rcostal Benjamín y xqʼabʼaj chkij chë xkileqʼaj äl. Taq rmos José xkïl ri copa chpan rcostal Benjamín, ri rchʼalal kan xsach kikʼuʼx. Ryeʼ xkiʼij che rä José chë tbʼanaʼ xa bʼa achkë kikʼë, pero majun tbʼan ta che rä Benjamín.

Ya riʼ xkʼüt chwäch José chë rchʼalal ya kijalon wä chik kinaʼoj. Taq ma xköchʼ ta chik, xchäp oqʼej y xuʼij: «Rïn yïn José ri iwachʼalal. ¿Kʼa kʼäs na ntataʼ?». Ri rchʼalal ma nkinmaj ta wä ri najin nbʼanatäj. Rma riʼ José xuʼij: «Ma itzel ta tnaʼ iwan rma ri xiʼän chwä. Dios xirkʼäm pä aweʼ rchë rïx ma yixkäm ta. Pero, ¡jäx chanin!, tibʼekʼamaʼ ntataʼ».

Ri rchʼalal José xetzolin rchë xkibʼetzjoj che rä kitataʼ ri xbʼanatäj chqä rchë xkikʼwaj äl Egipto. ¡José chqä rtataʼ jnan chik jmul xejeʼ!