Ma xkiʼän ta ri xkiʼij

Jehová xuʼij reʼ che rä Moisés: «Kajoteʼ pä pa rwiʼ ri jyuʼ ri akuchï yïn kʼo wä rïn. Xtintzʼibʼaj nleyes chwäch abʼäj y xtinyaʼ chawä». Moisés xjoteʼ pa rwiʼ ri jyuʼ y xkanaj chriʼ 40 qʼij chqä 40 aqʼaʼ. Chriʼ, Jehová xtzʼibʼaj ri Diez Mandamientos chkiwäch kaʼiʼ tzʼaratzʼäq abʼäj y xyaʼ che rä Moisés.

Jbʼaʼ chrij riʼ, ri israelitas xkiquʼ chë Moisés ma xttzolin ta pä chik. Rma riʼ xkiʼij reʼ che rä Aarón: «¡Nqajoʼ chë kʼo jun nekʼwan bʼey chqawäch! ¡Tabʼanaʼ jun qadios!». Aarón xuʼij: «Tikʼamaʼ pä ri oro ri kʼo iwkʼë». Ryä xyaʼ ri oro riʼ pa qʼaqʼ y xuʼän jun aläj wakx. Ri winäq xkiʼij: «¡Re aläj wakx reʼ ya reʼ qadios, ri xqresaj pä Egipto!». Xkiʼän nmaqʼij chqä xkichäp ryaʼik rqʼij ri aläj wakx ri bʼanon rkʼë oro. ¿Naquʼ rït chë kan itzel ri xkiʼän? Jaʼ, rma ri israelitas xkiʼij che rä Jehová chë xa xuʼ ryä xtkiyaʼ rqʼij. Pero ma najin ta wä nkiʼän ri xkiʼij.

Jehová xtzʼët ri najin wä nbʼanatäj. Rma riʼ xuʼij reʼ che rä Moisés: «Katzolin kikʼë awinaq, rma ma najin ta nkinmaj ntzij. Ryeʼ xa jun tyox najin nkiyaʼ rqʼij». Moisés xxleʼ pä pa rwiʼ ri jyuʼ y rkʼamon pä ri kaʼiʼ abʼäj ri xyaʼöx pä che rä.

Taq Moisés ya naqäj chik kʼo wä, xkʼoxaj chë ri winäq najin wä yebʼixan. Taq xapon, xtzʼët chë najin wä yexajö chqä najin wä nkiyaʼ rqʼij ri aläj wakx. Moisés xpë ryowal. Rma riʼ xerpaxij ri kaʼiʼ abʼäj pan ilew. Chrij riʼ, xchüp rwäch ri tyox y xuʼij reʼ che rä Aarón: «¿Achkë xkiʼij chawä rma riʼ xaʼän re itzelal reʼ?». Aarón xuʼij: «Ma tpë ta ayowal. Rït ataman achkë kinaʼoj ri winäq. Ryeʼ xkajoʼ jun kidios, rma riʼ rïn xinyaʼ ri oro pa qʼaqʼ y xel jun aläj wakx». Aarón kʼo ta chë ma ta xuʼän riʼ. Moisés xjoteʼ chik jmul pa rwiʼ ri jyuʼ y xtäj rqʼij chrij Jehová chë tkyuʼ kimak ri winäq.

Jehová xküy kimak ri israelitas ri nkajoʼ wä nkinmaj rtzij. Kan kowan wä rqʼij nkinmaj rtzij Jehová chqä Moisés, ¿tapeʼ?