Josué y ri gabaonitas

Ri nkʼaj chik tinamït ri ye kʼo Canaán xkitamaj achkë xbʼanatäj Jericó. Rma riʼ, ri reyes kichë ri tinamït riʼ xkitün kiʼ rchë nkiʼän chʼaʼoj rkʼë Israel. Pero ri winäq aj Gabaón kʼo chik jun ri xkiʼän. Xkiksaj äl tzyäq ri jarnäq chik, xkibʼetzʼetaʼ Josué y xkiʼij reʼ che rä: «Röj kʼa näj yoj petenäq wä. Qakʼoxan chrij Jehová y jontir ri rbʼanon pä pan iwiʼ rïx chlaʼ Egipto chqä chlaʼ Moab. Si niyaʼ ichiʼ chqë chë ma yojikamsaj ta, xtq·ok imos».

Josué xernmaj chqä xuʼij chkë chë ma xkerkamsaj ta. Pero oxiʼ qʼij chrij riʼ, Josué xnaʼej chë ri gabaonitas ma näj ta ye petenäq wä, xa kan ye aj Canaán. Rma riʼ, Josué xuʼij reʼ chkë: «¿Achkë rma xitzʼük tzij chqawäch?». Ryeʼ xkiʼij: «Rma qaxiʼin wä qiʼ. Qataman chë yë Jehová ri iDios ntoʼö pä iwchë. Tibʼanaʼ utzil, ma kojikamsaj ta». Josué xuʼän ri xuʼij, rma riʼ majun ta xuʼän chkë.

Jbʼaʼ tiempo chrij riʼ, cinco reyes aj Canaán chqä kisoldados xebʼä chkij ri gabaonitas. Josué chqä rsoldados jun aqʼaʼ xebʼiyïn rchë xekibʼetoʼ ri gabaonitas. Chkaʼn qʼij, ri chʼaʼoj xchapatäj nmaqʼaʼ yän. Ri cananeos xeʼanmäj äl, pero Jehová xuʼän chë xqä pa mamaʼ taq saqbʼöch pa kiwiʼ. Ya riʼ taq Josué xuʼij che rä Jehová chë tpabʼaʼ ri Qʼij. Majun bʼëy bʼanatajnäq ta ya riʼ. ¿Achkë rma Josué xkʼutuj ya riʼ? Rma rkʼuqbʼan wä rkʼuʼx chrij Jehová. Jehová xuʼän ri xkʼutuj Josué che rä. Ri qʼij riʼ ma xok ta qa aqʼaʼ kʼa taq ri israelitas xechʼakon chkij ri reyes aj Canaán chqä kisoldados.