Ana nukʼutuj jun ral che rä Jehová

Elcaná jun israelita ri ye kʼo wä kaʼiʼ rxjayil: Ana y Peniná. Pero ryä más wä nrajoʼ Ana. Peniná ye kʼïy wä ral, pero Ana ma yejeʼ ta wä ral. Rma riʼ, Peniná kowan wä nuyöqʼ Ana. Ronojel jnaʼ, Elcaná nukʼwaj wä rfamilia pa tinamït Siló rchë nkiyaʼ rqʼij Jehová chpan ri tabernáculo. Kʼo jun qʼij, taq ye kʼo wä chriʼ, Elcaná xtzʼët chë Ana kowan wä nbʼison. Rma riʼ xuʼij reʼ che rä: «Ma katoqʼ ta Ana, rïn yïn kʼo awkʼë chqä kowan yatinwajoʼ».

Jbʼaʼ chrij riʼ, Ana xbʼerbʼanaʼ orar ryonïl. Ryä kowan wä najin ntoqʼ chqä xuʼij che rä Jehová chë ttoʼ pä. Ryä xuʼij: «Jehová, si nayaʼ jun wal, xtinyaʼ chawä rchë nsamäj awkʼë jontir rkʼaslemal».

Ri sumo sacerdote Elí xtzʼët chë Ana najin wä ntoqʼ chqä najin wä nslon rchiʼ pero ma nkʼaxatäj ta ri nuʼij, rma riʼ xquʼ chë xa qʼabʼarel. Ana xuʼij: «Manä tat, rïn ma ntjon ta yaʼ. Xa kowan yibʼison. Rma riʼ najin yitzjon rkʼë Jehová». Elí xtzʼët chë xsach, rma riʼ xuʼij: «Xtyaʼöx ta kʼa chawä ri xakʼutuj che rä Jehová». Chrij riʼ, Ana ma xbʼison ta chik chqä xbʼä äl. Taq majanä tuʼän jun jnaʼ, ryä xbʼejeʼ jun ral y Samuel rbʼiʼ xyaʼ. ¡Xa xuʼ taquʼ ri kiʼkʼuxlal xnaʼ Ana!

Ana ma xmestaj ta ri xuʼij che rä Jehová. Taq Samuel ma xtzʼuman ta chik, xkʼwaj äl pa tabernáculo rchë xbʼesamäj chriʼ. Ryä xuʼij reʼ che rä Elí: «Xinkʼutuj re akʼal reʼ che rä Jehová. Komä nyaʼ che rä». Elcaná chqä Ana nkibʼetzʼetaʼ wä Samuel ronojel jnaʼ y nkikʼwaj wä  äl jun kʼakʼakʼ rtzyaq ri majun ta rqʼaʼ. Taq xqʼax ri tiempo, Jehová xuʼän chë Ana xejeʼ chik cinco ral, ye oxiʼ kʼojolaʼ y ye kaʼiʼ qʼopojiʼ.