Jehová nuyaʼ rchqʼaʼ Sansón

Ri israelitas jmul chik xa tyox xkiyaʼ kiqʼij, rma riʼ Jehová xyaʼ qʼij chë ri filisteos nkiyaʼ poqonal pa kiwiʼ. Pero ye kʼo wä jojun israelitas ri xkajoʼ Jehová, achiʼel Manóah. Ryä chqä rxjayil majun ta wä kalkʼwal. Kʼo jun qʼij, Jehová xtäq jun ángel rchë xbʼeruʼij reʼ che rä rxjayil Manóah: «Xtjeʼ jun awal ri xkerköl ri israelitas pa kiqʼaʼ ri filisteos. Ryä xtbʼeʼok jun nazareo». ¿Ataman rït ye achkë riʼ ri nazareos? Ya riʼ ri winäq ri yekismajij jojun leyes ri ma nkismajij ta ri nkʼaj chik israelitas, achiʼel chë ma ütz ta nkisokaj kiwiʼ.

Taq xqʼax ri tiempo, xaläx Sansón, ri rkʼajol Manóah. Taq xkʼïy, Jehová kowan rchqʼaʼ xyaʼ. ¡Ryä nkowin wä nukamsaj jun león rkʼë rqʼaʼ! Kʼo jmul, xa ryonïl xerkamsaj ye 30 filisteos. Rma riʼ ri filisteos itzel xkinaʼ che rä chqä xkajoʼ xkikamsaj. Kʼo jun aqʼaʼ, Sansón warnäq wä pa tinamït Gaza. Ri rkʼulel xebʼä akuchï kʼo wä rpuertas ri tinamït riʼ y xkiyoʼej chriʼ rchë nkikamsaj nmaqʼaʼ yän. Pero Sansón xkatäj chaqʼaʼ chqä xbʼä akuchï kʼo wä rpuertas ri tinamït. Ryä xresaj ri puertas riʼ, xyaʼ äl chrij y xbʼä kʼa pa rwiʼ jun jyuʼ ri kʼo naqaj che rä Hebrón.

Chrij riʼ, ri filisteos xebʼä rkʼë Dalila, ri rnovia Sansón, y xkiʼij reʼ che rä: «Kʼïy päq xtqayaʼ chawä si xtaʼij chqë achkë rma Sansón kowan rchqʼaʼ. Röj nqajoʼ nqachäp äl chqä nqayaʼ pa cárcel». Rma Dalila nrajoʼ wä ri päq riʼ, xuʼij chë xtuʼän ri xbʼix che rä. Pa naʼäy, Sansón ma nrajoʼ ta wä nuʼij che rä Dalila achkë rma kowan rchqʼaʼ. Pero, rma Dalila kan xtäj rqʼij chrij, Sansón xkos pa rqʼaʼ, y rma riʼ xuʼij: «Rïn majun bʼëy sokan ta nwiʼ rma yïn nazareo. Xa ta nsokäx nwiʼ, nkʼis wchqʼaʼ». Kan ma ütz ta xuʼän Sansón taq xuʼij jontir riʼ che rä Dalila, ¿tapeʼ?

Dalila chanin xbʼeruʼij reʼ chkë ri filisteos: «¡Ya ntaman chik achkë rma kowan rchqʼaʼ!». Ryä xuʼän chë Sansón xwär qa pa rwiʼ rchʼek y xskʼij jun winäq rchë xsokaj rwiʼ. Chrij riʼ Dalila kan kuw xuʼij: «¡Sansón, ri filisteos ye kʼo aweʼ!». Taq ryä xkʼastäj, xnaʼ chë majun ta wä chik rchqʼaʼ. Ri filisteos xkichäp äl, xkesaj rnaqʼ rwäch chqä xkiyaʼ pa cárcel.

Kʼo jun qʼij, kan pa mil filisteos xkimöl kiʼ pa rachoch Dagón ri kidios. Ryeʼ kan kuw nkiʼij wä reʼ: «Ri qadios xyaʼ Sansón pa qaqʼaʼ. Tiwesaj pä Sansón rchë nqtzeʼen chrij». Ryeʼ xkiyaʼ Sansón chukojöl kaʼiʼ mamaʼ taq columnas y xetzeʼen chrij. Sansón kan kuw xuʼij reʼ: «Tabʼanaʼ utzil Jehová, tayaʼ pä chik jmul wchqʼaʼ». Ryä ya xkʼïy wä chik jmul rwiʼ, rma riʼ rkʼë jontir rchqʼaʼ xnïm che kaʼiʼ columnas ri kʼo chpan ri jay riʼ. Ya riʼ taq ri jay xtzaq y xekäm jontir ri ye kʼo chriʼ. Sansón chqä xkäm.