Jehová nukʼüt chë yë ryä ri kʼaslïk Dios

Acab xok jun chkë ri más itzel taq reyes ri xejeʼ pa rwiʼ ri 10 ijatzul rchë Israel. Ryä xkʼleʼ rkʼë Jezabel, jun ixöq ri itzel rnaʼoj ri xa Baal nuyaʼ rqʼij. Acab y Jezabel xkiʼän chë ri winäq xa Baal xkiyaʼ rqʼij, chqä kʼïy rprofetas Jehová xekikamsaj. ¿Achkë xuʼän Jehová? Xtäq ri profeta Elías rkʼë Acab.

Elías xuʼij che rä Acab chë rma itzel rnaʼoj ma xtpë ta jöbʼ pa rwiʼ Israel. Más oxiʼ jnaʼ, ri jyuʼ majun xkʼïy ta pä chkiwäch rma riʼ xpë wayjal. Chrij riʼ, Jehová xtäq Elías rchë xbʼetzjon chik jmul rkʼë Acab. Ri rey xuʼij: «Rït xa xuʼ ma ütz ta nakʼäm pä chqij. Jontir ri najin nbʼanatäj amak rït». Elías xuʼij: «Ma nmak ta rïn chë majun ta jöbʼ. Ri jöbʼ ma petenäq ta rma rït xa Baal nayaʼ rqʼij. Keʼamoloʼ ri winäq chqä rprofetas Baal pa rwiʼ ri jyuʼ Carmelo, y tqatzʼetaʼ achkë riʼ ri kʼaslïk Dios».

Ri winäq xkimöl kiʼ pa rwiʼ ri jyuʼ Carmelo y Elías xuʼij reʼ chkë: «Rïx nkʼatzin nitzʼët achkë xtiyaʼ rqʼij. Si Jehová ya riʼ ri kʼaslïk Dios, tiyaʼ rqʼij; pero si yë Baal, yë ryä tiyaʼ rqʼij. Rma riʼ tqabʼanaʼ reʼ: ri 450 rprofetas Baal tkikamsaj jun achij wakx, tkiyaʼ pa rwiʼ siʼ chqä tkiskʼij kidios. Rïn chqä xtinkamsaj jun achij wakx, xtinyaʼ pa rwiʼ siʼ y xkichʼö rkʼë Jehová. Ri dios ri xttäq pä qʼaqʼ ya riʼ ri kʼaslïk Dios». Ri winäq kan ütz xkikʼoxaj riʼ.

Rma riʼ, ri rprofetas Baal xkiʼän ri xbʼix chkë chqä jun qʼij xkiskʼij kidios. Ryeʼ nkiʼij wä reʼ: «¡Baal, kojatoʼ pä!». Baal majun ta xuʼän, rma riʼ Elías xtzeʼen chrij chqä xuʼij: «Kan kuw tiskʼij, rkʼë jbʼaʼ xa warnäq y nkʼatzin chë kʼo jun nkʼason rchë». Ri rprofetas Baal xkiʼän riʼ kʼa taq ya ntok qa aqʼaʼ, pero majun xbʼanatäj ta.

Elías xkamsaj jun achij wakx, xyaʼ pa rwiʼ ri altar y xtïx kʼïy yaʼ pa rwiʼ. Chrij riʼ xuʼij reʼ che rä Jehová: «Tat Jehová, tabʼanaʼ chë ri winäq nkitzʼët chë yït rït ri kʼaslïk Dios». Taq Elías xkʼïs rtzij, Jehová xtäq pä qʼaqʼ chlaʼ chkaj rchë xtäj ri sacrificio. Ri winäq kan kuw xkiʼij: «¡Jehová ya riʼ ri kʼaslïk Dios!». Rma riʼ Elías xuʼij: «Ma tiyaʼ ta qʼij chë yeʼanmäj äl rprofetas Baal». Ri qʼij riʼ xekamsäx ri 450 rprofetas Baal.

Chrij riʼ, xpë jun sutzʼ pa rwiʼ ri mar. Elías xuʼij reʼ che rä Acab: «Petenäq jun mamaʼ jöbʼ. Kajoteʼ äl chpan achʼichʼ y jät chawachoch». Tapeʼ majun ta jöbʼ rbʼanon, ri qʼij riʼ kowan sutzʼ xpë, xpë kaqʼiqʼ chqä xpë jun mamaʼ jöbʼ. Acab xjoteʼ äl chpan rchʼichʼ y chanin xbʼä äl chrachoch. Jehová xuʼän chë Elías más chanin xkʼäq anin chwäch ri chʼichʼ. Pero, ¿xekʼis komä ri poqonal chwäch Elías? Tqatzʼetaʼ.