Jehová nukʼuqbʼaʼ rkʼuʼx Elías

Taq Jezabel xtamaj achkë xbʼanatäj kikʼë rprofetas Baal, kan xkatäj ryowal. Rma riʼ xtäq äl jun achï rchë xbʼeruʼij reʼ che rä Elías: «Chwaʼq xkakäm achiʼel xbʼanatäj kikʼë rprofetas Baal». Elías kowan xxiʼij riʼ, rma riʼ xanmäj äl pa desierto. Chriʼ xuʼän orar, ryä xuʼij: «Jehová, ma yikowin ta chik. Nwajoʼ yikäm». Elías kowan wä kosnäq, rma riʼ xwär qa chuxeʼ jun cheʼ.

Pero jun ángel xkʼasoj Elías y eqal xuʼij reʼ che rä: «Kakatäj y kawaʼ». Elías xtzʼët jun setesïk pan pa kiwiʼ meqʼän taq abʼäj chqä jun xar yaʼ. Taq xtäj riʼ, xwär qa chik jmul. Ri ángel xkʼasoj chik jmul chqä xuʼij reʼ che rä: «Kawaʼ, nkʼatzin awchqʼaʼ rchë xtaköchʼ ri bʼey xtaʼän». Rma riʼ, Elías xwaʼ chik jmul. Chrij riʼ, 40 qʼij chqä 40 aqʼaʼ xbʼiyïn kʼa taq xapon pa jyuʼ Horeb. Chriʼ xok chpan jun jül rchë xbʼewär. Jehová xuʼij reʼ che rä: «¿Achkë rma yït kʼo aweʼ Elías?». Elías xuʼij: «Ri israelitas ma najin ta nkiʼän ri xkitzüj chawä. Xkiwulaj awaltares chqä xekikamsaj aprofetas. Y komä nkajoʼ chqä yinkikamsaj rïn».

Jehová xuʼij: «Katel äl y kapaʼeʼ qa chwäch ri jyuʼ». Taq Elías xel äl, xpë jun mamaʼ kaqʼiqʼ; chrij riʼ, xpë jun mamaʼ slonel; y pa rkʼisbʼäl, jun qʼaqʼ. Chrij riʼ, Elías xkʼoxaj chë kʼo jun ri eqal xtzjon rkʼë. Rma riʼ xtzʼapij rpaläj rkʼë rtzyaq y xpaʼeʼ qa chuchiʼ ri jül. Jehová xkʼutuj che rä achkë rma xanmäj äl. Elías xuʼij: «Xuʼ chik rïn yïn kʼäs qa chkë aprofetas». Jehová xuʼij: «Ma ayonïl ta yït kʼo. Kʼa ye kʼo na ye 7,000 winäq pa tinamït Israel ri nkiyaʼ nqʼij rïn. Jät rkʼë Eliseo y taʼij che rä chë yë ryä xinchaʼ rchë ntok profeta pan akʼexel rït». Elías chanin xuʼän ri xuʼij Jehová che rä. ¿Naʼij rït chë Jehová chqä xkaturtoʼ rït si xtanmaj rtzij? Jaʼ, xkaturtoʼ. Komä tqatzʼetaʼ jun ri xbʼanatäj taq majun ta wä jöbʼ pa rwiʼ Israel.