Jun ajbʼanöy chʼaʼoj chqä jun ti qʼopoj

Pa tinamït Siria kʼo wä jun ti qʼopoj israelita ri kʼa näj kʼo wä che rä rfamilia. Ri soldados aj Siria xkikʼwaj äl pa kitinamit. Ryä xbʼeʼok rmos rxjayil Naamán, jun ri kʼwayon bʼey chkiwäch ri soldados. Y xa xuʼ wä ti qʼopoj riʼ nuyaʼ wä rqʼij Jehová chriʼ.

Naamán kʼo wä jun itzel yabʼil chrij rchʼakul ri kowan wä ntiʼon. Ri qʼopoj nrajoʼ wä nutoʼ, rma riʼ xuʼij reʼ che rä rxjayil Naamán: «Rïn ntaman rwäch jun achiʼ ri nkowin nutoʼ awachjil. Pa tinamït Israel kʼo Eliseo, jun rprofeta Jehová. Ryä xtkowin xtqʼomaj».

Ri ixöq xtzjoj che rä Naamán ri xbʼix che rä. Ryä xa bʼa achkë wä nrajoʼ nuʼän rchë nkʼachöj, rma riʼ xbʼä Israel chrachoch Eliseo. Naamán xquʼ chë Eliseo kan achkë na rbʼanik nukʼül apü. Pero Eliseo xa xuʼ rmos xtäq äl rchë xkʼül apü chqä rchë xuʼij reʼ che rä: «Jät pa raqän yaʼ Jordán y katok siete mul chpan. Ke riʼ xkakʼachöj».

Naamán ma xqä ta chwäch ri xuʼän Eliseo. Rma riʼ xuʼij: «Rïn xinquʼ chë re profeta reʼ xtskʼij rDios chqä xtsloj rqʼaʼ pa nwiʼ rchë yirqʼomaj. Pero xa pa raqän yaʼ Jordán xirtäq wä. Pa qatinamit Siria ye kʼo más jaʼäl raqän taq yaʼ. ¿Achkë rma ma xirtäq ta chkipan ri raqän taq yaʼ riʼ?». Naamán xkatäj ryowal chqä xbʼä äl.

Ri rmos Naamán xetzjon rkʼë. Ryeʼ xkiʼij reʼ che rä: «Rït abʼin chë xtaʼän xa bʼa achkë nkʼatzin rchë yakʼachöj. Ri nukʼutuj re profeta reʼ chawä ma kwest ta. ¿Achkë rma ma naʼän ta?». Naamán xuʼän ri xkiʼij che rä, rma riʼ xbʼä pa raqän yaʼ Jordán y siete mul xok chpan. Taq xel pä pa rkʼisbʼäl mul, xel äl ri yabʼil chrij. Rma kowan kiʼ rkʼuʼx, xtzolin rkʼë Eliseo rchë xtyoxij che rä. Ryä xuʼij: «Komä ntaman chë Jehová ya riʼ ri kʼaslïk Dios». Taq Naamán xtzolin chrachoch, majun ta wä chik ryabʼil. Taq ti qʼopoj israelita xtzʼët Naamán, ¿achkë komä xnaʼ naquʼ rït?