Josías kan nuloqʼoqʼej rLey Dios

Josías xok rey rchë Judá taq 8 wä rjnaʼ. Chkipan ri qʼij riʼ, ri winäq yebʼä wä kikʼë ajqʼijaʼ chqä xa tyox nkiyaʼ kiqʼij. Taq Josías xuʼän 16 rjnaʼ, xrajoʼ xtamaj achkë rbʼanik nrajoʼ Jehová nyaʼöx rqʼij. Taq xuʼän 20 rjnaʼ, xerwulaj ri tyox chqä ri altares chpan ri tinamït. Y taq xuʼän 26 rjnaʼ, xchäp nuʼän rbʼanik rtemplo Jehová.

Ri sumo sacerdote Hilquías xrïl chpan ri templo ri rollo ri kʼo rLey Dios chpan. Rkʼë jbʼaʼ yë Moisés xtzʼibʼan ri rollo riʼ. Safán, ri ntzʼibʼan ri nuʼij ri rey, xkʼwaj äl ri rollo che rä Josías chqä xskʼij chwäch. Taq Josías xkʼoxaj ri nuʼij ri rollo, xtzʼët chë ri winäq kʼïy jnaʼ ma kinman ta rtzij Jehová. Rma riʼ, xuʼij reʼ che rä Hilquías: «Jehová ma kiʼ ta rkʼuʼx qkʼë. Katzjon rkʼë rchë nuʼij pä achkë nkʼatzin nqaʼän». Jehová xuʼij reʼ che rä ri profetisa Huldá: «Ri tinamït Judá yiryaʼon qa. Rma riʼ xtinyaʼ poqonal pa rwiʼ, pero Josías ma xtzʼët ta riʼ, rma ryä nusmajij nLey».

Taq Josías xkʼoxaj ri xuʼij Huldá, xbʼä pa templo chqä xermöl ri winäq. Chrij riʼ xskʼij rLey Jehová chkiwäch. Josías chqä ri winäq xkiyaʼ kichiʼ chë xtkinmaj rtzij Dios rkʼë ronojel kan.

Ri tinamït Judá ojer chik ma rbʼanon ta wä ri Pascua. Pero Josías xskʼij chpan ri Ley chë nkʼatzin nbʼan riʼ ronojel jnaʼ. Rma riʼ xuʼij reʼ chkë ri winäq: «Xtqaʼän ri Pascua rchë nqayaʼ rqʼij Jehová». Rma riʼ Josías xuʼij chë tbʼan ri nkʼatzin rchë yebʼan kʼïy sacrificios chqä kekanüx achiʼaʼ rchë yebʼixan pa templo. Ya riʼ taq xkiʼän ri Pascua, y chrij riʼ xkiʼän ri Nmaqʼij kichë ri panes ri majun ta levadura kikʼë, ri xyalöj siete qʼij. Xa xuʼ wä pa rqʼij qa Samuel bʼanon jun Pascua achiʼel riʼ. Josías kan xloqʼoqʼej rLey Dios. ¿Y rït? ¿Nqä chawäch natamaj chrij Jehová?