Ri muros ri kʼo chrij Jerusalén

Taq majanä tyak rmuros Jerusalén, Nehemías kʼo wä Susa, jun tinamït ri kʼo Persia. Ryä jun israelita ri nsamäj wä rkʼë ri rey Artajerjes. Kʼo jun qʼij, ri rchʼalal Nehemías ri petenäq Judá xbʼeruʼij reʼ che rä: «Ri qawinaq nxiʼin kij, rma rmuros chqä rpuertas Jerusalén ri xkitzʼlaʼ ri babilonios majanä tbʼan kibʼanik». Taq xkʼoxaj riʼ, Nehemías kowan xbʼison. Ryä nrajoʼ wä ntoʼon, rma riʼ xuʼän orar che rä Dios rchë ri rey nuyaʼ qʼij che rä nbʼä Jerusalén.

Kʼo jun qʼij, ri rey xtzʼët chë Nehemías xa nbʼison. Rma riʼ xuʼij: «Majun bʼëy yatintzʼeton ta ke laʼ. ¿Achkë xaʼän?». Nehemías xuʼij: «Rïn kowan yibʼison, rma ntinamit ma ütz ta rbʼanon». Ri rey xkʼutuj: «¿Achkë rbʼanik yatintoʼ?». Taq xkʼoxaj riʼ, Nehemías xuʼän orar pa ran. Chrij riʼ, xuʼij: «Tabʼanaʼ utzil, tayaʼ qʼij chwä yibʼä Jerusalén rchë yenyäk chik jmul ri muros». Ri rey xrajoʼ, chqä xyaʼ ri nkʼatzin che rä rchë ütz rwäch napon Jerusalén. Xuʼän chë xok gobernador pa rwiʼ Judá, y xspaj äl cheʼ che rä rchë nuʼän rpuertas ri tinamït.

Taq Nehemías xapon Jerusalén, xbʼertzʼetaʼ ri muros. Chrij riʼ xermöl ri sacerdotes chqä ri qʼatöy taq tzij, y xuʼij reʼ chkë: «Ya reʼ ma ütz ta rbʼanon. Nkʼatzin nqaʼän rbʼanik». Rma riʼ, ri israelitas xkichäp kiyakik ri muros.

Jojun kikʼulel yetzeʼen wä chkij chqä nkiʼij wä reʼ chkë: «Hasta jun zorro nkowin nuqasaj imuro». Pero ri israelitas ma xkiyaʼ ta kixkïn chkë chqä xkiyaʼ chë kisamaj. Rma riʼ xekowin xkiʼän chë ri muro más xjoteʼ.

Ya riʼ xuʼän chë ye kʼïy winäq ri jalajöj kitinamit xekatäj pä chkij ri judíos. Taq xkinaʼej riʼ, kowan xkixiʼij kiʼ. Pero Nehemías xuʼij: «Ma tixiʼij ta iwiʼ. Jehová kʼo qkʼë». Rma riʼ, xeryaʼ achiʼaʼ rchë yekichajij ri winäq ri najin yesamäj. Ri kikʼulel majun ta xekowin xkiʼän.

Ri muros chqä ri puertas xa pa 52 qʼij xkʼis kibʼanik. Rma riʼ, Nehemías xuʼän jun nmaqʼij. Ryä xerkʼäm pä Jerusalén ri levitas ri kitaman yebʼixan y xerjäch pa kaʼiʼ. Esdras xkʼwaj äl jun molaj y Nehemías xkʼwaj äl chik jun. Ryeʼ xejoteʼ pa rwiʼ ri muro chkipan ri escaleras ri kʼo akuchï kʼo wä ri Puerta de la Fuente. Chrij riʼ, ri kaʼiʼ molaj riʼ xkijäch äl kiʼ chqä xebʼä äl pa rwiʼ ri muro kʼa taq xkibʼemoloʼ kiʼ pa templo. Ryeʼ kikʼwan wä trompetas, címbalos chqä arpas, y najin wä yebʼixan che rä Jehová. Ri achiʼaʼ, ixoqiʼ chqä ri akʼalaʼ xekiʼän sacrificios che rä Jehová y xkiʼän ri nmaqʼij. Kan kowan wä kiʼ kikʼuʼx, rma riʼ kʼa näj xkʼaxatäj wä kichʼaʼäl.