Jesús nukʼasoj Lázaro

Jesús ye kʼo wä ye oxiʼ ramigos chriʼ Betania ri kichʼalal kiʼ: Lázaro, María chqä Marta. Kʼo jun qʼij, taq Jesús kʼo wä jkʼan chik che rä ri raqän yaʼ Jordán, María y Marta xkitäq rbʼixik reʼ che rä: «Lázaro kowan yawaʼ. Tabʼanaʼ utzil, kapë yän jbʼaʼ». Pero Jesús ma xbʼä ta ri qʼij riʼ, xyoʼej na kaʼiʼ qʼij. Chrij riʼ, xuʼij reʼ chkë rtzeqelbʼëy: «Joʼ Betania. Lázaro warnäq y rïn xkibʼä rchë xtinkʼasoj». Ri apóstoles xkiʼij: «Si Lázaro warnäq, xtkʼachöj che rä ryabʼil». Ya riʼ taq Jesús xuʼij: «Lázaro xkäm».

Taq Jesús xapon Betania, Lázaro kajiʼ chik qʼij kamnäq. Ye kʼïy winäq najin wä nkikʼuqbʼaʼ kikʼuʼx Marta chqä María. Taq Marta xkʼoxaj chë Jesús xapon, xbʼä rchë nbʼetzjon rkʼë. Ryä xuʼij: «Ajaw, xa ta yït kʼo aweʼ, nxbʼal ma ta xkäm». Jesús xuʼij: «Axbʼal xtkʼastäj na pä. ¿Nanmaj rït ya riʼ Marta?». Ryä xuʼij: «Rïn ntaman chë xtkʼastäj ri qʼij taq xkekʼasöx ri kamnaqiʼ». Ya riʼ taq Jesús xuʼij: «Rïn yikʼason kichë ri kamnaqiʼ chqä rïn yiyaʼö kʼaslemal».

Chrij riʼ, Marta xbʼeruʼij reʼ che rä María: «Jesús kʼo chik aweʼ». María chanin xbʼä akuchï kʼo wä Jesús, y ri winäq xkitzeqelbʼej äl. Taq xapon rkʼë, María xxkeʼ qa y xchäp oqʼej. Ryä xuʼij: «Ajaw, xa ta yït kʼo aweʼ, qaxbʼal ma ta xkäm». Jesús xtzʼët chë María kowan najin nbʼison, rma riʼ ryä chqä xchäp oqʼej. Taq ri winäq xkitzʼët chë Jesús xoqʼ, xkiʼij: «Kan qʼalaj chë Jesús kowan xrajoʼ Lázaro». Jojun chik xkiʼij: «¿Achkë rma ma xtoʼ ta ramigo?». ¿Achkë xtuʼän Jesús komä?

Jesús xbʼä akuchï muqun wä Lázaro, ri tzʼapäl wä rkʼë jun abʼäj. Ryä xuʼij: «Tiwesaj le abʼäj». Marta xuʼij: «Rkʼë jbʼaʼ ya kʼo chik rxlaʼ, rma kajiʼ chik qʼij kamnäq». Tapeʼ ke riʼ, xkesaj ri abʼäj y Jesús xuʼän orar. Ryä xuʼij: «Tat, matyox rma yinakʼoxaj. Rïn ntaman chë ronojel mul yinakʼoxaj. Pero kuw yitzjon rchë ri winäq nkinmaj chë rït xataqö pä wchë». Chrij riʼ kuw xuʼij: «¡Lázaro, katel pä!». Chaq kʼateʼ, Lázaro, ri psïl wä pa tzyäq, xel pä. Jesús xuʼij chik: «Tiwesaj le tzyäq chrij rchë nkowin nbʼiyïn».

Ye kʼïy xkikʼuqbʼaʼ kikʼuʼx chrij Jesús rma xkitzʼët ri xbʼanatäj. Pero jojun chik xebʼä kikʼë ri fariseos rchë xkibʼetzjoj chkë. Kan chpan qa ri qʼij riʼ, ri fariseos xkikanuj rbʼanik rchë nkikamsaj Lázaro chqä Jesús. Judas Iscariote, jun chkë ri apóstoles, pan ewäl xbʼä kikʼë ri fariseos y xuʼij reʼ chkë: «¿Jaruʼ nitöj chwä si yixinkʼwaj rkʼë Jesús?». Xkitzüj 30 raqän plata che rä. Judas xrajoʼ chkiwäch, rma riʼ xkanuj rbʼanik rchë xjäch Jesús pa kiqʼaʼ.