Ri visiones ri xtzʼët Juan

Taq ri apóstol Juan yaʼon wä pa isla rchë Patmos, Jesús xuʼän chë xtzʼët 16 visiones chrij ri xtbʼanatäj chqawäch apü. Chkipan ri visiones riʼ, Juan xtzʼët taq xtchʼajchʼobʼëx rbʼiʼ Jehová, taq xtpë Rqʼatbʼäl Tzij chqä taq xtbʼan ri nrajoʼ ryä chwäch le Rwachʼlew achiʼel rbʼanon chlaʼ chkaj.

Chpan jun visión, Juan nutzʼët Jehová ri tzʼyül chpan rtrono chlaʼ chkaj. Chrij ri trono ye kʼo 24 achiʼaʼ ri säq kiwiʼ ri kiksan säq taq tzyäq chqä jun corona ri bʼanon rkʼë oro. Rkʼë ri trono nqʼajan achiʼel ta qlojay y yeʼel achiʼel ta rayos chrij. Ri 24 achiʼaʼ yexkeʼ chwäch Jehová chqä nkiyaʼ rqʼij. Chpan jun chik visión, Juan yertzʼët ye kʼïy winäq ri jalajöj kijatzul chqä kichʼaʼäl ri nkiyaʼ rqʼij Jehová. Ri Aläj Karneʼl —ri ya riʼ Jesús— yeryuqʼuj chqä yerkʼwaj rkʼë yaʼ ri nuyaʼ kʼaslemal. Chpan jun chik visión, Jesús ntok Rey chqä nuqʼät tzij chlaʼ chkaj kikʼë ri 24 achiʼaʼ. Chpan ri visión ri npë chrij riʼ, Juan nutzʼët chë Jesús nuʼän chʼaʼoj rkʼë ri Dragón —ri ya riʼ Satanás— chqä kikʼë ri demonios. Jesús yeresaj pä chlaʼ chkaj chqä yerkʼäq pä chwäch le Rwachʼlew.

Chrij riʼ, Juan nutzʼët jun jaʼäl visión: ri Aläj Karneʼl chqä ri 144,000 ye paʼäl pa jyuʼ Sion chlaʼ chkaj. Ryä chqä nutzʼët jun ángel ri bʼenäq pa rwiʼ le Rwachʼlew ri nuʼij: «Tinmaj rtzij Dios chqä tiyaʼ rqʼij».

Chpan jun chik visión, ryä nutzʼët ri Armagedón. Chpan ri chʼaʼoj riʼ, Jesús chqä r·ángeles yekichʼäk ri winäq ri ye kʼo pa rqʼaʼ Satanás. Chpan rkʼisbʼäl visión, Juan nutzʼët chë ri ye kʼo chkaj chqä chwäch le Rwachʼlew chaq jun chik kibʼanon. Ryä chqä nutzʼët taq nchup rwäch Satanás chqä rwinaq. Chlaʼ chkaj chqä chwäch le Rwachʼlew, majun ta chik jun ri xtbʼanö tzʼil che rä rbʼiʼ Jehová y xa xuʼ ryä xtyaʼöx rqʼij.