Rtzij ri Molaj Ukʼwäy Bʼey

Qachʼalal:

Jontir ri nqyaʼö rqʼij Jehová kowan nqaloqʼoqʼej le Biblia, ri Rchʼaʼäl. Röj qayaʼon chwäch qan chë jontir ri nuʼij le Biblia kantzij xbʼanatäj, chë nqrtoʼ chpan qakʼaslemal chqä chë nukʼüt chë Jehová kowan nqrajoʼ (Salmo 119:105; Lucas 1:3; 1 Juan 4:19). Röj kan nqarayij yeqatoʼ ri nkʼaj chik rchë nkitamaj ri naʼoj ye kʼo chpan Rchʼaʼäl Dios. Rma riʼ, xbʼan re libro reʼ: Ri ntamaj chpan le Biblia. Tqatzʼetaʼ achkë rbʼanik bʼanon pä che rä.

Re libro reʼ bʼanon pä chkë ri akʼalaʼ. Pero xkertoʼ chqä ri winäq ri nkajoʼ nkitamaj más chrij le Biblia. Y, rma le Biblia bʼanon pä chkë jontir winäq, jontir kan kʼïy xtqatamaj qa taq xtqanukʼuj ri nukʼüt qa chqawäch, rma ya riʼ xtqrtoʼ rchë kiʼ qakʼuʼx xtqaʼän chpan qakʼaslemal.

Jontir ri nutzjoj re libro reʼ chpan le Biblia lesan wä pä, y nutzjoj ri bʼanatajnäq pä kikʼë ri winäq kan xa xuʼ xebʼan rma Dios. Re libro reʼ bʼanon pä chë ma kʼayewal ta nqʼax pan ajolon ri ntzjöx chpan. Nchapatäj pä rkʼë ri xuʼän Dios taq xuʼän le Rwachʼlew y nbʼekʼis rkʼë ri rkʼisbʼäl ntzjöx chpan le Biblia.

Chqä re libro reʼ bʼanon pä chë taq jun winäq xtskʼij rwäch chqä xkertzʼët ri achbʼäl, xtnaʼ chë kan achiʼel ta najin nbʼanatäj ri najin nuskʼij rwäch, y xtnaʼ ri xkinaʼ ri winäq ri xejeʼ ojer.

Re libro reʼ nqrtoʼ rchë nqatzʼët chë le Biblia ntzjon chkij winäq ri kantzij xejeʼ: ri xkinmaj rtzij Jehová chqä ri ma xkinmaj ta rtzij. Y nqrtoʼ rchë kʼo nqatamaj qa chkij ri winäq riʼ (Romanos 15:4; 1 Corintios 10:6). Re libro reʼ jachon pa 14 peraj. Pa naʼäy chkë re peraj reʼ yaʼon pä jojun naʼoj ri nqatamaj chkipan ri peraj.

Si rït yït teʼej o tataʼaj, rkʼë jbʼaʼ ütz naskʼij jun capítulo chkiwäch ri akʼalaʼ y jnan nitzʼët ri achbʼäl ye kʼo pä rchë nitzjoj achkë nitamaj qa chrij. Chrij riʼ, ütz niskʼij chpan le Biblia ri peraj akuchï lenäq wä pä ri capítulo riʼ. Keʼatoʼ ri akʼalaʼ rchë nkitzʼët chë chpan le Biblia lesan wä pä jontir ri najin nkitamaj. Ke riʼ chqä ütz nbʼan rkʼë xa bʼa achkë winäq rchë nutzʼët achkë nukʼüt le Biblia.

Nqajoʼ chë re libro reʼ xkertoʼ ri akʼalaʼ, ri qʼopojiʼ kʼojolaʼ chqä ri kʼo chik kijnaʼ rchë nkitamaj ri nukʼüt Rchʼaʼäl Dios chqä rchë nkismajij chpan kikʼaslemal. Ke riʼ, ryeʼ chqä xkekowin xtkiyaʼ rqʼij Jehová y xkeʼok chpan rfamilia.