TJONÏK 20
¿Achkë rubʼanik yebʼan ri samaj pa congregación?
Jehová kan pa rubʼeyal nuʼän che rä jontir (1 Corintios 14:33). Rma riʼ kan ya riʼ chqä najowatäj chrij rutinamit. ¿Achkë rubʼanik yebʼan ri samaj pa congregación? ¿Achkë rubʼanik nqtoʼon röj rchë kan pa rubʼeyal nbʼan jontir?
1. ¿Achkë ukʼwayon bʼey pa ruwiʼ ri congregación?
«Cristo ya riʼ ri jolomäj pa ruwiʼ ri congregación» (Efesios 5:23). Jesús nutzʼët pä chlaʼ chkaj achkë samaj najin yebʼan chpan rutinamit Jehová. Ryä xchaʼ ri «utziläj samajel ri kan kʼo runaʼoj», ntel chë tzij, jun molaj ukʼwäy bʼey ri kan kʼïy chik junaʼ kiyaʼon pä ruqʼij Jehová. Ryeʼ chqä nbʼix Molaj Ukʼwäy Bʼey chkë (taskʼij ruwäch Mateo 24:45-47). Ri Molaj Ukʼwäy Bʼey, ya riʼ ukʼwayon bʼey chwäch rutinamit Dios, kan achiʼel xkiʼän ri apóstoles chqä ri ukʼwäy taq bʼey ri xejeʼ Jerusalén pa naʼäy siglo (Hechos 15:2). Ye kʼa ma yë ta ri achiʼaʼ riʼ ye kʼo pa ruwiʼ rutinamit Dios, rma ryeʼ nkikanuj rutoʼik Jehová chpan Ruchʼaʼäl chqä nkinmaj rutzij Jesús.
2. ¿Achkë samaj nkiʼän ri ukʼwäy taq bʼey?
Ri ukʼwäy taq bʼey —achiʼaʼ ri kan kʼïy chik junaʼ kiyaʼon pä ruqʼij Dios— nkikʼüt ri naʼoj ye kʼo chpan le Biblia chqä nkikʼuqbʼaʼ kikʼuʼx ri ye kʼo chpan ri congregación. Ri achiʼaʼ riʼ majun ta ntoj chkë. Pa rukʼexel riʼ, ryeʼ kan rkʼë ronojel kan nkiʼän ri samaj riʼ y ma rma ta chë kʼo nkajoʼ nkichʼäk (1 Pedro 5:1, 2). Ri ukʼwäy taq bʼey yetoʼöx kimä ri toʼonelaʼ. Ryeʼ chqä yebʼeʼok ukʼwäy taq bʼey we nkiʼän jontir ri najowatäj.
Ri Molaj Ukʼwäy Bʼey yeruchaʼ jojun ukʼwäy taq bʼey rchë yekibʼechʼaʼej ri congregaciones. Ryeʼ nkiyaʼ kitoʼik ri qachʼalal chqä nkikʼuqbʼaʼ kikʼuʼx. Chqä, yekichaʼ jojun achiʼaʼ rchë yeʼok ukʼwäy taq bʼey chqä toʼonelaʼ we nkitzʼët chë najin chik nkiʼän jontir ri najowatäj (1 Timoteo 3:1-10, 12; Tito 1:5-9).
3. ¿Achkë kisamaj jontir ri Testigos chpan ri congregación?
Jontir ri ye kʼo pa congregación nkiyaʼ «ruqʼij rubʼiʼ Jehová» chkipan ri qamoloj. Chqä nkiʼän riʼ taq nkitzjoj le Biblia chkë ri winäq, xa bʼa jaruʼ tiempo yekowin chkijujnal (taskʼij ruwäch Salmo 148:12, 13).
TQATAMAJ MÁS CHRIJ RE NAʼOJ REʼ
Tqatzʼetaʼ achkë rubʼanik nukʼwaj bʼey Jesús chqawäch, achkë rubʼanik nkikʼän kinaʼoj ri ukʼwäy taq bʼey chrij y achkë ütz nqaʼän röj rchë nqtoʼon rkʼë Jesús chqä kikʼë ri ukʼwäy taq bʼey.
4. Jesús jun ukʼwäy bʼey ri kan jaʼäl runaʼoj
Tiskʼij ruwäch Mateo 11:28-30 y titzʼetaʼ achkë nuʼij Jesús chqë. Chrij riʼ kixtzjon chrij reʼ:
¿Achkë nrajoʼ Jesús chë nqanaʼ röj rma ri rubʼanik nukʼwaj bʼey chqawäch?
¿Achkë rubʼanik nkikʼän kinaʼoj ri ukʼwäy taq bʼey chrij Jesús? Titzʼetaʼ ri VIDEO.
Le Biblia kan chöj nuʼij achkë rubʼanik kʼo chë nkiʼän che rä kisamaj ri ukʼwäy taq bʼey.
Tiskʼij ruwäch Isaías 32:2 chqä 1 Pedro 5:1-3, y kixtzjon chrij reʼ:
Jesús kan jaʼäl runaʼoj xuʼän kikʼë jontir, ¿achkë nanaʼ rït taq natzʼët chë ri ukʼwäy taq bʼey nkitäj kiqʼij rchë ke riʼ chqä kinaʼoj nkiʼän?
¿Achkë nkʼaj chik rubʼanik nkikʼän kinaʼoj ri ukʼwäy taq bʼey chrij Jesús?
5. Ri ukʼwäy taq bʼey kan nkiʼän ri nkikʼüt
¿Achkë rubʼanik nrajoʼ Jesús chë ri ukʼwäy taq bʼey nkitzʼët ri samaj nkiʼän? Titzʼetaʼ ri VIDEO.
Jesús kan chöj xuʼij achkë kinaʼoj kʼo chë nkiʼän ri qachʼalal ri ye ukʼwayon bʼey chqawäch pa congregación. Tiskʼij ruwäch Mateo 23:8-12 y kixtzjon chrij reʼ:
¿Achkë kinaʼoj kʼo chë nkiʼän ri ukʼwäy taq bʼey nuʼij le Biblia? ¿Naʼij rït chë ri ukʼwäy taq bʼey pa taq religiones nkismajij ri naʼoj riʼ?
Ri ukʼwäy taq bʼey kan nkitäj kiqʼij rchë más junan nuʼän kiwäch rkʼë Jehová chqä yekitoʼ ki-familia rchë nkiʼän ya riʼ chqä.
Ri ukʼwäy taq bʼey nkiquʼ kij jontir ri ye kʼo chpan ri congregación.
Ri ukʼwäy taq bʼey kan nkiyaʼ kan chutzjoxik le Biblia.
Ri ukʼwäy taq bʼey nkikʼüt Ruchʼaʼäl Dios chqawäch, yetoʼon rkʼë rujosqʼixik ri Salón chqä nkiʼän nkʼaj chik samaj.
6. Röj nqtoʼon kikʼë ri ukʼwäy taq bʼey
Le Biblia nuʼij achkë rma kʼo chë nqtoʼon kikʼë ri ukʼwäy taq bʼey. Tiskʼij ruwäch Hebreos 13:17 y kixtzjon chrij reʼ:
¿Achkë rma le Biblia nuʼij chë kʼo chë nqanmaj kitzij ri ye ukʼwayon bʼey chqawäch? ¿Naʼij rït chë kan nqʼax ruwiʼ ri najin nkʼutüx chqë? ¿Achkë rma?
Tiskʼij ruwäch Lucas 16:10 y kixtzjon chrij reʼ:
Tapeʼ ma kan ta achkë rubʼanik chqawäch röj ri nkikʼutuj ri ukʼwäy taq bʼey chqë, ¿achkë rma kʼo chë nqtoʼon kikʼë?
JOJUN WINÄQ NKIʼIJ REʼ: «Ma nkʼatzin ta yabʼä chpan jun religión».
¿Achkë utzil nqïl we nqayaʼ ruqʼij Dios kikʼë nkʼaj chik pa congregación?
RI XQATAMAJ QA
Jesús ya riʼ ukʼwayon bʼey pa ruwiʼ ri congregación. Ri ukʼwäy taq bʼey nkinmaj rutzij, y röj kan rkʼë ronojel qan nqtoʼon kikʼë, rma ryeʼ yojkichajij chqä kan nkiʼän ri nkikʼüt.
Tqakamluj ri xqatzʼët qa
¿Achkë ukʼwayon bʼey pa ruwiʼ ri congregación?
¿Achkë rubʼanik yetoʼon ri ukʼwäy taq bʼey pa congregación?
¿Achkë kisamaj jontir ri Testigos chpan ri congregación?
RCHË NATAMAJ MÁS
Tatzʼetaʼ achkë rubʼanik nkikʼüt ri Molaj Ukʼwäy Bʼey chqä ri ukʼwäy taq bʼey chë kowan yekajoʼ ri nkʼaj chik cristianos.
Nkikʼuqbʼaʼ kikʼuʼx qachʼalal taq yeyaʼöx kʼayewal pa kiwiʼ (4:22)
Tatamaj achkë samaj nkiʼän ri ukʼwäy taq bʼey ri yebʼechʼaʼen kichë ri congregaciones.
Ri rukʼaslemal jun ukʼwäy bʼey ri nbʼechʼaʼen kichë ri congregaciones (4:51)
Tatzʼetaʼ achkë rusamaj jun ixöq chpan ri congregación.
Tatzʼetaʼ achkë rubʼanik ri ukʼwäy taq bʼey nkikanuj rubʼanik rchë nkikʼuqbʼaʼ kikʼuʼx ri qachʼalal pa congregación.
«Ri ukʼwäy taq bʼey yojkitoʼ rchë kiʼ qakʼuʼx nqaʼän» (Ri Chajinel, 15 de enero, 2013)