TJONÏK 01
¿Achkë rubʼanik yaturtoʼ le Biblia pan akʼaslemal?
Kʼïy chqë röj nqakʼutuj qa chqawäch achkë rma kowan najin nqatäj poqän, achkë rma nqkäm o achkë xtbʼanatäj chqawäch apü. Chqä nqchʼobʼon chrij ri nqaqʼaxaj ronojel qʼij, achiʼel ri achkë rubʼanik nqachʼäk qarajil o achkë ütz nqaʼän rchë kiʼ qakʼuʼx nqjeʼ pa qa-familia. Ye kʼïy winäq kitzʼeton chë le Biblia yeruqʼalajsaj ri kʼutunïk riʼ chqä chë ye kʼo utziläj taq naʼoj chpan ri yekʼatzin chqë komä. ¿Naʼij rït chë le Biblia nkowin yerutoʼ ri winäq pa kikʼaslemal?
1. ¿Achkë jojun kʼutunïk yeruqʼalajsaj le Biblia?
Le Biblia yeruqʼalajsaj jojun kʼutunïk ri kan kʼo kejqalen achiʼel reʼ: ¿achkë rubʼanik xchapatäj pä ri kʼaslemal?, ¿achkë rma yojkʼäs?, ¿achkë rma ri winäq tapeʼ ütz kinaʼoj nkitäj poqän?, ¿achkë nbʼanatäj qkʼë taq nqkäm?, tapeʼ ye kʼïy winäq ma nqä ta chkiwäch ri chʼaʼoj, ¿achkë rma kowan chʼaʼoj kʼo? y ¿kʼo komä jun qʼij xtchup ruwäch le Ruwachʼulew? Le Biblia nuyaʼ kiqʼalajsaxik re kʼutunïk reʼ, y kan pa millón winäq ri kinukʼun ruwäch kan kiʼ kikʼuʼx kibʼanon rma ri xkitamaj chpan.
2. ¿Achkë rubʼanik nqrtoʼ le Biblia rchë kiʼ qakʼuʼx nqjeʼ?
Le Biblia nuyaʼ utziläj taq naʼoj chkë ri familias rchë kiʼ kikʼuʼx yejeʼ, nukʼüt chqawäch achkë ütz nqaʼän rchë ma kan ta nchʼpü qakʼuʼx chqä nqrtoʼ rchë kiʼ qakʼuʼx nqaʼän pa qasamaj. Taq junan xtqatjoj qiʼ chrij re wuj reʼ, rït xtatamaj achkë nuʼij le Biblia chrij riʼ chqä chkij nkʼaj chik naʼoj. Chqä xtatzʼët chë «ronojel ri tzʼibʼatäl qa [chpan le Biblia]» kan yekʼatzin chqë (2 Timoteo 3:16).
Re wuj reʼ ma Biblia ta. Ye kʼa nqrtoʼ rchë nqatamaj más ri naʼoj ye kʼo chpan. Rma riʼ ütz naskʼij kiwäch jontir ri textos ri ye kʼo chpan re wuj reʼ chqä yeʼajnamaj rkʼë ri xtatamaj.
TQATAMAJ MÁS CHRIJ RE NAʼOJ REʼ
Tqatzʼetaʼ achkë rubʼanik le Biblia yerutoʼon nkʼaj chik winäq, achkë ütz nqaʼän rchë kan xtqä chqawäch xtqaskʼij ruwäch y achkë utzil nqïl we kʼo jun winäq nqtoʼö rchë nqʼax chqawäch ri naʼoj ye kʼo chpan.
3. Le Biblia nukʼwaj qabʼey
Le Biblia kan achiʼel jun saqïl ri nusaqirsaj qabʼey, chqä nqrtoʼ rchë yë ri ütz nqachaʼ nqaʼän pa qakʼaslemal y rchë nqatamaj achkë xtbʼanatäj chqawäch apü.
Tiskʼij ruwäch Salmo 119:105 y kixtzjon chrij reʼ:
¿Achkë xquʼ chrij le Biblia ri xtzʼibʼan qa re salmo reʼ?
¿Achkë naquʼ rït chrij le Biblia?
4. Le Biblia yeruqʼalajsaj ri qakʼutunik
Jun ixöq ri kan pa junaʼ yerubʼanon pä kʼutunïk chwäch xtzʼët chë le Biblia yeruqʼalajsaj ri kʼutunïk riʼ. Titzʼetaʼ ri VIDEO y kixtzjon chrij reʼ:
¿Achkë kʼutunïk xeruʼän qa ri ixöq chwäch ri xqatzʼët pa video?
¿Achkë rubʼanik xtoʼ ryä ri xtjoj riʼ chrij le Biblia?
Le Biblia nuʼij chqë chë keqabʼanaʼ kʼutunïk. Tiskʼij ruwäch Mateo 7:7 y kixtzjon chrij reʼ:
¿Naʼij rït chë le Biblia yeruqʼalajsaj jojun chkë ri akʼutunik? ¿Achkë kʼutunïk?
5. Ri ütz nqaʼän rchë kan xtqä chqawäch xtqaskʼij ruwäch le Biblia
Ye kʼïy winäq kan nqä chkiwäch nkiskʼij ruwäch le Biblia chqä kan kʼïy naʼoj nkitamaj qa chpan. Titzʼetaʼ ri VIDEO y kixtzjon chrij reʼ:
¿Achkë xkiʼij jojun qʼopojiʼ kʼojolaʼ chpan ri video chrij ri naskʼij ruwäch wuj?
Tapeʼ ryeʼ ma nqä ta chkiwäch nkiskʼij ruwäch wuj, ¿achkë rma nqä chkiwäch nkiskʼij ruwäch le Biblia?
Ri naʼoj ye kʼo chpan le Biblia kan nkikʼuqbʼaʼ qakʼuʼx. Tiskʼij ruwäch Romanos 15:4 y kixtzjon chrij reʼ:
¿Nawajoʼ natamaj más chrij ri achkë rubʼanik nukʼuqbʼaʼ qakʼuʼx le Biblia?
6. Más nqʼax chqawäch ri nuʼij le Biblia we kʼo jun nqtoʼö
Tapeʼ ye kʼïy winäq nkiskʼij ruwäch le Biblia pa kiyonïl, kitzʼeton chë kʼo más nkitamaj qa taq kʼo jun ntoʼö kichë. Tiskʼij ruwäch Hechos 8:26-31 y kixtzjon chrij reʼ:
¿Achkë xtqtoʼö rchë xtqʼax chqawäch ri nuʼij le Biblia? (Titzʼetaʼ ri versículos 30 chqä 31).
Ri achï aj Etiopía xkʼatzin xtoʼöx rchë xqʼax ri Ruchʼaʼäl Dios chwäch. Komä chqä, ye kʼïy winäq kitzʼeton chë más nqʼax chkiwäch ri nuʼij le Biblia we kʼo jun ntoʼö kichë.
JOJUN WINÄQ NKIʼIJ REʼ: «Majun ta nkʼatzin wä chawä ri naskʼij ruwäch le Biblia».
¿Achkë naʼij rït? ¿Achkë rma?
RI XQATAMAJ QA
Le Biblia yeruyaʼ utziläj taq naʼoj chqë, yeruqʼalajsaj kʼutunïk ri kan kʼo kejqalen chqä kan nukʼuqbʼaʼ qakʼuʼx.
Tqakamluj ri xqatzʼët qa
¿Achkë naʼoj yeqïl chpan le Biblia?
¿Achkë jojun kʼutunïk yeruqʼalajsaj le Biblia?
Y rït, ¿achkë nawajoʼ natamaj chpan le Biblia?
RCHË NATAMAJ MÁS
Tatzʼetaʼ achkë rma ri naʼoj ye kʼo chpan le Biblia kan yekʼatzin na chqë komä.
«Ri utziläj taq naʼoj ye kʼo chpan le Biblia» (Ri Chajinel, núm. 1 2018)
Tatzʼetaʼ achkë rubʼanik le Biblia xtoʼ jun achï chwäch jun kʼayewal ri rlon pä taq kʼa koʼöl na.
Tatamaj achkë utziläj taq naʼoj nuyaʼ le Biblia chkë ri familias rchë kiʼ kikʼuʼx yejeʼ.
«12 naʼoj ri nkʼatzin chkë ri familias rchë kiʼ kikʼuʼx yejeʼ» (¡Despertad!, núm. 2 2018)
Ye kʼïy winäq kan suqʼun chkiwäch chrij ri achkë najin nqʼatö tzij pa ruwiʼ le Ruwachʼulew, ye kʼa tatzʼetaʼ achkë nuʼij le Biblia chrij riʼ.