TJONÏK 02

Ri nutzüj le Biblia chqë

Rchë na'än imprimir

Chwäch ronojel le Ruwachʼulew, ri winäq najin nkiqʼaxaj kʼayewal ri nuʼän chkë chë yebʼison, nchʼpü kikʼuʼx chqä nkitäj poqän. ¿Aqʼaxan rït jun chkë ri kʼayewal riʼ? Rkʼë jbʼaʼ najin natäj poqän rma jun yabʼil o rma xkäm jun awachʼalal, y rkʼë jbʼaʼ nakʼutuj qa chawäch we kʼo jun qʼij ma xtqïl ta chik jontir riʼ. Ri nuʼij le Biblia chrij riʼ kan nukʼuqbʼaʼ qakʼuʼx.

1. ¿Achkë nutzüj le Biblia?

Le Biblia nuqʼalajsaj achkë rma kowan kʼayewal chwäch le Ruwachʼulew chqä nuʼij chë xa jbʼaʼ chik apü xtchup kiwäch jontir ri kʼayewal riʼ. Ri nutzüj le Biblia rkʼë jbʼaʼ kan xtkʼuqbʼaʼ akʼuʼx (taskʼij ruwäch Jeremías 29:11, 12). Chqä nqrtoʼ rchë yeqaköchʼ ri kʼayewal y rchë kiʼ qakʼuʼx nqaʼän komä. Jontir ri nutzüj le Biblia nkikʼüt chqawäch chë chqawäch apü ronojel mul kiʼ qakʼuʼx xtqaʼän.

2. ¿Achkë nuʼij le Biblia chë xkebʼanatäj chqawäch apü?

Le Biblia nuʼij chë chqawäch apü «ma xtjeʼ ta chik kamïk, bʼis, oqʼej nixta tyowen» (taskʼij ruwäch Apocalipsis 21:4). Jontir ri nbʼanö chqë chë nqatäj poqän xtchup kiwäch, achiʼel ri mebʼaʼïl, ri ma pa rubʼeyal ta nbʼan qkʼë, ri yabʼil chqä ri kamïk. Le Biblia nuʼij chë ri winäq xkejeʼ chwäch jun kotzʼijaläj ulew ri akuchï majun bʼëy xkekäm ta chik.

3. ¿Achkë xkatoʼö rchë xtakʼuqbʼaʼ akʼuʼx chrij ri nutzüj le Biblia?

Ye kʼïy winäq nkiʼij chë chqawäch apü más bʼa ütz xtuʼän qakʼaslemal, ye kʼa ma kitaman ta we kantzij xtbʼanatäj. Rkʼë le Biblia ma nbʼanatäj ta riʼ, rma jontir ri nutzüj kan yebʼanatäj. Y röj kan xtqakʼuqbʼaʼ qakʼuʼx chrij riʼ we nqanukʼuj ruwäch «ri Ruchʼaʼäl Dios», ntel chë tzij, we nqatjoj qiʼ chrij le Biblia (Hechos 17:11). Ya riʼ xkatoʼö rchë xtatzʼët we ütz nanmaj ri nuʼij le Biblia chrij ri xtbʼanatäj chqawäch apü.

TQATAMAJ MÁS CHRIJ RE NAʼOJ REʼ

Tqanukʼuj kij jojun chkë ri utzil nutzüj le Biblia chqë. Tqatzʼetaʼ achkë rubʼanik ri utzil riʼ najin nukʼuqbʼaʼ kikʼuʼx ri winäq komä.

Jalajöj achbʼäl: achbʼäl ri nkikʼüt achkë najin nkiqʼaxaj ri winäq komä chqä achkë xkebʼanatäj chqawäch apü. Re achbʼäl reʼ yeqʼalajin pä pa xlan chqä.

4. Le Biblia nuʼij chë ma xtqatäj ta chik poqän chqä chë majun bʼëy xtqkäm ta chik

Tatzʼetaʼ jojun chkë ri utzil ri nutzüj le Biblia ri ye kʼo qa chuxeʼ. ¿Achkë chkë ri utzil riʼ más nqä chawäch rït? ¿Achkë rma?

Tiskʼij kiwäch jontir ri textos bíblicos y kixtzjon chrij reʼ:

¿Naʼij rït chë re textos reʼ nkikʼuqbʼaʼ qakʼuʼx? Kachʼobʼon chkij awachʼalal chqä awachiʼil, ¿xtkʼuqbʼaʼ komä kikʼuʼx ryeʼ chqä?

Taquʼ chë yït kʼo chwäch jun Ruwachʼulew ri ke reʼ rubʼanon:

MAJUN TA JUN...	JONTIR WINÄQ...
... xttäj poqän, xtrjïx nixta xtkäm (Isaías 25:8)	... xtkitzʼët che ri kichʼalal ri ye kamnäq äl xkekʼasöx pä chwäch le Ruwachʼulew (Juan 5:28, 29)
... xtyawäj ta (Isaías 33:24; 35:5, 6)	... ma xkeyawäj ta chik chqä xkeʼok chik jmul qʼopojiʼ kʼojolaʼ (Job 33:25)
... xtbʼan jun itzelal che rä (Isaías 32:16, 17)	... kan pa rukʼiyal kiway xtjeʼ, xtjeʼ jun jaʼäl kachoch chqä xtjeʼ kisamaj ri kan xtqä chkiwäch (Salmo 72:16; Isaías 65:21, 22)
... xttäj poqän kimä ri chʼaʼoj (Salmo 46:9)	... ma xtjeʼ ta chik chʼaʼoj chkikojöl (Salmo 37:11)
... xkepë itzel taq chʼobʼonïk pa rujolon o xkenatäj xa bʼaʼ achkë jun che rä ri xa xtkitzʼlaʼ (Isaías 65:17)	... ma xtkitäj ta chik poqän kimä ri kʼayewal chqä ma xkekäm ta chik (Salmo 37:29)

Jun ti akʼal ri yawaʼ wä ojer komä majun ta chik ruyabʼil chqä najin nuqʼetej ruteʼ.

Jun achï ri ti riʼj wä chik komä ya kʼajol chik jmul chqä rukʼwan verduras chpan jun carreta.

5. Ri nutzüj le Biblia nqrtoʼ rchë más ütz xtqbʼä pa qakʼaslemal

Ye kʼïy winäq komä ma kiʼ ta kikʼuʼx o katajnäq kiyowal kimä ri kʼayewal ye kʼo chwäch le Ruwachʼulew. Ye kʼo jojun kan nkitäj kiqʼij rchë nkisöl jontir ri kʼayewal riʼ. Tatzʼetaʼ achkë rubʼanik najin nukʼuqbʼaʼ kikʼuʼx ri winäq komä ri nutzüj le Biblia. Titzʼetaʼ ri VIDEO y kixtzjon chrij reʼ:

VIDEO: Nwajoʼ wä rïn chë junan qaqʼij tyaʼöx (4:07)

Achbʼäl rchë ri video Nwajoʼ wä rïn chë junan qaqʼij tyaʼöx. 1. Rafika najin numöl algodón kikʼë ruwinaq taq kʼa koʼöl na. 2. Rafika najin napon naʼäy mul chpan jun nimamoloj kichë ri testigos de Jehová. Kan ntel rukʼuʼx taq yerutzʼët ye kʼïy winäq kimolon kiʼ tapeʼ ma junan ta kijatzul.

Achiʼel xqatzʼët qa chpan ri video, ¿achkë xtzʼët ya Rafika ri ma pa rubʼeyal ta nbʼan kikʼë ri winäq?
Tapeʼ ri kʼayewal riʼ ma xkʼis ta, ¿achkë rubʼanik xtoʼ ryä ri xtjoj riʼ chrij le Biblia?

Ri nutzüj le Biblia nqrtoʼ rchë ma kan ta nqanaʼ bʼis chqä rchë kiʼ qakʼuʼx nqaʼän tapeʼ yeqaqʼaxaj kʼayewal. Tiskʼij ruwäch Proverbios 17:22 chqä Romanos 12:12, y kixtzjon chrij reʼ:

¿Naʼij rït chë ri nutzüj le Biblia yaturtoʼ rchë más ütz yabʼä pan akʼaslemal komä? ¿Achkë rma?

JOJUN WINÄQ NKIʼIJ REʼ: «Kan jaʼäl ri nutzüj le Biblia, ye kʼa ma qataman ta we kantzij xtbʼanatäj».

We kʼo jun rubʼanik nqatamaj chë kantzij xtbʼanatäj ri nutzüj le Biblia, ¿naʼij rït chë ütz nqanukʼuj ruwäch? ¿Achkë rma?

RI XQATAMAJ QA

Le Biblia nutzüj jun jaʼäl kʼaslemal chqë, y ya riʼ kan nukʼuqbʼaʼ qakʼuʼx chqä nqrtoʼ rchë yeqaköchʼ ri kʼayewal yeqïl komä.

Tqakamluj ri xqatzʼët qa

¿Achkë rma ri winäq nkʼatzin nkʼuqbʼäx kikʼuʼx?
¿Achkë nuʼij le Biblia chrij ri xtbʼanatäj chqawäch apü?
¿Achkë rubʼanik yaturtoʼ komä ri natamaj chë kʼo utzil xtqïl chqawäch apü?

Ri qʼij ri xakʼïs re tjonïk reʼ:

Ütz naʼän reʼ

Rchë nkʼaseʼ qa pan ajolon ri nutzüj le Biblia chqë, taskʼij chik jmul ri textos bíblicos ri xqatzʼët qa chpan re tjonïk reʼ.

Ütz chqä naʼän reʼ:

Nkʼaj chik ri ütz naʼän

RCHË NATAMAJ MÁS

Tatzʼetaʼ achkë rubʼanik yaturtoʼ ri utzil qayoʼen chqawäch apü rchë yeʼaköchʼ ri kʼayewal.

«¿Akuchï komä nqïl wä kʼuqbʼäl kʼuʼx?» (¡Despertad!, 22 de abril, 2004)

Tatzʼetaʼ achkë rubʼanik ri utzil qayoʼen chqawäch apü yerutoʼon jojun winäq ri kilon jun nüm yabʼil.

«¿Nkowin komä le Biblia nqrtoʼ rchë nqaköchʼ jun nüm yabʼil?» (Reʼ xtawïl pa jw.org)

Taq xtatzʼët re video reʼ, taquʼ che yït kʼo rkʼë a-familia chwäch ri Kotzʼijaläj Ulew ri nutzüj le Biblia.

Ntzʼët apü ri kʼakʼakʼ Ruwachʼulew (3:37)

Tatzʼetaʼ achkë rubʼanik xjalatäj rukʼaslemal jun winäq taq xtamaj chrij ri nutzüj le Biblia.

«Komä nnaʼ chë ma yïn ta rïn ri kʼo chë yijalö kinaʼoj ri winäq» (Ri Chajinel, 1 de julio, 2013)