Komä nnaʼ chë yikowin yentoʼ nkʼaj chik

RI NKʼASLEMAL RUBʼANON QA:

Rïn xinaläx chpan ri tinamït Acul, jun tinamït ri kʼo pa oeste che rä Guatemala. Ri nfamilia yetzjon wä ri chʼaʼäl ixil, ya riʼ jun chʼaʼäl maya. Tapeʼ xintamaj xitzjon pa kaxlän, rïn chqä xintamaj xitzjon ixil. Xikʼïy pä taq najin wä chʼaʼoj chpan ri tinamït Guatemala, ri xyalöj 36 junaʼ. Chpan ri chʼaʼoj riʼ kan ye kʼïy winäq ri yetzjon ixil xekäm.

Taq kʼa riʼ wä kajiʼ njunaʼ, ri nnmal ri kʼo wä siete rujunaʼ, xpaqʼapoʼ jun granada pa ruqʼaʼ taq najin wä netzʼan rkʼë. Ri xbʼanatäj xuʼän chwä chë ma xikowin ta chik xitzuʼun, ye kʼa nnmal xkäm. Rma riʼ, xikʼwäx Guatemala chpan jun institución ri akuchï yetoʼöx wä ri ma yekowin ta yetzuʼun. Chriʼ xikʼïy wä pä chqä xintamaj xinskʼij ruwäch wuj pa chʼaʼäl braille. Ri yesamäj wä chpan ri institución riʼ, ma nkiyaʼ ta wä qʼij chwä rchë yitzjon kikʼë nkʼaj chik akʼalaʼ, y rïn majun bʼëy xintamaj ta achkë rma. Ronojel mul nyonïl wä yïn kʼo, y kan nyoʼej wä chë nbʼeqä yän ri qʼij taq yibʼä wä kaʼiʼ ikʼ rkʼë nteʼ; ryä kowan wä yirajoʼ. Ye kʼa ryä xkäm taq rïn 10 wä njunaʼ. Kan poqän xnaʼ wan, rma xa xuʼ wä ryä ri kowan xirajoʼ.

Taq xuʼän 11 njunaʼ, rïn xitzolin chpan ntinamit y xijeʼ rkʼë nyijchʼalal chqä rufamilia. Ryeʼ xkiyaʼ ri nkʼatzin chwä, ye kʼa ma xekowin ta xkikʼuqbʼaʼ nkʼuʼx. Kʼo mul nbʼij wä che rä Dios: «¿Achkë rma xkäm nteʼ? ¿Achkë rma ximoyïr?». Ri winäq nkiʼij wä chwä chë ri xbʼanatäj wkʼë yë Dios xajowan. Rma riʼ xinquʼ chë Dios kan itzel runaʼoj chqä chë ma pa rubʼeyal ta ri yeruʼän. Xa ta rïn xikowin, xinkamsaj ta wiʼ.

Taq rïn ximoyïr, majun ta chik achkë xikowin xinbʼän nyonïl chqä xinnaʼ chë majun chik yikʼatzin wä. Taq rïn kʼa yïn akʼal na, kan kʼïy mul xbʼan tzʼil taq bʼanobʼäl wkʼë. Majun bʼëy xibʼä ta pa qʼatbʼäl tzij rchë xinbʼij achkë xbʼan chwä, rma nquʼ wä chë majun ta jun ri nchʼpü chwij. Ri winäq ma kan ta yetzjon wä wkʼë. Kan kowan xibʼison y ma nqä ta wä chi nwäch yijeʼ kikʼë nkʼaj chik winäq, rma majun ta achoq chrij xinkʼuqbʼaʼ wä nkʼuʼx.

¿ACHKË RUBʼANIK LE BIBLIA XJÄL NKʼASLEMAL?

Taq rïn 13 wä njunaʼ, jun kʼlaj Testigos xkitzjoj chrij Dios chwä taq xq·el chë recreo pan escuela. Jun maestra ri kan kowan wä nupoqonaj nwäch xuʼij chkë ryeʼ chë ketzjon wkʼë. Ryeʼ xkiʼij chwä chë le Biblia nuʼij chë ri moyiʼ xketzuʼun chqä chë xkekʼastäj na pä ri kamnaqiʼ (Isaías 35:5; Juan 5:28, 29). Kan nqä wä chi nwäch nkʼoxaj ri nkiʼij chwä, ye kʼa rma rïn ma rukʼulun ta wä chwä yitzjon kikʼë ri nkʼaj chik, majun ta wä nbʼij chkë. Tapeʼ ma kan ta achkë wä nbʼij chkë, ryeʼ ma xikʼo ta kikʼuʼx wkʼë, yinkichʼaʼej wä rchë nkikʼüt chrij le Biblia chi nwäch. Ryeʼ nkʼatzin wä yebʼiyïn 10 kilómetros pa taq juyuʼ rchë yeʼapon akuchï yïn kʼo wä rïn.

Taq nyijchʼalal xtzjoj chwä chkij ryeʼ, ryä xuʼij chwä chë ma kan ta achkë kʼo kikʼë, ye kʼa kan ütz kiweqon kiʼ. Kan xqʼalajin chë ryeʼ xinkajoʼ, rma nkiyaʼ wä jojun nspanik. Rïn nyaʼon wä chwäch wan chë xa xuʼ ri kantzij taq cristianos ma nkikʼewaj ta nkiʼän ri nkʼatzin rchë yekitoʼ ri nkʼaj chik.

Rïn ntjoj wä wiʼ chrij le Biblia kikʼë ri publicaciones pa chʼaʼäl braille. Nqʼax wä chi nwäch ri najin wä ntamaj, ye kʼa ma nnmaj ta wä jojun chkë ri naʼoj riʼ. Jun tzʼetbʼäl, rïn kʼayewal xuʼän chi nwäch xinmaj chë Dios yirajoʼ chqä chë ri nkʼaj chik ke riʼ chqä nkinaʼ chwij. Xqʼax chi nwäch achkë rma Dios ruyaʼon qʼij chë kʼo itzelal chwäch le Ruwachʼlew, ye kʼa kʼayewal xuʼän chi nwäch xinmaj chë ryä achiʼel jun tataʼaj ri kowan najowan.a

Taq xqʼax más chi nwäch achkë nukʼüt le Biblia, rïn xinjäl ri nquʼun wä pä. Jun tzʼetbʼäl, rïn xintamaj chë Dios kan poqän nunaʼ ran taq röj nqatäj poqän. Ryä nuʼij reʼ chkij rusamajelaʼ ri nkitäj poqän: «Rïn ntzʼeton chë ri ntinamit najin nutäj poqän [...]; ntzʼeton chë ryeʼ kowan najin nkitäj poqän» (Éxodo 3:7). Taq xqʼalajin chi nwäch chë Jehová kowan najowan, xinjäch wiʼ pa ruqʼaʼ rchë nbʼän ri nrajoʼ ryä. Pa 1998 xiqasäx pa yaʼ y xinok testigo de Jehová.

Taq nkʼwan chik jun junaʼ yinqasan pa yaʼ, xentjoj jojun moyiʼ chpan ri tinamït Escuintla. Jun qachʼalal ri kʼwayon bʼey chpan jun congregación ri kʼo chpan ri tinamït riʼ, xtamaj chë rïn kʼayewal wä najin nuʼän chi nwäch nmöl wiʼ kikʼë qachʼalal ri ye kʼo Acul, rma nkʼatzin wä yiqʼax pa taq juyuʼ ri akuchï xeqʼax wä ri kʼlaj qachʼalal ri xinkitjoj chrij le Biblia. Rchë xirutoʼ, xrïl jun familia ri ye Testigos ri ütz wä yikanaj kikʼë chkachoch chqä ri yinkitoʼ wä rchë yibʼä pa Salón. Tapeʼ qʼaxnäq chik ri tiempo, ryeʼ kan najin na yinkichajij rma achiʼel ta kifamilia yinkitzʼët.

Rïn yikowin ntzjoj más chiwä achkë rubʼanik ri qachʼalal kikʼutun chi nwäch chë yinkajoʼ. Nyaʼon chwäch wan chë taq yïn kʼo kikʼë ri testigos de Jehová nnaʼ chë yïn kʼo chkikojöl ri kantzij taq cristianos (Juan 13:34, 35).

¿ACHKË UTZIL WLON?

Komä ma nnaʼ ta chik chë majun yikʼatzin wä chqä kʼo ütz nyoʼen apü; komä nnaʼ chë kʼo rma yïn kʼäs. Pa rukʼexel nquʼ ri ma yikowin ta nbʼän, rïn nksan nkʼaslemal rchë yentoʼ ri nkʼaj chik rchë nkitamaj ri naʼoj ye kʼo chpan le Biblia. Rïn jun chkë ri yikʼwayon bʼey chpan ri ncongregación chqä yenyaʼ tzijonem chkipan ri congregaciones ri ye kʼo naqaj. Chqä kan kowan yityoxin rma yaʼon qʼij chwä yenyaʼ tzijonem chkipan ri nmaʼq taq moloj yeqaʼän ri akuchï yeʼapon kan pa mil winäq.

Pa 2010, xinbʼän graduar wiʼ chpan ri Escuela de Entrenamiento Ministerial (komä nbʼix Tijobʼäl kichë ri nkitzjoj ri Ruqʼatbʼäl Tzij Dios che rä) chlaʼ El Salvador. Re tijobʼäl reʼ yirutoʼon rchë yentoʼ más ri qachʼalal. Chqä xirutoʼ rchë xinnaʼ chë yijowäx chqä yiloqʼoqʼëx rma Jehová, ri nkowin nuʼän chë xa bʼa achkë winäq nuʼän rusamaj.

Jesús xuʼij: «Más kiʼ akʼuʼx nanaʼ taq yaspan chwäch ri nakʼül jun spanïk» (Hechos 20:35). Rïn kan kiʼ nkʼuʼx, y tapeʼ pa naʼäy xinnaʼ chë majun bʼëy xkikowin ta xkentoʼ ri nkʼaj chik, komä najin nbʼän riʼ.