«Ri nnaʼoj ma nchʼakon ta chik chwij»

RI NKʼASLEMAL RUBʼANON QA

Xinaläx pa tinamït Calgary Alberta, (Canadá). Taq k’a yïn koʼöl na, nteʼ ntat xkichüp ruwäch kikʼlanen. Nteʼ chqä rïn xqbʼä äl chkachoch watiʼt chqä nmamaʼ. Ryeʼ kan kowan xojkajoʼ, y rïn kan kiʼ nkʼuʼx xinnaʼ; ma nmestaj ta ri tiempo riʼ, kan jaʼäl nanaʼ yajeʼ kikʼë.

Taq xuʼän pä 7 njunaʼ, nkʼaslemal xjalatäj. Nteʼ ntat xekʼle chik jmul y xqbʼä äl chlaʼ San Luis, Misuri (Estados Unidos). Ye kʼa xintzʼët chë ntat kan itzel wä runaʼoj. Kʼo jun qʼij, taq xinel pä pan escuela y xitzolin chwachoch, ryä xnaʼej chë xichʼay kimä nkʼaj chik akʼalaʼ chqä chë ma xintoʼ ta wiʼ. Rma riʼ, kowan xkatäj ruyowal y más na xiruchʼäy ryä chwäch ri xkiʼän ri akʼalaʼ chwä. Ya riʼ xuʼän chë ma xinyaʼ ta qa chik wiʼ chkiwäch ri nkʼaj chik chqä xinchäp xintïtzʼ wiʼ pa taq chʼaʼoj.

Ri runaʼoj ntat nutïk wä ruyowal nteʼ, rma riʼ kowan wä chʼaʼoj nkiʼän. Rma jontir riʼ, xinchäp rutjik yaʼ chqä drogas taq kʼa riʼ wä 11 njunaʼ. Kan itzel xuʼän nnaʼoj y chaq yenbʼän wä chʼaʼoj pa taq bʼey. Taq xinkʼïs ri básico, kan más na chik itzel nnaʼoj.

Taq xuʼän 18 njunaʼ, xintjoj wiʼ rchë yinok soldado. Rïn ya itzel wä chik nnaʼoj, ye kʼa chriʼ xintamaj yikamsan. Taq xinbʼän yän 5 junaʼ chriʼ, xinel pä y xintjoj wiʼ chrij Psicología rma nwajoʼ wä yisamäj chpan ri FBI. Xinchäp ntjonik Estados Unidos y chrij riʼ xibʼä Canadá.

Pa universidad xa más xibʼison, rma xqʼalajin chi nwäch chë ri winäq xa xuʼ ryeʼ nkiquʼ qa kiʼ. Nnaʼ wä rïn chë ri najin nbʼän kan majun ta nkʼatzin wä, chqä chë ri kʼayewal chwäch le Ruwachʼlew majun ta jun nkowin nsolö. Xqʼalajin chi nwäch chë ri winäq majun ta yekowin nkiʼän rchë más ütz nuʼän qakʼaslemal.

Taq xintzʼët chë majun ta jun rma yïn kʼäs, xinchäp rutjik yaʼ chqä drogas, y xa xuʼ wä päq nwajoʼ chqä yijeʼ kikʼë ixoqiʼ. Ronojel mul xa xuʼ wä pa nmaqʼij yijeʼ wä. Rma ri xintamaj pan ejército xuʼän chë xinnaʼ chë kan majun ta nkowin wkʼë, ronojel wä mul ntïtzʼ wiʼ pa chʼaʼoj. Taq ntzʼët chë najin nchʼay jun winäq, rïn nquʼ chë ütz ri najin nbʼän taq nchʼäy ri najin nchʼeyon. Ye kʼa ma nqʼax ta chi nwäch chë xa najin nyaʼ qʼij chë ri itzel nnaʼon nsmajin wchë.

¿ACHKË RUBʼANIK LE BIBLIA XJÄL NKʼASLEMAL?

Jun q’ij, taq jun wachiʼil chqä rïn najin wä nqatäj droga chojay wkʼë chqä najin wä nqaʼän rubʼanik marihuana rchë nqakʼayij, ri wachiʼil xkʼutuj chwä we nnmaj chrij Dios. Rïn xinbʼij reʼ che rä: «We xa rumak Dios ye kʼïy winäq najin nkitäj poqän, ¡rïn kan majun nwajoʼ ntamaj chrij ryä!». Chkaʼn q’ij, taq yïn kʼo wä pa nsamaj, jun wachiʼil pa nsamaj ri testigo de Jehová xkʼutuj reʼ chwä: «¿Achkë naʼij rït? ¿Rumak komä Dios chë ye kʼïy winäq najin nkitäj poqän?». Ma nnmaj ta wä chë kan chkaʼn q’ij xkʼutüx chik jmul chwä chrij Dios. Ya riʼ xbʼanö chwä chë xinwajoʼ xintamaj más. Y chpan seis ikʼ, ryä kan kʼïy xkʼüt chi nwäch chrij le Biblia chqä xqʼalajsaj kʼïy nkʼutunik ri nbʼanon qa chrij ri kʼaslemal.

Ri qʼopoj ri oknäq wä wixjayil chpan ri tiempo riʼ kan ma nrajoʼ ta wä nutamaj chrij ri najin wä ntamaj rïn. Jun domingo xinbʼij che rä chë yepë ri testigos de Jehová qkʼë rchë yojkitjoj chrij le Biblia. Chkaʼn q’ij, taq xitzolin pä pa samaj, xintzʼët chë ma kʼo ta wä chik. Xinel pa bʼey y xinkraj oqʼej, chqä xinbʼij che rä Dios chë kirutoʼ pä. Ya riʼ ri naʼäy mul xinksaj ri bʼiʼaj Jehová taq xichʼö rkʼë (Salmo 83:18).

Kaʼiʼ q’ij chrij riʼ, jun kʼlaj testigos de Jehová xkichäp xinkitjoj chrij le Biblia. Taq xebʼä äl, xinchäp ruskʼixik ri wuj ri nkiksaj wä rchë yekitjoj ri winäq chrij le Biblia. Ri wuj riʼ ya riʼ: Usted puede vivir para siempre en el paraíso en la Tierra. Xa pa jun aq’a’ xinkʼïs ruskʼixik.a Ri xintamaj chrij Jehová chqä chrij Jesús kan xapon pa wan. Xqʼax chi nwäch chë Jehová kan nujyowaj qawäch chqä ryä kan ntiʼon ran taq röj nqatäj poqän (Isaías 63:9). Jun ri kan xapon pa wan ya riʼ xintamaj chë Jehová kan kowan yirajoʼ chqä chë Jesús xkäm xa wmä rïn (1 Juan 4:10). Xqʼax chi nwäch chë Jehová ma okʼnäq ta rukʼuʼx wkʼë. Ryä nrajoʼ chë «jontir ta ntzolin pä kikʼuʼx rkʼë y ma nrajoʼ ta chë kʼo ta jun nchup ruwäch» (2 Pedro 3:9). Xinnaʼ chë Jehová nrajoʼ chë ntamaj más ruwäch (Juan 6:44).

Kan chpan ri semana riʼ xibʼä pa kimoloj ri Testigos. Tapeʼ nmaʼq nwiʼ chqä nksan wä äl nwixkïn, ryeʼ ma xkixiʼij ta kiʼ chi nwäch. Kan jaʼäl kinaʼoj xkiʼän wkʼë, kan achiʼel ta yïn jun kichʼalal ri kʼïy tiempo ma kitzʼeton ta. Kan xqʼalajin chkij chë yë kantzij cristianos. Kan jaʼäl xinnaʼ xijeʼ kikʼë, xinnaʼ kan achiʼel xinnaʼ taq xijeʼ kikʼë watiʼt nmamaʼ, ye k’a kan más na chik jaʼäl.

Jbʼaʼ tiempo chrij riʼ, ri najin wä ntamaj chpan le Biblia xuʼän chë xinchäp rujalik nkʼaslemal. Xinqpij nwiʼ, ma xinbʼän ta chik tzʼil taq bʼanobʼäl, xinyaʼ qa rutjik yaʼ chqä drogas (1 Corintios 6:9, 10; 11:14). Rïn nwajoʼ wä chë Jehová kiʼ rukʼuʼx nuʼän wkʼë. Taq ntamaj wä chë kʼo jun ma ütz ta najin nbʼän, ma chaq nkanuj ta achkë nbʼij, xa kan ntiʼon wan y nbʼij wä qa: «Ma jmul chik xtinbʼän ta ya reʼ». Chrij riʼ, kan ntäj wä nqʼij rchë njäl nnaʼoj chqä ri achkë yenbʼän. Jontir reʼ xuʼän chwä chë xintzʼët chë taq nanmaj rutzij Jehová, kan kʼïy utzil nawïl. Pa 29 de julio rchë ri junaʼ 1989 —taq qʼaxnäq wä seis ikʼ nchapon pä ntjonik chrij le Biblia— xiqasäx pa yaʼ rchë yinok jun testigo de Jehová.

¿ACHKË UTZIL WLON?

Le Biblia kan yirutoʼon pä rchë njäl nnaʼoj. Rubʼanon qa, taq kʼo ntkö nyowal, rïn kan ronojel bʼaʼ mul ntzolij rukʼexel che rä. Ye k’a komä kan ntäj nqʼij rchë ma nbʼän ta chʼaʼoj kikʼë ri winäq (Romanos 12:18). Ma ta rkʼë rutoʼik Jehová, ma ta yikowin nbʼän reʼ, rma Ruchʼaʼäl chqä ri loqʼoläj ruchqʼaʼ yinkitoʼon rchë njalon rubʼanik nkʼaslemal (Gálatas 5:22, 23; Hebreos 4:12).

Komä, pa rukʼexel ntäj droga, nbʼän chʼaʼoj o yenbʼän tzʼil taq bʼanobʼäl, kan ntäj nqʼij rchë nbʼän ri nqä chwäch Jehová, achiʼel ri yentoʼ nkʼaj chik rchë nkitamaj ruwäch. Taq ye qʼaxnäq wä chik jojun junaʼ ri yinqasan qa pa yaʼ, xibʼä chpan jun tinamït ri akuchï nkʼatzin toʼïk rchë ntzjöx le Biblia. Rïn kan kiʼ nkʼuʼx nbʼanon pä, rma chkipan ri junaʼ ri yeqʼaxnäq pä, kan ye kʼïy winäq yentoʼon rchë nkitamaj ruwäch Jehová, y ntzʼeton achkë rubʼanik ya riʼ kan rujalon kikʼaslemal. Jun chik ri nbʼanö chë kiʼ nkʼuʼx, ya riʼ chë nteʼ xok chqä testigo de Jehová. Jun rma ya riʼ chë ryä xtzʼët achkë rubʼanik xinjäl nnaʼoj.

Pa junaʼ 1999 xibʼä pa jun tijobʼäl chlaʼ Salvador ri komä nbʼix reʼ che rä: Tijobʼäl rchë yetjöx ri nkitzjoj ri Ruqʼatbʼäl Tzij Dios. Chriʼ xkʼut chi nwäch achkë rubʼanik más ütz nbʼän che rä rutzjoxik le Biblia chqä achkë rubʼanik yentjoj ri qachʼalal pa congregación chqä yenchajij. Kan chpan ri junaʼ riʼ, rïn xikʼleʼ rkʼë ya Eugenia. Komä choj kaʼiʼ najin nqaksaj qakʼaslemal chutzjoxik ri Ruchʼaʼäl Dios chpan ri tinamït Guatemala.

Komä, pa rukʼexel yibʼison, kan kiʼ nkʼuʼx, rma ntaman chë kʼo rma yïn kʼäs. Ri nbʼän ri nuʼij le Biblia kan kowan yirutoʼon, rma rubʼanon chë ma yë ta chik ri chʼaʼoj chqä ri tzʼil taq bʼanobʼäl yesmajin wchë. Chqä ya riʼ yirutoʼon rchë nnaʼ uxlanen pa wan chwä rchë kan kowan yijowan.