RI QAKʼASLEMAL RÖJ RI CRISTIANOS
Jehová nqrtoʼ rchë yeqaköchʼ ri kʼayewal
Chkipan re rukʼisbʼäl taq qʼij reʼ, jontir kʼo nmaʼq taq kʼayewal yeqaqʼaxaj. Kʼo mul rkʼë jbʼaʼ nqanaʼ chë ma nqkowin ta chik nq-el chkipan ri kʼayewal riʼ. Ye kʼa, we ronojel mul xtqakanuj qatoʼik rkʼë Jehová, xtqkowin xtqaköchʼ xa bʼa achkë kʼayewal, yajün ri más nmaʼq (Is 43:2, 4). We rït najin naqʼaxaj jun kʼayewal, ¿achkë xkatoʼö rchë más xkajelun rkʼë Jehová?
Ri yachʼö rkʼë. We nqaʼij che rä Jehová jontir ri kʼo pa qan, ryä xtuʼän chë ma kan ta xtchʼpü chik qakʼuʼx chqä xtyaʼ ri uchqʼaʼ ri nkʼatzin chqë rchë xtqkochʼon (Flp 4:6, 7; 1Te 5:17).
Ri qamoloj. Komä kan más na chik nkʼatzin chqë ri naʼoj ye kʼo chpan le Biblia chqä ri kʼuqbʼäl kʼuʼx nqïl kikʼë ri qachʼalal chkipan ri qamoloj (Heb 10:24, 25). Taq nqatjoj äl qiʼ, nqapon chkipan y yeqayaʼ qa-comentarios, kan kʼo utzil xtqïl rma ri toʼïk nuyaʼ pä Jehová chqë (Ap 2:29).
Ri nqatzjoj le Biblia. We nqatäj qaqʼij rchë ronojel mul nqatzjoj le Biblia, más ma kʼayewal ta xtuʼän chqawäch xtqayaʼ qan chkij ri yebʼanö chë kiʼ qakʼuʼx nqaʼän. Chqä qachbʼilanïk rkʼë Jehová chqä kikʼë qachʼalal más kuw nuʼän rma najin nqtoʼon kikʼë (1Co 3:5-10).
TAQ XATZʼËT YÄN RI VIDEO JEHOVÁ XTCHAJIN AWCHË, KEʼAQʼALAJSAJ RE KʼUTUNÏK REʼ:
¿Achkë xtoʼö ya Malu rchë naqaj xjeʼ wä che rä Jehová?
Achiʼel xbʼanatäj rkʼë ya Malu, ¿achkë rubʼanik nukʼuqbʼaʼ qakʼuʼx röj Salmo 34:18?
¿Achkë rubʼanik nukʼüt ri xbʼanatäj rkʼë ya Malu chë Jehová nuyaʼ pä ri nimaläj ruchqʼaʼ chqë taq nqqʼax chkipan nmaʼq taq kʼayewal? (2Co 4:7).