¿Yenatäj reʼ chawä?

¿Askʼin kiwäch ri wuj Ri Chajinel ri ye alenäq pä chpan re junaʼ reʼ? Tatzʼetaʼ we yakowin yeʼaqʼalajsaj re kʼutunïk reʼ:

¿Achkë utzil xtqïl we xtqajäm qawäch rchë nqchʼö rkʼë Jehová, nqayaʼ qaxkïn che rä chqä nqchʼobʼon chrij?

Kan yë ri ütz xtqachaʼ xtqaʼän, xtq-ok utziläj taq tijonelaʼ, más xtkowïr ri qakʼuqbʼäl kʼuʼx chqä xtqajoʼ más Jehová (w22.01, ruxaq 30 y 31).

¿Achkë rma ütz nqatamaj nqakʼuqbʼaʼ qakʼuʼx chrij Jehová chqä chkij ri yeruyaʼon qa ryä rchë nkikʼwaj bʼey chqawäch?

Kan komä nkʼatzin nqatamaj nqakʼuqbʼaʼ qakʼuʼx chë ri rubʼanik nuʼän Jehová ronojel ya riʼ ri más ütz. Xtqaʼän riʼ we xtqakʼuqbʼaʼ qakʼuʼx chkij ri ukʼwäy taq bʼey chqä xtqaʼän ri nkiʼij chqë. Taq xtchapatäj ri nimaläj tijöj poqonal, ma kʼayewal ta xtuʼän chqawäch xtqanmaj tzij tapeʼ ri xtbʼix chqë kʼayewal xtqʼax pa qajolon (w22.02, ruxaq 4 kʼa 6).

¿Achkë rma jun ángel xuʼij che rä Zacarías chë xttzʼët ri plomo ri kʼo pa ruqʼaʼ Zorobabel, ri qʼatöy tzij? (Zac. 4:8-10).

Re visión reʼ xkʼüt chwäch rutinamit Dios chë tapeʼ ri templo ma kan ta achkë rubʼanik, xtkʼis na ruyakik chqä kan xtqä chwäch Jehová (w22.03, ruxaq 16 y 17).

¿Achkë kʼo chë nqaʼän rchë nqayaʼ jun utziläj tzʼetbʼäl chkiwäch ri nkʼaj chik rkʼë ri rubʼanik nqtzjon? (1 Tim. 4:12).

Ütz qanaʼoj tqabʼanaʼ kikʼë ri winäq chqä ma tqaqasaj ta kiqʼij taq nqatzjoj le Biblia chkë, kan rkʼë ronojel qan qbʼixan chkipan ri qamoloj chqä tkʼluj chqë nqayaʼ qa-comentarios, ronojel mul kantzij qtzjon, tqakʼuqbʼaʼ kikʼuʼx ri nkʼaj chik chqä ma keqaksaj ta tzij ri xa yesokon (w22.04, ruxaq 6 kʼa 9).

¿Achkë rma ri itzel chköp ri ntzjöx chpan Apocalipsis 13:1, 2 rukʼwan jojun peraj chkë ri kajiʼ chköp (qʼatbʼäl taq tzij) ri yetzjöx chpan ri capítulo 7 rchë Daniel?

Ri itzel chköp ntzjöx chpan Apocalipsis 13 ma nukʼambʼej ta tzij xa jun qʼatbʼäl tzij, achiʼel Roma. Xa kan nukʼambʼej tzij jontir qʼatbʼäl taq tzij ri kiqʼaton pä tzij pa kiwiʼ ri winäq (w22.05, ruxaq 9).

¿Achkë jun rubʼanik nqakʼüt chë qakʼuqbʼan qakʼuʼx chë Jehová kan pa ruqʼijul xtqʼät tzij pa kiwiʼ ri winäq?

We jun winäq kʼo jun xuʼij o kʼo jun xuʼän ri xa xqrsök, o xuʼän jun itzelal chqë, nqatäj qaqʼij rchë ma nqakʼöl ta qa kʼïx pa qan chrij chqä pa ruqʼaʼ Jehová nqayaʼ wä qa ri xbʼanatäj. Ryä xtchojmij jontir ri kʼayewal qlon rma ri mak (w22.06, ruxaq 10 y 11).

¿Achkë kʼo chë ma numestaj ta jun qachʼalal achï ri nchʼö pa kiwiʼ ri nkʼaj chik chpan jun moloj?

Chë taq nchʼö rkʼë Jehová, ma rchë ta nupixabʼaj ri congregación nixta rchë nuyaʼ jojun rutzjol. Más taq nchapatäj ri moloj, ryä ma nkʼatzin ta «yeruksaj kʼïy tzij» (Mat. 6:7) (w22.07, ruxaq 24 y 25).

¿Achkë xrajoʼ xuʼij Jesús taq xuʼij chë «ri xkiʼän itzel taq bʼanobʼäl, xkekʼasöx pä rchë xtqʼat tzij pa kiwiʼ»? (Juan 5:29).

Ryeʼ ma xtqʼat ta tzij pa kiwiʼ xa rma ri xkiʼän taq majanä kekäm. Pa rukʼexel riʼ, Jesús xttzʼët pä achkë kinaʼoj chqä kibʼanobʼal xtkiʼän taq xekʼasöx yän pä (w22.09, ruxaq 18).

¿Achkë jaʼäl rutzjol xyaʼ ri qachʼalal Joseph Rutherford chpan jun nimamoloj ri xbʼan pa septiembre rchë ri junaʼ 1922?

Chpan jun nimamoloj xbʼan pa Cedar Point (Ohio, Estados Unidos), ryä xuʼij: «¡Ri Qʼatöy Tzij ya najin chik nuqʼät tzij! Pan iqʼaʼ rïx yaʼon wä qa nitzjoj chrij ryä. Rma riʼ, titzjoj, titzjoj, titzjoj ri Qʼatöy Tzij chqä ruqʼatbʼäl tzij» (w22.10, ruxaq 3 kʼa 5).

Rkʼë ri nuʼij ri capítulo 30 rchë Isaías, ¿achkë oxiʼ rubʼanik nqrtoʼ Dios rchë yeqaköchʼ ri kʼayewal?

Re capítulo reʼ nukʼüt chë ryä 1) nuyaʼ ruxkïn chqë y nuyaʼ pä ri nqakʼutuj che rä, 2) nukʼwaj qabʼey y 3) nuyaʼ utzil pa qawiʼ komä chqä chqawäch apü (w22.11, ruxaq 9).

¿Achkë rma ütz nqaʼij chë ri nuʼij Salmo 37:10, 11, 29 xetzʼaqät ojer chqä xketzʼaqät chqawäch apü?

Ri xtzʼibʼaj David xkʼüt achkë xuʼän kikʼaslemal ri israelitas ojer, achiʼel taq Salomón xqʼät tzij. Taq Jesús xtzjoj rij ri Kotzʼijaläj Ilew, ryä xnataj ri versículo 11 (Mat. 5:5; Luc. 23:43) (w22.12, ruxaq 8 kʼa 10 y 14).