Kan nqʼax ruwiʼ ri kʼatän chwäch le Ruwachʼlew | ¿Achkë nuʼij le Biblia chrij riʼ?

Chkipan yë kʼïy tinamït chwäch jontir le Ruwachʼlew, majun bʼey bʼanatajnäq ta ri kʼatän achiʼel ri xbʼanatäj pa julio de 2022:

• «Chpan re ikʼ reʼ, ri qʼatbʼäl tzij China xyaʼ rubʼixik chkipan jbʼaʼ ma 70 tinamït chë tkichajij kiʼ ri winäq chwäch ri kʼatän» (25 de julio, 2022, CNN Wire Service).

• «Rma chlaʼ Europa kan nqʼax ruwiʼ ri kʼatän najin nuʼän, ya riʼ nbʼanö chë chkipan ye kʼïy tinamït najin yekʼat nmaʼq taq kʼechelaj» (17 de julio, 2022, The Guardian).

• «Chkipan jojun tinamït chlaʼ Estados Unidos, pa domingo xuʼän jun kʼatän ri majun bʼey bʼanatajnäq ta. Xbʼanatäj riʼ rma ri kʼatän rchë ri saqʼij kan najin nqʼax ruwiʼ pa oeste, sur y pa runikʼajal ri tinamït» (24 de julio, 2022, The New York Times).

¿Achkë nukʼüt chqawäch jontir riʼ? ¿Xtapon jun qʼij chë ma ütz ta chik xtqjeʼ chwäch le Ruwachʼlew? ¿Achkë nuʼij le Biblia chrij riʼ?

¿Kʼo komä rubʼin pä le Biblia chë kan xtqʼax ruwiʼ ri kʼatän xtuʼän chwäch le Ruwachʼlew?

Jaʼ. Ri kʼatän ri najin nbʼanatäj chwäch jontir le Ruwachʼlew kan rukʼwan riʼ rkʼë ri xuʼij qa le Biblia ri xtbʼanatäj pa qaqʼij komä. Jun tzʼetbʼäl, Jesús xuʼij qa chë «xketzʼetetäj jojun ri kan naxiʼij awiʼ natzʼët» (Lucas 21:11). Rma kan kowan kʼatän najin nuʼän chwäch le Ruwachʼlew, ye kʼïy winäq kixiʼin kiʼ rma nkiquʼ chë rkʼë jbʼaʼ xtbʼeqä ri qʼij chë ma ütz ta chik xtqjeʼ chwäch le Ruwachʼlew.

¿Xtapon jun qʼij chë ma ütz ta chik xtqjeʼ chwäch le Ruwachʼlew?

Manä. Dios xuʼän le Ruwachʼlew rchë chë ri winäq yejeʼ chwäch y majun bʼey xtchup ta ruwäch (Salmo 115:16; Eclesiastés 1:4). Dios ma xtyaʼ ta qʼij chë xtchup ruwäch le Ruwachʼlew. Pa rukʼexel riʼ, ryä nuʼij chë xtchüp kiwäch ri winäq ri najin nkitzʼlaʼ le Ruwachʼlew (Apocalipsis 11:18).

Tatzʼetaʼ chik kaʼiʼ profecías chrij ri achkë más rutzjun Dios rchë xtuʼän:

• «Ri tzʼiran ilew chqä ri juyuʼ ri chaqiʼj rubʼanon ruwäch achiʼel ta kan xtkinaʼ kiʼkʼuxlal, y ri liʼan ilew ri chaqiʼj rubʼanon ruwäch achiʼel ta kan kiʼ rukʼuʼx xtuʼän y xtsijan ruwäch kan achiʼel ri azafrán» (Isaías 35:1). Dios ma xtyaʼ ta qʼij chë le Ruwachʼlew xa xuʼ jun tzʼiran ilew xtuʼän qa. Pa rukʼexel riʼ, ryä xa xtuʼän rubʼanik ri achkë rubʼanon itzel komä.

• «Rït yachajin le Ruwachʼlew y kan nayaʼ ruchqʼaʼ rchë xa bʼa achkë nkʼïy chwäch» (Salmo 65:9). Dios xtuʼän chë le Ruwachʼlew xttok jun kotzʼijaläj ilew.

Ri najin nkʼatanübʼ le Ruwachʼlew najin nuʼän chë ye tzʼaqät jojun profecías ri ye kʼo chpan le Biblia. Rchë natamaj más chrij riʼ, tatzʼetaʼ ri peraj «¿Qué dice la Biblia sobre el cambio climático y nuestro futuro?».

Rchë natamaj más achkë nuʼij le Biblia chrij ri rubʼanik xtkʼachöj pä le Ruwachʼlew, taskʼij ruwäch ri peraj «¿Quién salvará el planeta?».