Kan najin nqʼax ruwiʼ ri kʼatän chpan ri junaʼ 2023 | ¿Achkë nuʼij le Biblia chrij riʼ?

Chwäch le Ruwachʼlew, majun bʼëy bʼanatajnäq ta ri kʼatän ri achiʼel najin nbʼanatäj komä, y ya reʼ rubʼanon chë kan kʼïy kʼayewal ye bʼanatajnäq. Tqatzʼetaʼ ri nbʼix chrij riʼ:

• «Chkipan ri 174 junaʼ ri tzʼeton pä jaruʼ kʼatän o jaruʼ tiw rubʼanon, majun bʼëy rubʼanon ta kowan kʼatän achiʼel ri xuʼän pa ikʼ junio» (Oficina Nacional de Administración Oceánica y Atmosférica, Departamento de Comercio de Estados Unidos, 13 de julio, 2023).

• «Chpan Italia, España, Francia, Alemania y Polonia kan kowan kʼatän najin nuʼän, y kiyoʼen chë ri kʼatän napon kʼa 48 ºC chkipan ri islas ri kibʼiniʼan Sicilia y Cerdeña. Rkʼë jbʼaʼ re kʼatän reʼ majun bʼëy bʼanatajnäq ta Europa» (Agencia Espacial Europea, 13 de julio, 2023).

• «Taq más kʼatän xtuʼän, más qʼeqäl taq jöbʼ xkebʼanatäj, ya riʼ xtuʼän chë más kʼïy tinamït xkermeʼ pa yaʼ» (Stefan Uhlenbrook, ri ukʼwayon bʼey chpan ri Sección de Hidrología, Recursos Hídricos y Criosfera de la Organización Meteorológica Mundial, 17 de julio, 2023).

¿Nchʼpü akʼuʼx rït (namäy rij) rma kan kʼïy noticias kʼo chrij ri achkë najin nbʼanatäj rkʼë le Ruwachʼlew? Tatzʼetaʼ achkë nuʼij le Biblia chrij re kʼayewal reʼ.

¿Rubʼin chik le Biblia chë kan xtqʼax ruwiʼ ri kʼatän xtuʼän?

Jaʼ. Ri kʼatän ri najin nbʼanatäj chwäch jontir le Ruwachʼlew kan rukʼwan riʼ rkʼë ri xuʼij qa le Biblia ri xtbʼanatäj pa qaqʼij komä. Jun tzʼetbʼäl. Jesús xuʼij qa chë xtpë «jun nimaläj xbʼïn-ïl rma ri xkebʼanatäj» (Lucas 21:11; La Biblia en cakchiquel central). Rma kan kowan kʼatän najin nuʼän, ye kʼïy winäq kixiʼin kiʼ rma nkiquʼ chë rkʼë jbʼaʼ xtbʼeqä ri qʼij chë ma ütz ta chik xtqjeʼ chwäch le Ruwachʼlew.

¿Xtapon komä jun qʼij chë ma ütz ta chik xtqjeʼ chwäch le Ruwachʼlew?

Manä. Dios xuʼän le Ruwachʼlew rchë chë ri winäq yejeʼ chwäch xa bʼa jaruʼ junaʼ xkeqʼax, y ma xtyaʼ ta qʼij chë xtchup ruwäch (Salmo 115:16; Eclesiastés 1:4). Ryä chqä nuʼij chë xtchüp kiwäch «ri winäq ri najin nkitzʼlaʼ le Ruwachʼlew» (Apocalipsis 11:18).

Le Biblia nuʼij chë Dios nkowin nuʼän chë le Ruwachʼlew ma nchaʼ ta chiʼ chwäch ri kʼatän, ri tiw o xa bʼa achkë chik jun ri xa nutzʼlaʼ, y ryä kan xtuʼän riʼ.

• «[Dios] nuʼän chë ntaneʼ ri kaqʼiqʼ ri kan kowan ruchqʼaʼ; ri ruwiʼ mar yetaneʼ qa» (Salmo 107:29). Rma Dios kʼo ruchqʼaʼ pa ruwiʼ jontir ri kʼo chwäch le Ruwachʼlew, ryä xtkowin xtchojmij jontir ri nbʼanö chë kowan kʼatän o kowan tiw nuʼän ri nuʼän chë ri winäq kan kowan nkitäj poqän.

• «Rït yachajin le Ruwachʼlew y kan nayaʼ ruchqʼaʼ rchë xa bʼa achkë nkʼïy chwäch» (Salmo 65:9). Dios xtuʼän chë le Ruwachʼlew xttok jun kotzʼijaläj ilew.

Rchë natamaj más chrij ri achkë nuʼij le Biblia chrij ri rubʼanik xtkʼachöj pä le Ruwachʼlew, taskʼij ruwäch ri peraj «¿Quién salvará el planeta?».