¿Xtbʼanatäj komä jun chik mamaʼ chʼaʼoj chqawäch apü? | ¿Achkë nuʼij le Biblia chrij riʼ?

Chkipan ri 30 jnaʼ ri ye qʼaxnäq pä, ye kʼïy winäq kinaʼon chë ri tinamït kan ütz kikʼwan kiʼ chqä chë más jnan rbʼanon kiwäch. Ye kʼa ri najin nbʼanatäj nkikʼüt chë ma ke riʼ ta, achiʼel nqʼalajin kikʼë re noticias reʼ:

«Ri winäq kan kixiʼin kiʼ chë ri chʼaʼoj ri najin nbʼanatäj Gaza xtapon chkipan ri nkʼaj chik tinamït ri ye kʼo naqaj, rma Israel chqä Hizbulá ya xkichäp chʼaʼoj akuchï nchapatäj wä ri tinamït Líbano» (Reuters, 6 de enero, 2024).
«Ri winäq ri kʼo kiqʼaqʼ ri ye kʼo pa rqʼaʼ ri tinamït Irán najin yekitzʼlaʼ kʼïy tinamït. Chqä Irán chaq kʼateʼ xchäp chik jmul kibʼanik mamaʼ taq bombas; y Rusia chqä China, komä jnan rbʼanon kiwäch rkʼë Irán. Jontir reʼ rkʼë jbʼaʼ xtkʼäm pä kʼayewal pa kiwiʼ ri tinamït ri ye kʼo Occidente» (The New York Times, 7 de enero, 2024).
«Ri chʼaʼoj najin nuʼän Rusia rkʼë Ucrania kan kʼïy kʼayewal najin nukʼäm pä pa rwiʼ Ucrania» (UN News, 11 de enero, 2024).
«Jontir ri najin nbʼanatäj rkʼë jbʼaʼ nuʼän chë kan chaq bʼaʼ xtchapatäj jun chʼaʼoj, achiʼel chë China más najin nbʼeyomär chqä kan kʼïy kʼo rkʼë rchë nuʼän chʼaʼoj, ri winäq aj Taiwán más najin nkiyaʼ chwäch kan nkitoʼ kitinamit chqä ri kʼayewal kʼo chkikojöl China chqä Estados Unidos» (The Japan Times, 9 de enero, 2024).

¿Kʼo komä nuʼij le Biblia chrij ri kʼayewal ri najin nbʼanatäj chkikojöl ri tinamït komä? ¿Xtuʼän komä jontir reʼ chë xtchapatäj chik jun mamaʼ chʼaʼoj chkiwäch jontir ri tinamït?

Le Biblia rbʼin pä chik ri najin nbʼanatäj

Le Biblia ma nuʼij ta achkë tinamït xtkiʼän chʼaʼoj chkiwäch. Ye kʼa nuʼij chë chkipan ri qʼij ri yoj kʼo komä kan ye kʼïy tinamït xtkiʼän chʼaʼoj chkiwäch (Apocalipsis 6:4).

Chpan ri wuj Daniel nuʼij chë chkipan «ri rkʼisbʼäl taq qʼij» ri nmaʼq qʼatbʼäl taq tzij ri nkitzelaj kiʼ xtkiʼän «chʼaʼoj», ntel chë tzij, xtkajoʼ xtjeʼ jontir uchqʼaʼ pa kiqʼaʼ. Chpan ri chʼaʼoj riʼ xtkikʼüt chë kan kʼo kichqʼaʼ y kan kʼïy päq xtkisäch xa rma riʼ (Daniel 11:40, 42, 43).

Nqajan pä jun mamaʼ chʼaʼoj

Le Biblia nuʼij chë, pa rkʼexel más ütz xtuʼän jontir, xa más kʼayewal xkepë. Jesucristo xuʼij qa reʼ: «Xtpë jun nüm kʼayewal chiwij. Kan xa xuʼ xbʼan le Rwachʼlew kʼa komä, majun bʼëy bʼanatajnäq ta jun kʼayewal achiʼel riʼ» (Mateo 24:21). Ri «nüm kʼayewal» riʼ xtbʼekʼis taq xtchapatäj jun mamaʼ chʼaʼoj ri rbʼiniʼan Armagedón, ri nbʼix chqä che rä «ri rchʼaʼoj Dios ri kʼo ronojel uchqʼaʼ pa rqʼaʼ» (Apocalipsis 16:14, 16).

Ye kʼa ri Armagedón ma xtchüp ta kiwäch ri winäq, xa xkerköl. Chpan ri chʼaʼoj riʼ, Dios xtchüp kiwäch jontir ri qʼatbʼäl taq tzij ri kan kʼïy kʼayewal kikʼamon pä rma ri chʼaʼoj yekiʼän. We nawajoʼ natamaj achkë rbʼanik ri Armagedón xtuʼän chë majun ta chik chʼaʼoj xtbʼanatäj, taskʼij kiwäch re artículos reʼ: