Ri chʼaʼoj nbʼan rma ri política | ¿Achkë nuʼij le Biblia chrij riʼ?

Chwäch le Rwachʼlew kan kʼïy chʼaʼoj najin nbʼan rma ri política.

Chpan ri jnaʼ 2023 chqä 2024, ye 39 políticos ri nqajoʼ wä yeʼok chpan ri qʼatbʼäl tzij ri kʼo México xekamsäx, reʼ majun bʼëy bʼanatajnäq ta. Ye kʼa ma xa xuʼ ta riʼ xbʼanatäj, kʼo chik nkʼaj chʼaʼoj xebʼan chpan ri tinamït riʼ xa rma ri política.
Chlaʼ Europa kan kʼïy chqä chʼaʼoj bʼanatajnäq rma ri política, achiʼel taq jbʼaʼ ma xkamsäx ri primer ministro rchë Eslovaquia ri 15 de mayo, 2024.
Chlaʼ Estados Unidos, pa 13 de julio, 2024, ri winäq kowan xkixiʼij kiʼ taq jbʼaʼ ma xkamsäx Donald Trump ri xok presidente chlaʼ Estados Unidos.

¿Achkë rma kowan chʼaʼoj najin nbʼanatäj xa rma ri política? ¿Kʼo komä jun qʼij ma xtbʼanatäj ta chik? ¿Achkë nuʼij le Biblia chrij riʼ?

Le Biblia rbʼin chik chë ri winäq xtkijäch kiʼ rma ri política

Le Biblia nuʼij «rkʼisbʼäl taq qʼij» che rä ri tiempo ri yoj kʼo komä, y nuʼij chqä chë ri winäq xuʼ chʼaʼoj xtkajoʼ xtkiʼän.

«Pa rkʼisbʼäl taq qʼij, janina kʼayewal xkejeʼ y kan kʼayewal xtuʼän kikʼwaxik. Rma ri winäq xa xuʼ ryeʼ xtkajoʼ qa kiʼ; […] ma xketyoxin ta chqä kaʼiʼ kipaläj, […] xa xuʼ ryeʼ xtkajoʼ xtnmäx kitzij, […] ma xtjeʼ ta joyowanïk kikʼë, […] xa xkeqʼolon chqä ye tïx, kan xtjeʼ nimirsanem pa kan» (2 Timoteo 3:1-4).

Le Biblia chqä xuʼij chë chkipan ri qʼij yoj kʼo komä, xkejeʼ kʼayewal achiʼel chë ri winäq xkekatäj chkij ri qʼatbʼäl taq tzij chqä xtbʼanatäj chʼaʼoj rma ri política (Lucas 21:9, nota). Ye kʼa ri chʼaʼoj riʼ chqä ri nkijäch kiʼ ri winäq rma ri política xa xkekʼis.

Taq xtkʼis ri chʼaʼoj rma ri política

Le Biblia nuʼij chë ri Rqʼatbʼäl Tzij Dios ri kʼo chkaj xtkanaj pa kikʼexel jontir ri qʼatbʼäl taq tzij.

«Ri Dios ri kʼo chkaj, xtyaʼ jun rqʼatbʼäl tzij ri […] xtwulaj chqä xtchüp kiwäch jontir ri qʼatbʼäl taq tzij, chqä xa xuʼ ri qʼatbʼäl tzij riʼ xtkanaj qa xtbʼä qʼij xtbʼä säq» (Daniel 2:44).

Ri Rqʼatbʼäl Tzij Dios xtuʼän chë ma xtjeʼ ta chik chʼaʼoj chqä chë jnan xtuʼän kiwäch ri winäq.

Che rä Jesucristo, ri xtqʼatö tzij chpan ri Qʼatbʼäl Tzij riʼ, nbʼix «Qʼatöy Tzij ri nesan chʼaʼoj». Ryä xtuʼän chë majun bʼëy chik xtjeʼ ta chʼaʼoj (Isaías 9:6, 7).
Yajün chkipan ri qʼij yoj kʼo komä, ri nkajoʼ ri Rqʼatbʼäl Tzij Dios majun ta chik chʼaʼoj chkiwäch. Le Biblia nuʼij reʼ chkij ri winäq riʼ: «Ri kespadas xtkiʼän samajbʼäl che rä rchë nkichʼïk ri ilew, y ri kilanzas xtkiʼän hoces che rä. Ri winäq ma xtkiʼän ta chik chʼaʼoj chkiwäch nixta xtkitamaj chik xtkiʼän chʼaʼoj» (Isaías 2:3, 4).

We nawajoʼ natamaj más, taskʼij rwäch ri artículo «¿Qué cosas logrará el Reino de Dios?» chqä tatzʼetaʼ ri video ¿Achkë riʼ ri Ruqʼatbʼäl Tzij Dios?