Xeqatoʼ ri qachʼalal chpan ri junaʼ 2021

Chpan ri junaʼ rchë servicio 2021,a ri COVID-19 xkʼäm pä kʼïy kʼayewal pa ruwiʼ le Ruwachʼlew. Achiʼel xbʼix chpan ri artículo «Ayuda mundial durante la pandemia», kan pa millón doláresb ksan rma re pandemia reʼ, chqä xebʼan más 950 Comités de Socorro.

Taq ri COVID-19 kʼo chwäch le Ruwachʼlew, xebʼanatäj chqä nkʼaj chik kʼayewal ri kan xerutzʼlaʼ ri qachʼalal. Rma riʼ ri Comité rchë Coordinadores rchë ri Molaj Ukʼwäy Bʼey xyaʼ qʼij chë nksäx 8 millones de dólares rchë yetoʼöx ri qachʼalal chkiwäch ri más 200 jalajöj kiwäch kʼayewal ri xebʼanatäj. Tqatzʼetaʼ achkë rubʼanik xeksäx ri kchaj rchë xetoʼöx ri qachʼalal chkiwäch kaʼiʼ nmaʼq taq kʼayewal ri kʼa xebʼanatäj qa.

Taq ri volcán Nyiragongo xkʼäq qʼaqʼ

Ri 22 de mayo rchë ri junaʼ 2021, ri volcán Nyiragongo, ri kʼo chpan ri República Democrática del Congo, xkʼäq qʼaqʼ. Ri qʼaqʼ xerutzʼlaʼ jay, escuelas chqä jun ri akuchï kʼolon wä yaʼ. Y ma xa xuʼ ta riʼ. Kan kʼïy qʼij, ri volcán xkʼäq chaj pa ruwiʼ ri tinamït Goma y xebʼanatäj kʼïy slonel. Más pa nkʼaj chkë ri winäq rchë ri tinamït riʼ xeʼelesäx äl chriʼ. Kan pa mil winäq xeʼanmäj äl, y jojun chkë ryeʼ xeʼapon kʼa Ruanda.

Chkikojöl ri winäq ri xeʼelesäx äl, ye kʼo wä más 5,000 testigos de Jehová. Ye kʼïy xchaʼ chiʼ kachoch, y jojun chik xeleqʼäx rupan kachoch rma ma ye kʼo ta wä chpan. Ri comités de socorro ri ye kʼo Ruanda chqä República Democrática del Congo xkitoʼ kiʼ. Ri sucursal ri kʼo chpan República Democrática del Congo xuʼij reʼ chrij jun chkë ri comités riʼ: «Taq majanä tbʼix chë ri winäq nkʼatzin yeʼel äl chpan ri tinamït, ri comité ya xchäp rujachik wäy, yaʼ chqä tzyäq, tapeʼ ri winäq kan kichʼujirsan kiʼ». Chpan jun tinamït ri akuchï xebʼä más 2,000 qachʼalal, jun comité de socorro xeruyäk koköj taq jay rkʼë tzyäq, xjäch mascarillas chqä xuʼij chkë qachʼalal achkë nkʼatzin nkiʼän rchë ma nkïl ta ri COVID-19 chqä ri cólera.

Chkipan oxiʼ ikʼ, ri qachʼalal xkijäch más 60 quintales arroz, 60 quintales harina rchë ixin, más 8,000 litros aceite ri nksäx rkʼë rukïl wäy chqä más 8,000 litros yaʼ. Rchë ma nusäch ta más päq, ri sucursal kan kʼïy rukïl wäy xlöqʼ chkipan ri negocios ri ye kʼo wä chpan ri tinamït.

Jun qachʼalal ixöq nuʼij: «Kan kowan wä najin nqatäj poqän». Ri volcán xtzäq ri kʼakʼakʼ rachoch, ye kʼa ryä chqä rufamilia xetoʼöx chqä xkʼuqbʼäx kikʼuʼx. Komä nuʼij: «Matyox che rä Jehová, kʼo ri achkë nkʼatzin chqë. Kan qatzʼeton rutoʼik Jehová chwäch re kʼayewal reʼ».

Ri kʼayewal kʼo Venezuela

Venezuela kan kʼïy junaʼ kʼisnäq pä rurajil. Rma riʼ kʼayewal nawïl away chqä ri alqʼomaʼ kowan xenmatäj. Ri qachʼalal ri ye kʼo chlaʼ kan kowan kitjon poqän. Tapeʼ ke riʼ, rutinamit Jehová majun bʼëy yeruyaʼon ta qa.

Chpan ri junaʼ rchë servicio ri kʼa xqʼax qa, xksäx más jun millón rkʼë nkʼaj dólares rchë xloqʼ rukïl wäy chqä xabʼon rchë xyaʼöx chkë ri familias ri más nkʼatzin chkë. Ri sucursal ri kʼo Venezuela nuʼij: «Ma chaq bʼaʼ ta najäch 1,300 quintales rukïl wäy ronojel ikʼ chpan jontir ri tinamït rchë nyaʼöx chkë ri qachʼalal ri kan nkʼatzin kitoʼik». Rchë ma ntzʼil·öx ta ri rukïl wäy, ri qachʼalal yekitäq äl rukïl wäy ri ma chanin ta yechaʼ chiʼ. Ri sucursal chqä nuʼij: «Kan kʼïy rukïl wäy nqalöqʼ chqä taq ya riʼ ruwäch tkoʼn najin nuyaʼ, rma ya riʼ nuʼän chë ma kan ta jotäl rajäl. Chqä nqaksaj xa bʼa achkë kʼo rchë nqabʼejachaʼ rchë ma nqasäch ta más päq».

Leonel kʼo chpan jun Comité de Socorro ri kʼo Venezuela, y kan nqä chwäch rusamaj. Ryä nuʼij: «Ri yeʼatoʼ ri nkʼaj chik kan kowan ruqʼij chi nwäch rïn. Ya reʼ kan janina yirutoʼon pä rma xinwïl qa bʼis taq xkäm wixjayil rma ri COVID-19. Chqä kan kiʼ nkʼuʼx rma yikowin yentoʼ qachʼalal ri nkʼatzin kitoʼik. Kan ntzʼeton chë Jehová majun bʼëy nuyaʼ ta qa rutinamit».

Tatzʼetaʼ ri nuʼij jun qachʼalal ri rubʼanon qa xsamäj chpan jun comité de socorro, ryä nuʼij: «Komä yïn wä rïn ri nkʼatzin ntoʼik. Ma xa xuʼ ta xkiyaʼ ri nkʼatzin chqë rchë ütz qawäch nqjeʼ, xa kan xojkitoʼ wixjayil chqä rïn rchë ma nchʼpü ta qakʼuʼx, xojkichajij chqä kan xkikʼuqbʼaʼ qakʼuʼx».

Jojun kʼayewal chaq kʼateʼ yebʼanatäj. Tapeʼ ke riʼ, ri rutinamit Jehová kan chanin yerutoʼ qachʼalal rma ri kchaj niyaʼ rïx. Chpan donate.jw.org xtatzʼët achkë rubʼanik xtatäq äl ri akchaj. ¡Nqajoʼ nqatyoxij chiwä rma kowan yixspan!