Nkʼasöx ral jun malkaʼn ixöq

Chpan ri tiempo ri ma xpë ta jöbʼ, Jehová xuʼij reʼ che rä Elías: «Jät Sarepta. Chriʼ kʼo jun malkaʼn ixöq ri xtyaʼ away». Taq Elías xapon chuchiʼ ri tinamït, xtzʼët jun malkaʼn ixöq ri najin numöl rsiʼ. Re ixöq reʼ kowan wä pobre. Elías xkʼutuj jbʼaʼ ryaʼ che rä. Taq ryä xkʼäm pä ryaʼ, Elías xuʼij: «Tabʼanaʼ utzil, tayaʼ chqä jwechʼ npan». Pero ri ixöq xuʼij: «Majun ta pan wkʼë, majun yikowin nyaʼ chawä. Xa xuʼ jbʼaʼ harina chqä jbʼaʼ aceite kʼo wkʼë rchë nbʼän jbʼaʼ pan rchë yiwaʼ rïn chqä rchë nwaʼ wal». Elías xuʼij: «Jehová xuʼij chwä chë, si rït naʼän jun koʼöl npan, ri harina chqä ri aceite ri kʼo awkʼë ma xtkʼis ta chpan ri tiempo ri ma xtpë ta jöbʼ».

Rma riʼ, ri ixöq xbʼä chrachoch y xuʼän pan rchë xyaʼ che rä rprofeta Jehová. Ri ixöq chqä ral xjeʼ kiway chpan ri tiempo ri ma xpë ta jöbʼ, achiʼel xuʼij Jehová. Ri harina chqä ri aceite ma xkʼis ta.

Chrij riʼ, ri ral ri ixöq kowan xpë ryabʼil chqä xkäm. Ri ixöq kan xkanaj pa bʼis. Ryä xuʼij che rä Elías chë ttoʼ. Rma riʼ, Elías xkʼän apü ri akʼal chwiʼ rqʼaʼ rteʼ, xkʼwaj äl chpan jun cuarto ri kʼo pa rwiʼ ri jay, xpumbʼaʼ pa jun chʼat y xuʼän orar. Ryä xuʼij: «Jehová, tabʼanaʼ utzil, tayaʼ pä chik jmul rkʼaslemal re akʼal reʼ». ¿Ataman rït achkë rma kowan rqʼij si Jehová nuʼän riʼ? Rma majun bʼëy kʼason ta pä jun winäq chkikojöl ri kamnaqiʼ, y ri ixöq riʼ chqä ral ma ye israelitas ta.

Jehová xkʼasoj ri akʼal riʼ. Elías xuʼij reʼ che rä ri ixöq: «¡Tatzʼetaʼ! Awal xkʼastäj pä». Ryä kowan xel rkʼuʼx y xuʼij reʼ che rä Elías: «Komä ntaman chë yït rsamajel Dios. Ri naʼij kan rkʼë Jehová petenäq wä, rma riʼ ronojel mul nbʼanatäj».