Jun qʼatbʼäl tzij ri achiʼel jun mamaʼ cheʼ

Kʼo jun aqʼaʼ, Nabucodonosor kʼo jun xrachkʼaj ri xuʼän chë xxiʼij riʼ. Xerskʼij ri ajnaʼoj taq winäq rchë nkiʼij che rä achkë ntel chë tzij rachïkʼ. Pero majun ta jun xkowin xtoʼö. Pa rkʼisbʼäl, xtzjon rkʼë Daniel.

Ri rey xuʼij reʼ che rä Daniel: «Rïn xinwachkʼaj jun cheʼ ri xkʼïy y xapon kʼa chkaj. Nqʼalajin wä chwäch jontir le Rwachʼlew. Kan jaʼäl wä rxaq chqä kʼïy rfrutas. Ri chköp yejeʼ wä pa rmujal y ri palomas nkiʼän wä kisok pa rwiʼ ri cheʼ. Chrij riʼ jun ángel xpë chlaʼ chkaj y kuw xuʼij: ‹¡Tichoyoʼ ri cheʼ y tiwesaj rqʼaʼ! Pero tiyaʼ qa jbʼaʼ che rä ri cheʼ chqä rkʼamal. Y tiyaʼ hierro chqä cobre chrij. Ri ran ri cheʼ xtjalatäj. Ma xttok ta chik ran jun winäq, xa xttok ran jun chköp. Y xtqʼax siete jnaʼ. Jontir xtqʼalajin chkiwäch chë Dios ya riʼ ri Qʼatöy Tzij chqä chë nkowin nuyaʼ jun qʼatbʼäl tzij pa rqʼaʼ xa bʼa achkë nrajoʼ ryä›».

Jehová xuʼij che rä Daniel achkë ntel chë tzij ri achïkʼ. Taq Daniel xqʼax chwäch, xxiʼij riʼ. Ryä xuʼij: «Tat rey, más ta ütz xa ta kikʼë akʼulel nbʼanatäj wä ri awachïkʼ, pero awkʼë rït xtbʼanatäj wä. Ri mamaʼ cheʼ ri xchoy ya riʼ rït. Xtesäx ri qʼatbʼäl tzij pan aqʼaʼ y xa qʼayis xtatäj pa taq jyuʼ achiʼel jun chköp. Pero rma ri ángel xuʼij chë tyaʼöx qa jbʼaʼ che rä ri cheʼ chqä rkʼamal, ya riʼ ntel chë tzij chë xkatok chik jmul rey».

Jun jnaʼ chrij riʼ, ri rey kʼo wä pa rwiʼ rpalacio y xtzʼët apü Babilonia. Ryä xuʼij: «¡Kan jaʼäl ri tinamït xinyäk! ¡Majun ta jun achiʼel rïn!». Taq najin nuʼij riʼ, jun chʼaʼäl ri petenäq chkaj xuʼij: «¡Nabucodonosor! Xesäx ri qʼatbʼäl tzij pan aqʼaʼ».

Chaq kʼateʼ, ri rey xuʼän itzel rjolon y xuʼän achiʼel nuʼän jun chköp. Rma riʼ xesäx äl chpan rpalacio y xjeʼ kikʼë ri chköp ri ye kʼo pa taq jyuʼ. Ri rwiʼ kowan xkʼïy kan achiʼel rsmal jun águila, y rxkʼäq kowan xekʼïy kan achiʼel rxkʼäq jun paloma.

Taq xqʼax siete jnaʼ, Nabucodonosor xuʼän ütz rjolon, y Jehová xuʼän chë xbʼeʼok chik jmul rey. Rma riʼ ri rey xuʼij: «Rïn nyaʼ rqʼij Jehová, ri Rey rchë chkaj. Ryä nutzäq kikʼïx ri kowan nkinaʼ kiʼ. Komä ntaman chë Jehová ya riʼ ri Qʼatöy Tzij y nkowin nuyaʼ jun qʼatbʼäl tzij pa rqʼaʼ xa bʼa achkë nrajoʼ ryä».