Ye kʼo winäq kʼayewal nuʼän chkiwäch nkajoʼ Dios, rma nkinaʼ chë Dios ma nchʼpü ta chqij o kan itzel runaʼoj. Tatzʼetaʼ na peʼ ri kibʼin jojun winäq:

• «Tapeʼ nkʼutuj wä ntoʼik che rä Dios, nnaʼ wä chë ma yirukʼoxaj ta. Nquʼ wä rïn chë ryä ma nunaʼ ta ri nqanaʼ röj» (Marco, Italia).

• «Rïn nwajoʼ wä nyaʼ ruqʼij Dios, ye kʼa nnaʼ rïn chë kʼa näj kʼo wä. Chi nwäch rïn, Dios kan itzel runaʼoj y xa xuʼ kʼayewal nuyaʼ pa qawiʼ. Ma nnmaj ta wä chë ryä kan nqrajoʼ» (Rosa, Guatemala).

• «Taq kʼa yïn akʼal na, nquʼ wä chë Dios xa xuʼ qamak nutzʼët rchë nuyaʼ kʼayewal pa qawiʼ. Taq xqʼax ri tiempo, xinnaʼ chë ryä ma nqrajoʼ ta, achiʼel jun qʼatöy tzij ri nuqʼät tzij pa kiwiʼ ri winäq ye kʼa ma yerajoʼ ta (Raimunda, Canadá).

¿Y rït achkë naquʼ? ¿Nkowin komä jun winäq nrajoʼ Dios? Kan kʼïy junaʼ ri cristianos kiquʼun pä rij reʼ. Pa taq junaʼ 500 kʼa pa 1,500, kan jontir jbʼaʼ winäq ma yechʼö ta wä qʼanäj rkʼë Dios. ¿Achkë rma? Rma xa nkixiʼij wä kiʼ chwäch. Ri historiador Will Durant xuʼij reʼ: «Jun winäq ri xa ajmak xa nuxiʼij wä riʼ nchʼö qʼanäj rkʼë jun Dios ri kan itzel runaʼoj».

¿Achkë rma ri winäq ke riʼ nkiquʼ? ¿Achkë qäs nukʼüt le Biblia? We nqatamaj ri kantzij chrij Dios, ¿xtqrtoʼ komä riʼ rchë nqajoʼ?

RI NKIʼIJ RI WINÄQ

«Ma jontir ta yenman chë Dios kantzij kʼo jun rubʼiʼ. Y xa ta kʼo rubʼiʼ ma qataman ta achkë riʼ» (Profesor David Cunningham, chpan rulibro Theological Studies).

RI NUʼIJ LE BIBLIA

Kan yë Dios xbʼin re: «Rïn yïn Jehová. Ya riʼ nbʼiʼ» (Isaías 42:8). Jehová ya riʼ jun bʼiʼaj pa chʼaʼäl hebreo ri ntel chë tzij «Ryä Nbʼanö chë Nbʼanatäj» (Éxodo 3:14).

Jehová nrajoʼ chë röj nqaksaj rubʼiʼ. Le Biblia nuʼij: «¡[...]Tiʼij rubʼiʼ, titzjoj chkë ri tinamït jontir ri rubʼanon! Titzjoj chë ri rubʼiʼ kan kowan ruqʼij» (Isaías 12:4).

Jesús xksaj rubʼiʼ Dios y xkʼüt chkiwäch ri rutzeqelbʼëy. Kʼo jmul xchʼö qʼanäj rkʼë Jehová y xuʼij: «Rïn nkʼutun abʼiʼ chkiwäch ryeʼ». ¿Achkë rma xuʼän riʼ? Ryä xuʼij: «Rchë ke riʼ xkeʼawajoʼ ryeʼ kan achiʼel yinawajoʼ rïn chqä ke riʼ junan xtuʼän nwäch kikʼë» (Juan 17:26).

¿ACHKË RMA KʼO REJQALEN REʼ?

Ri teólogo Walter Lowrie xtzʼibʼaj re: «We jun winäq ma retaman ta rubʼiʼ Dios ma retaman ta ruwäch Dios y ma xtkowin ta xtrajoʼ».

Jun achï ri Victor rubʼiʼ ronojel wä semanas nbʼä pan iglesia, ye kʼa majun wä retaman chrij Dios. Ryä nuʼij: «Taq xintamaj chë ri rubʼiʼ Dios ya riʼ Jehová, xinnaʼ wä chë kʼa riʼ najin ntamaj ruwäch Dios. Kan xel nkʼuʼx rma xintamaj ruwäch ri Dios ri kowan wä kitzjon pä chwä. Rïn xinnaʼ chë ryä kantzij kʼo, y komä xok jun utziläj wachiʼil».

Jehová kan njelun kikʼë ri nkiksaj rubʼiʼ y nuʼij reʼ chkë: «Xtinjyowaj kiwäch kan achiʼel nuʼän jun tataʼaj ri nujyowaj ruwäch ri rukʼajol ri nunmaj rutzij» (Malaquías 3:16, 17). Dios chqä kan nuyaʼ utzil pa kiwiʼ ri nkiksaj rubʼiʼ. Le Biblia nuʼij reʼ: «Xa bʼa achkë ri xtskʼin rubʼiʼ Jehová xtkolotäj» (Romanos 10:13).

RI NKIʼIJ RI WINÄQ

El Diccionario Akal crítico de Teología nuʼij: «Ri Trinidad ntzjon chrij jun Dios ri ye kʼo oxiʼ chpan. Ri Tataʼaj, ri Rukʼajol chqä ri Espíritu Santo». Y ri Diccionario abreviado del cristianismo nuʼij: «Ri católicos, ri ortodoxos, ri anglicanos chqä ri protestantes nkinmaj re naʼoj reʼ».

RI NUʼIJ LE BIBLIA

Jesús, ri Rukʼajol Dios, majun bʼëy xuʼij ta chë ye junan rkʼë ri Tataʼaj o chë kan yë ryä ri Tataʼaj. Pa rukʼexel riʼ, ryä xuʼij: «Rïn xkibʼä äl rkʼë ri Ntataʼ, rma ri Ntataʼ kʼo más ruqʼij chi nwäch rïn» (Juan 14:28). Chqä xuʼij reʼ che rä jun rutzeqelbʼëy: «Rïn xkibʼä rkʼë Ntataʼ chqä ri Itataʼ rïx, rkʼë nDios chqä iDios rïx» (Juan 20:17).

Ri espíritu santo ma jun Dios ta y ma junan ta rkʼë ri Tataʼaj nixta rkʼë Jesús. Rkʼë ri nuʼij le Biblia nqʼalajin chë ri espíritu santo xa ruchqʼaʼ Dios. Jojun tzʼetbʼäl. Le Biblia nuʼij chë «ri Loqʼoläj Espíritu xnujsaj ri kan» ri naʼäy taq cristianos. Y Jehová xuʼij: «Xtinyaʼ pä ri Loqʼoläj Espíritu pa kiwiʼ ri winäq» (Hechos 2:1-4, 17; El Nuevo Testamento en Cakchiquel Occidental).

¿ACHKË RMA KʼO REJQALEN REʼ?

Ri biblistas católicos Karl Rahner y Herbert Vorgrimler nkiʼij reʼ: «Ma nqkowin ta nqʼax pa qajolon ri Trinidad we Dios ma nqrtoʼ ta pä. Y tapeʼ nqrtoʼ pä, ma jontir ta nqʼax pa qajolon chrij riʼ». Rma riʼ, ¿nqkowin komä nqajoʼ jun Dios ri ma qataman ta ruwäch chqä ri ma nqʼax ta chqawäch achkë rubʼanik? Manä. Achiʼel nqatzʼët, ri Trinidad nuʼän chqë chë ma nqatamaj ta ruwäch Dios.

Marco, ri xqatzjoj qa chpan ri naʼäy artículo, xtzʼët chë ri Trinidad ma nuyaʼ ta qʼij che rä nutamaj ruwäch Dios. Ryä nuʼij: «Chi nwäch rïn, Dios ma nrajoʼ ta wä nqatamaj ruwäch. Ya riʼ xuʼän chë xinnaʼ chë Dios kan ma yakowin ta yajelun rkʼë». Ye kʼa le Biblia nuʼij chë Dios «ma kan ta näj kʼo wä chqë röj» (Hechos 17:27). Ryä ma nrewaj ta riʼ chqawäch xa kan nrajoʼ chë nqatamaj ruwäch. Jesús xuʼij: «Röj nqayaʼ ruqʼij ri qataman ruwäch» (Juan 4:22).

Marco chqä xuʼij: «Taq xintamaj chë Dios ma jun Trinidad ta kan xikowin xinok rachiʼil». Achiʼel nqatzʼët, we nqatzʼët Jehová achiʼel jun utziläj qachiʼil y ma achiʼel ta jun winäq ri ma qataman ta ruwäch más chaq bʼaʼ xtuʼän chqawäch xtqajoʼ. Le Biblia nuʼij: «Ri ma najowan ta ma retaman ta ruwäch Dios, rma Dios kan najowan» (1 Juan 4:8).

RI NKIʼIJ RI WINÄQ

«Ri winäq ri yekiʼän mak ri ma nkuy ta rma Dios yebʼä pa qʼaqʼ kan xa xuʼ yekäm, y chriʼ xtkitäj wä poqän paqʼij chë chaqʼaʼ» (Catecismo de la Iglesia Católica). Ye kʼo jojun ukʼwäy taq bʼey pa taq religiones nkiʼij chë ri winäq ri ye kʼo pa qʼaqʼ kan chöj yejachon rkʼë Dios.

RI NUʼIJ LE BIBLIA

«Ri kamnaqiʼ majun chik kitaman ta» (Eclesiastés 9:5). Achiʼel nqatzʼët, we ri kamnaqiʼ majun chik nkinaʼ ta, ¿achkë rubʼanik nkitäj poqän paqʼij chë chaqʼaʼ pa qʼaqʼ o nkitäj poqän xa rma yejachon rkʼë Dios?

Kantzij na wä chë le Biblia ntzjon chrij jun «qʼaqʼ ri nbʼrö rkʼë azufre» (Apocalipsis 20:10). Ye kʼa kan yë chqä le Biblia nbʼin achkë ntel chë tzij. Chriʼ nuʼij: «Ri qʼaqʼ nukʼambʼej tzij ri rukaʼn kamïk» (Apocalipsis 20:14; 21:8). Achiʼel nqatzʼët, le Biblia ma kan ta chrij qʼaqʼ ntzjon wä, xa ntzjon chrij ri rukaʼn kamïk. Taq jun winäq nrïl re kamïk reʼ, kan jurayil nchup ruwäch.

¿ACHKË RMA KʼO REJQALEN REʼ?

We chqawäch röj Dios itzel runaʼoj, reʼ xa nuʼän chë ma nqajoʼ ta nqjelun rkʼë. Ya Rocío, aj México, nuʼij: «Taq kʼa yïn koʼöl na, xkiʼij chwä chë Dios nqryaʼ pa qʼaqʼ. Rma riʼ kowan xinxiʼij wiʼ chwäch, ya riʼ xuʼän chë xinquʼ chë Dios majun ta ütz taq naʼoj rkʼë. Rïn nquʼ wä chë ryä kan ronojel mul meqʼernäq rkʼë chqä chë kan itzel runaʼoj».

Ri nuʼij le Biblia chrij Dios chqä chrij ri achkë nbʼanatäj kikʼë ri kamnaqiʼ xuʼän chë ya Rocío xjäl ri nuquʼ. Ryä nuʼij: «Rïn kan jaʼäl xinnaʼ, kan achiʼel ta xkesaj jun mamaʼ ejqaʼn chwij. Xintzʼët chë Dios kan yë ri ütz nrajoʼ chqë, chë nqrajoʼ chqä chë rïn chqä yikowin nwajoʼ. Komä, ntzʼët Dios achiʼel jun utziläj tataʼaj ri kowan yerajoʼ ralkʼwal chqä nrajoʼ chë kan ütz yebʼä pa kikʼaslemal» (Isaías 41:13).

Ye kʼïy winäq ye kʼo chpan jun religión xa rma nkixiʼij kiʼ chë Dios yeruyaʼ pa qʼaqʼ, ye kʼa Dios ma nrajoʼ ta chë nqayaʼ ruqʼij xa rma nqaxiʼij qiʼ chwäch. Jesús xuʼij reʼ: «Tawajoʼ Jehová ri aDios» (Marcos 12:29, 30). Y taq nqatamaj chë Dios kan pa rubʼeyal nuʼän che rä jontir, ma xtqaxiʼij ta qiʼ taq xtqaquʼ achkë rubʼanik xtqʼät tzij pa qawiʼ chqawäch apü. Röj kan rkʼë ronojel qan xkeqaʼij re tzij reʼ achiʼel xuʼij Elihú, ri rachiʼil Job: «¡Ri kʼaslïk Dios majun bʼëy xtuʼän ta jun itzelal; ri Dios ri kʼo ronojel uchqʼaʼ pa ruqʼaʼ majun bʼëy xtuʼän ta ri ma ütz ta!» (Job 34:10).

Kʼo jun qʼij, taq Jesús xtzjoj rij Jehová, ri Rutataʼ, chlaʼ Jerusalén, xuʼän chë ri ukʼwäy taq bʼey judíos xqʼalajin chkij chë xa kaʼiʼ kipaläj (Juan 8:12-30). Ri xuʼij nukʼüt chqawäch achkë rubʼanik kʼo ta chë nqatzʼët ri nkiʼij ri winäq chrij Dios. Ryä xuʼij: «We kan xtiʼän ri xinkʼüt chiwäch, xtqʼalajin chiwij chë kantzij yïx ntzeqelbʼëy; chqä xtitamaj ri kantzij, y ri kantzij xkixurköl» (Juan 8:31, 32).

Taq Jesús xuʼij: «We kan xtiʼän ri xinkʼüt chiwäch», ryä xkʼüt chqawäch achkë rubʼanik nqatzʼët we jun naʼoj chrij Dios kantzij o ma tzij ta. Taq kʼo jun xtkiʼij chawä chrij Dios, taquʼ rij reʼ: «¿Rukʼwan riʼ ri najin nkiʼij chwä rkʼë ri xkʼüt qa Jesús chqä rkʼë ri nkʼaj chik ri nukʼüt le Biblia?». Tabʼanaʼ ri xkiʼän ri winäq ri xkikʼoxaj ri apóstol Pablo: tanukʼuj ruwäch aBiblia rchë natzʼët we kantzij ri najin ntzjöx chawä o manä (Hechos 17:11).

Ya riʼ xkiʼän Marco, ya Rosa chqä ya Raimunda, ri xeqatzjoj yän qa: ryeʼ xkitjoj kiʼ chrij le Biblia kikʼë ri testigos de Jehová. ¿Achkë xkitamaj?

Marco: «Ri Testigo ri xqrtjoj ronojel mul xksaj le Biblia rchë xqʼalajsaj jontir ri xinkʼutuj rïn chqä ri wixjayil che rä. Ya riʼ xuʼän chë eqal xqajoʼ Jehová chqä más junan xuʼän qawäch pa qakʼlajil».

Ya Rosa: «Chi nwäch rïn, le Biblia xa xuʼ wä jun wuj ri kʼo kinaʼoj winäq chpan ri nuʼij ri achkë rkʼë jbʼaʼ rubʼanik Dios. Ye kʼa taq xqʼax ri tiempo, xintzʼët chë le Biblia yeruqʼalajsaj wä nkʼutunik. Komä, chi nwäch rïn Jehová kan kʼo, y kan ütz nkʼuqbʼaʼ nkʼuʼx chrij».

Ya Raimunda: «Xinbʼij che rä Dios chë kirutoʼ rchë ntamaj ruwäch. Jbʼaʼ chrij riʼ, ri wachjil chqä rïn xqachäp jun qatjonik chrij le Biblia. Ya riʼ xuʼän chë xqatamaj ri kantzij chrij Jehová. Kan kiʼ qakʼuʼx xqaʼän rma xqatamaj achkë riʼ Dios».

Le Biblia, ri Ruchʼaʼäl Dios, ma xa xuʼ ta nukʼüt chë ri bʼin chrij ryä xa tzʼukün taq tzij, xa kan nukʼüt chqä achkë utziläj taq naʼoj ye kʼo rkʼë. Chqä nqrtoʼ rchë «nqatamaj jontir ri ruspan pä Dios chqë» (1 Corintios 2:12). We rït xtatjoj awiʼ chrij le Biblia, xtatamaj achkë rma Dios xeruʼän ri winäq chqä le Ruwachʼlew, chqä achkë qayoʼen chqawäch apü. We nawajoʼ natamaj más chrij reʼ, katok chpan www.jw.org/cak chpan ri peraj «Ri nukʼüt le Biblia > Kʼutunïk ri yebʼan chrij le Biblia». Chriʼ chqä xkakowin xtakʼutuj äl jun atjonik chrij le Biblia rkʼë jun testigo de Jehová. We xtaʼän riʼ, tatzʼetaʼ na peʼ chë xkakowin xtawajoʼ Dios.