Ri winäq kan kiʼ kikʼuʼx rma Jesús najin ntok apü Jerusalén chrij jun bʼür

¿Nkikʼüt komä ri profecías ri ye kʼo chpan le Biblia chë Jesús ya riʼ ri Mesías?

Ri nuʼij le Biblia

Jaʼ. Taq xjeʼ chwäch le Ruwachʼlew, Jesús kan kʼïy profecías xbʼetzʼaqät chrij ri bʼin wä qa chrij «ri Mesías —ri Ukʼwayon Bʼey—», ri xkeruköl «ri winäq chwäch ri mak» (Daniel 9:25; 1 Juan 4:14). Yajün taq kamnäq chik, kan xbʼetzʼaqät na kʼïy profecías chrij ri bʼin wä qa chrij ri Mesías (Salmo 110:1; Hechos 2:34-36).

**¿Achkë ntel chë tzij ri tzij Mesías?**

Ri tzij hebreo Maschíaj (Mesías) y pa chʼaʼäl griego Kjristós (Cristo) ntel chë tzij «Chaʼon». Rma riʼ, Jesucristo ntel chë tzij «Jesús ri Chaʼon» o «Jesús ri Mesías».

Ojer qa, ri rubʼanik nchaʼöx jun winäq ri nyaʼöx jun nüm samaj pa ruqʼaʼ ya riʼ nuqʼäj aceite pa rujolon (Levítico 8:12; 1 Samuel 16:13). Dios xchaʼ Jesús rchë ntok ri Mesías, jun samaj ri kan kowan ruqʼij (Hechos 2:36). Ye kʼa Dios ma xqʼäj ta aceite pa ruwiʼ Jesús taq xchaʼ, xa kan rkʼë ri loqʼoläj ruchqʼaʼ xuʼän wä riʼ (Mateo 3:16).

¿Yebʼetzʼaqät komä ri profecías ri bʼin pä chrij ri Mesías chkij ye kʼïy winäq?

Manä. Achiʼel ruwiʼ ruqʼaʼ jun winäq ri ma junan ta rkʼë jun chik, ri profecías ye kʼo chpan le Biblia xa xuʼ chrij jun Mesías o Cristo nbʼetzʼaqät wä. Le Biblia nuʼij: «Xkepë na ri ma ye tzij ta profetas chqä ma ye tzij ta cristos, y xtkiʼän nmaʼq taq milagros ri kan ntel akʼuʼx che rä rchë yekiqʼöl ri winäq, y kan xtkitäj kiqʼij rchë yekiqʼöl ri yechaʼon chik» (Mateo 24:24).

¿Ütz komä nqaʼij chë ri Mesías kʼa chqawäch apü xtbʼekʼutnäj pä?

Manä. Le Biblia nuʼij chë ri Mesías chpan rujatzul David xtbʼejeʼ wä, ri xok jun chkë ri qʼatöy tzij pa Israel (Salmo 89:3, 4). Ye kʼa, ri akuchï tzʼibʼatäl wä qa kibʼiʼ ri rujatzul David xesach. Achiʼel ta xechaʼ chiʼ taq ri romanos xkichüp ruwäch Jerusalén pa junaʼ 70.a Kan chpan qa ri qʼij riʼ kʼa komä, majun ta jun kʼutuyun chë petenäq chpan rujatzul David. Ye kʼa ri wuj ri kʼo kibʼiʼ ri judíos chwäch kan kʼo wä pa ruqʼij Jesús. Rma riʼ nixta rukʼulel Jesús xekowin xkiʼij chë ryä ma pa rujatzul ta David petenäq wä (Mateo 22:41-46).

¿Jaruʼ profecías chrij ri Mesías kʼo chpan le Biblia?

Ma kan ta qataman janiʼ profecías chrij ri Mesías kʼo. Ri rubʼanik yejläx ri profecías riʼ kʼo mul njalatäj yajün taq chpan jun peraj rchë le Biblia kan chrij ri Mesías ntzjon wä. Jun tzʼetbʼäl chrij riʼ ya riʼ ri nqïl chpan Isaías 53:2-7, ri akuchï nutzjoj wä kʼïy ri xtbʼanatäj rkʼë ri Mesías. Chkiwäch jojun winäq, re peraj reʼ xa xuʼ jun profecía, ye kʼa nkʼaj chik nkiʼij chë kan kʼïy profecías kʼo chpan.

Jojun profecías ri bʼin pä chrij ri Mesías ri xbʼetzʼaqät chrij Jesús

Ri xbʼanatäj rkʼë Jesús	Profecía	Taq xbʼetzʼaqät
Chpan rujatzul Abrahán xpë wä	Génesis 22:17, 18	Mateo 1:1
Chpan rujatzul Isaac, ri rukʼajol Abrahán, xpë wä	Génesis 17:19	Mateo 1:2
Chpan rujatzul Judá xpë wä	Génesis 49:10	Mateo 1:1, 3
Chpan rufamilia ri qʼatöy tzij David xpë wä	Isaías 9:7	Mateo 1:1
Xbʼeʼaläx rkʼë jun qʼopoj ri majanä tjeʼ rkʼë jun achï	Isaías 7:14	Mateo 1:18, 22, 23
Belén xaläx wä	Miqueas 5:2	Mateo 2:1, 5, 6
Emmanuel rubʼiʼ xyaʼöxb	Isaías 7:14	Mateo 1:21-23
Ma xaläx ta chpan jun familia ri bʼeyon	Isaías 53:2	Lucas 2:7
Xekamsäx akʼalaʼ taq ryä ya xaläx yän	Jeremías 31:15	Mateo 2:16-18
Xkʼwäx äl Egipto	Oseas 11:1	Mateo 2:13-15
Nazareno xbʼix che räc	Isaías 11:1	Mateo 2:23
Kʼo jun ri xyaʼö apü rutzjol chë ryä ya xtbʼeqä	Malaquías 3:1	Mateo 11:7-10
Xchaʼöx rchë ntok ri Mesías chpan ri junaʼ 29d	Daniel 9:25	Mateo 3:13-17
Dios xuʼij Rukʼajol che rä	Salmo 2:7	Hechos 13:33, 34
Kan kowan xrajoʼ rachoch Dios	Salmo 69:9	Juan 2:13-17
Xtzjoj utziläj taq rutzjol	Isaías 61:1	Lucas 4:16-21
Ri rutzjoxik ruchʼaʼäl Dios ri xuʼän Galilea xok achiʼel jun saqïl	Isaías 9:1, 2	Mateo 4:13-16
Achiʼel Moisés, ryä chqä xuʼän milagros	Deuteronomio 18:15	Hechos 2:22
Achiʼel Moisés, ryä chqä xtzjoj ri xuʼij pä Dios che rä	Deuteronomio 18:18, 19	Juan 12:49
Xeruknaj (xeruqʼomaj) ye kʼïy yawaʼiʼ	Isaías 53:4	Mateo 8:16, 17
Ma xrajoʼ ta chë xyaʼöx más ruqʼij chkiwäch ri nkʼaj chik	Isaías 42:2	Mateo 12:17, 19
Xpoqonaj kiwäch ri nkitäj poqän	Isaías 42:3	Mateo 12:9-20; Marcos 6:34
Xkʼüt chë Dios kan pa rubʼeyal nuʼän che rä jontir	Isaías 42:1, 4	Mateo 12:17-20
Xok jun utziläj Ajyaʼöy Naʼoj	Isaías 9:6, 7	Juan 6:68
Xkʼüt rubʼiʼ Jehová chkiwäch ri nkʼaj chik	Salmo 22:22	Juan 17:6
Xeruksaj tzʼetbʼäl	Salmo 78:2	Mateo 13:34, 35
Xok jun Ukʼwäy Bʼey	Daniel 9:25	Mateo 23:10
Ye kʼïy ma xkinmaj ta chë chaʼon rma Dios	Isaías 53:1	Juan 12:37, 38
Rkʼë ri xuʼij, xerutzäq ye kïy	Isaías 8:14, 15	Mateo 21:42-44
Xtzeläx kimä ri winäq	Salmo 118:22, 23	Hechos 4:10, 11
Itzel xkitzʼët tapeʼ majun rumak ta	Salmo 69:4	Juan 15:24, 25
Xel kikʼuʼx che rä taq xok apü Jerusalén chrij jun bʼür	Zacarías 9:9	Mateo 21:4-9
Xyaʼöx ruqʼij kimä ri akʼalaʼ	Salmo 8:2	Mateo 21:15, 16
Pa rubʼiʼ Jehová xpë wä	Salmo 118:26	Juan 12:12, 13
Xkʼayïx rma jun rachiʼil	Salmo 41:9	Juan 13:18
30 raqän plata xkʼayïx wäe	Zacarías 11:12, 13	Mateo 26:14-16; 27:3-10
Xyaʼöx qa kimä rachiʼil	Zacarías 13:7	Mateo 26:31, 56
Xkitzʼük tzij chrij	Salmo 35:11	Mateo 26:59-61
Majun ta xuʼij taq xjeʼ chkiwäch ri xeqʼabʼan tzij chrij	Isaías 53:7	Mateo 27:12-14
Xkichbʼaj rupaläj	Isaías 50:6	Mateo 26:67; 27:27, 30
Xkiyaʼ cheʼ chujolon	Miqueas 5:1	Marcos 15:19
Xkichʼäy	Isaías 50:6	Juan 19:1
Ma xtoʼ ta riʼ taq xkichʼäy	Isaías 50:6	Juan 18:22, 23
Ri qʼatöy taq tzij junan xuʼän kiwäch rchë xkitzʼlaʼ	Salmo 2:2	Lucas 23:10-12
Xbʼajïx ruqʼaʼ raqän chwäch jun cheʼ	Salmo 22:16	Mateo 27:35; Juan 20:25
Ri soldados xkijäch äl rutzyaq chkiwäch	Salmo 22:18	Juan 19:23, 24
Kan jun ajmak xtzʼet	Isaías 53:12	Mateo 27:38
Xkiyöqʼ chqä itzel xkinaʼ che rä	Salmo 22:7, 8	Mateo 27:39-43
Ma xkʼewaj ta xkäm pa kiwiʼ ri ajmakiʼ	Isaías 53:5, 6	1 Pedro 2:23-25
Xnaʼ chë achiʼel ta xyaʼöx qa rma Dios	Salmo 22:1	Marcos 15:34
Xkiyaʼ vinagre che rä ri xolon rkʼë kʼäy qʼayis	Salmo 69:21	Mateo 27:34
Xchaqiʼj ruchiʼ taq xa jbʼaʼ nrajoʼ rchë nkäm	Salmo 22:15	Juan 19:28, 29
Xyaʼ qa rukʼaslemal pa ruqʼaʼ Dios	Salmo 31:5	Lucas 23:46
Xyaʼ rukʼaslemal pa kamïk	Isaías 53:12	Marcos 15:37
Xyaʼ rukʼaslemal rchë xkeruköl ri winäq chwäch ri mak	Isaías 53:12	Mateo 20:28
Majun ta jun rubʼaqil xkiqʼäj	Salmo 34:20	Juan 19:31-33, 36
Xkichʼïk jun lanza che rä rupox	Zacarías 12:10	Juan 19:33-35, 37
Kan achiʼel jun bʼeyon xbʼan che rä rumuqik	Isaías 53:9	Mateo 27:57-60
Xkʼasöx pä chkikojöl ri kamnaqiʼ	Salmo 16:10	Hechos 2:29-31
Xkanüx rukʼexel ri xkʼayin rchë	Salmo 109:8	Hechos 1:15-20
Xbʼetzʼyeʼ pa ruderecha Dios	Salmo 110:1	Hechos 2:34-36

a Ri Cyclopedia de McClintock y Strong nuʼij: «Kan nqkowin nqaʼij chë ri akuchï tzʼibʼatäl wä kibʼiʼ kijatzul ri judíos xchaʼ chiʼ taq Jerusalén xchup ruwäch».

b Ri bʼiʼaj hebreo Emmanuel, ri ntel chë tzij «Qkʼë röj kʼo Dios», nukʼüt chë Jesús ya riʼ wä ri Mesías. Ri xuʼän taq xjeʼ chwäch le Ruwachʼlew, xkʼüt chë Dios kʼo kikʼë ri nkiyaʼ ruqʼij (Lucas 2:27-32; 7:12-16).

c Ri tzij Nazareno rkʼë jbʼaʼ petenäq rkʼë ri tzij pa chʼaʼäl hebreo nétser, ri ntel chë tzij «jotaʼy».

d We nawajoʼ natzʼët achkë rubʼanik nukʼüt le Biblia chë ri Mesías xtbʼeqʼalajin pä pa junaʼ 29, tatzʼetaʼ ri artículo «El profeta Daniel predice la llegada del Mesías».

e Re profecía reʼ chpan ri wuj Zacarías kʼo wä, ye kʼa ri xtzʼibʼan ri wuj Mateo nuʼij chë yë ri profeta Jeremías xbʼin rchë (Mateo 27:9). Achiʼel ta kʼo mul, naʼäy nyaʼöx ri wuj Jeremías chkiwäch ri wuj ri nbʼix «ri Profetas» chkë (Lucas 24:44). Rkʼë jbʼaʼ taq Mateo xtzjon chrij ri wuj «Jeremías», najin ntzjon chrij kiwuj ri profetas, ri kʼo chqä ri wuj Zacarías chpan.