NA’OJ 2

Ri ütz naʼän rchë kan pa awan ntel pä ri naʼij

2 Corintios 2:17

RI NTEL CHË TZIJ: Naʼij ri kan achkë kʼo pa awan y ma chubʼanik ta naʼän. Ke riʼ xtakʼüt achkë nanaʼ chrij ri natzjoj chqä chkij ri yekʼoxan awchë.

RI RUBʼANIK NASMAJIJ

Tabʼanaʼ ri achʼonik rkʼë Dios y kan tatjoj awiʼ. Taʼij che rä Jehová chë karutoʼ rchë nayaʼ awan chrij ri natzjoj, ke riʼ ma kan ta xtaxiʼij awiʼ. Tayaʼ pa ajolon achkë naʼoj nawajoʼ naʼij apü. Ma xa xuʼ ta taskʼij ri tzʼibʼatäl chwäch ri wuj, xa más ütz keʼaksaj ri atzij rït.

We naskʼij ruwäch le Biblia o xa bʼa achkë chik jun publicación, tatjaʼ aqʼij rchë nqʼax chawäch ri nuʼij, ke riʼ taq xtaskʼij ruwäch ma xkaqʼateʼ ta. We chpan ri wuj riʼ yaʼon pä jojun peraj ri elesan chpan jun chik publicación, kan rkʼë ronojel awan taskʼij, ye kʼa ma tqʼax ruwiʼ taʼän che rä.
Kan pa awan ttel pä ri naʼij. Taquʼ rij achkë rma ri winäq nkʼatzin nkikʼoxaj ri nawajoʼ natzjoj chkë. Ke riʼ, ri rubʼanik yeʼasloj ri aqʼaʼ, ri awachbʼäl chqä ri rubʼanik yapaʼeʼ, xtkikʼüt chë kan pa awan ntel pa ri naʼij chqä chë ütz anaʼoj.

Ma tamestaj ta chë ri naʼij ri achkë kʼo pa awän ma ntel ta chë tzij chë yeʼaksaj tzij ri achiʼel ta yït kʼo chi awachoch o kikʼë awachiʼil. Rchë nayaʼ ruqʼij ri natzjoj, pa rubʼeyal katzjon chqä ütz kibʼixik tabʼanaʼ chkë ri tzij.
Tatzuʼ apü kiwäch ri achoq kikʼë najin yatzjon wä. We ri tinamït ri akuchï yït kʼo wä ma itzel ta nqʼalajin natzuʼ pa ruwäch jun winäq taq yatzjon rkʼë, ütz naʼän riʼ. Taq nayaʼ jun tzijonem, pa rukʼexel yeʼatzuʼ jontir winäq, xa chkijujnal keʼatzuʼ.