TJONÏK 26
¿Achkë rma kowan itzelal kʼo chqä kowan najin nqatäj poqän?
Taq nbʼanatäj jun kʼayewal, kan ye kʼïy winäq nkikʼutuj reʼ: «¿Achkë rma xbʼanatäj riʼ?». Kan ntel qakʼuʼx rma le Biblia nuqʼalajsaj re kʼutunïk reʼ.
1. ¿Achkë xuʼän Satanás rchë chë ri winäq xuʼän itzel kinaʼoj?
Satanás, ri Diablo, xyaʼ qa rij chwäch Dios. Rma ryä xrajoʼ xqʼät tzij pa kiwiʼ ri nkʼaj chik, xuʼän chë Adán y Eva xkiyaʼ qa kij chwäch Jehová. Y xuʼän riʼ taq xuʼij jun tzʼukün tzij che rä Eva (Génesis 3:1-5). Satanás xuʼän chë Eva xnmaj chë Jehová kʼo najin nuqʼät chkiwäch chqä chë ya riʼ ma pa rubʼeyal ta najin nbʼan kikʼë. Riʼ xa achiʼel ta xrajoʼ xuʼij chë ri winäq más kiʼ kikʼuʼx xtkiʼän we ma xtkinmaj ta rutzij Dios. Taq Satanás xuʼij che rä Eva chë ma xtkäm ta, ya riʼ taq xuʼij ri naʼäy tzʼukün tzij. Rma riʼ le Biblia nuʼij chë «ryä jun ajtzʼuküy tzij y rkʼë ryä xtzʼuktäj wä pä ri tzʼukün tzij» (Juan 8:44).
2. ¿Achkë xkichaʼ xkiʼän Adán y Eva?
Jehová kan ütz runaʼoj xuʼän kikʼë Adán y Eva. Ryä xuʼij chkë chë ütz nkitäj ruwäch xa bʼa achkë cheʼ ri kʼo pa jardín de Edén; xa xuʼ jun ri ma ütz ta nkitäj ruwäch (Génesis 2:15-17). Tapeʼ ke riʼ, ryeʼ xkitäj ruwäch ri cheʼ riʼ. Eva «xchʼüp apü ruwäch y xchäp rutjik». Chrij riʼ xyaʼ apü che rä Adán, y «ryä chqä xtäj» (Génesis 3:6). Kan che kaʼiʼ ma xkinmaj ta rutzij Dios. Adán y Eva majun ta wä mak chkij, rma riʼ ma kʼayewal ta wä nuʼän chkiwäch nkiʼän ri ütz. Ye kʼa taq xkiqʼäj rutzij Dios, ryeʼ xemakun chqä xkiyaʼ qa kij chwäch ruqʼatbʼäl tzij. Ya riʼ xbʼanö chë kowan xkitäj poqän (Génesis 3:16-19).
3. ¿Achkë xkʼäm pä pa qawiʼ röj ri xkichaʼ xkiʼän Adán y Eva?
Taq Adán y Eva xemakun, xeʼok ajmakiʼ, y rma riʼ jontir kalkʼwal xeʼaläx rkʼë ri mak riʼ. Le Biblia nuʼij reʼ chrij Adán: «Xa rma jun achï, ri mak xok chwäch le Ruwachʼulew; y rma ri mak, xpë ri kamïk. Y rma riʼ jontir winäq yekäm» (Romanos 5:12).
Rma riʼ, ¿achkë rma röj nqatäj poqän? Kʼo mul, rma yë ri ma ütz ta nqachaʼ nqaʼän. Nkʼaj chik mul, rma ri nkiʼän ri nkʼaj chik winäq. Y jantäq, rma ma nqanaʼej ta achkë yebʼanatäj pa qakʼaslemal (taskʼij ruwäch Eclesiastés 9:11).
TQATAMAJ MÁS CHRIJ RE NAʼOJ REʼ
Tqatzʼetaʼ achkë rma ma ütz ta nqaʼij chë yë Dios ajmak chë kowan najin nqatäj poqän chqä chë kowan itzelal kʼo. Chqä tqatzʼetaʼ achkë nunaʼ ryä taq nutzʼët chë röj najin nqatäj poqän.
4. Ri ajmak chë röj najin nqatäj poqän
Ye kʼïy winäq nkiʼij chë le Ruwachʼulew pa ruqʼaʼ Dios kʼo wä. Ye kʼa, ¿kantzij komä riʼ? Titzʼetaʼ ri VIDEO.
Tiskʼij ruwäch Santiago 1:13 chqä 1 Juan 5:19, y kixtzjon chrij reʼ:
¿Yë komä Dios ajmak chë kowan najin nqatäj poqän chqä chë kowan itzelal kʼo?
5. Ri najin nbʼanatäj rma yë Satanás najin nqʼatö tzij
Tiskʼij ruwäch Génesis 3:1-6 y kixtzjon chrij reʼ:
¿Achkë tzʼukün tzij xuʼij Satanás? (Titzʼetaʼ ri versículos 4 chqä 5).
¿Achkë xuʼij Satanás rchë xrajoʼ xuʼij chë Jehová kʼo najin nuqʼät chkiwäch ri winäq rchë ma kiʼ ta kikʼuʼx nkiʼän?
Rkʼë ri xuʼij Satanás, ¿nkʼatzin komä chë yë Jehová nqʼatö tzij pa kiwiʼ ri winäq rchë kiʼ kikʼuʼx nkiʼän?
Tiskʼij ruwäch Eclesiastés 8:9 y kixtzjon chrij reʼ:
Chpan jontir ri tiempo ri ma yë ta Jehová najin nqʼatö tzij pa ruwiʼ le Ruwachʼulew, ¿achkë kiqʼaxan pä ri winäq?
Adán y Eva majun ta wä mak chkij chqä ye kʼo wä chwäch jun kotzʼijaläj ulew, ye kʼa xa xkinmaj rutzij Satanás y xkiyaʼ qa kij chwäch Jehová.
Taq Adán y Eva xemakun, jontir winäq xkikʼän qa ri mak chqä ri kamïk, chqä xkʼiyär ri tijöj poqonal chwäch le Ruwachʼulew.
Jehová xtchüp ruwäch ri mak, ri tijöj poqonal chqä ri kamïk. Ri winäq xttel qa ri mak chkij chqä xkejeʼ chwäch ri Kotzʼijaläj Ulew.
6. Jehová kan poqän nunaʼ ran taq nutzʼët chë röj nqatäj poqän
¿Kʼo komä nunaʼ Dios taq röj nqatäj poqän? Tatzʼetaʼ achkë xtzʼibʼaj qa David, ri qʼatöy tzij, chqä ri apóstol Pedro. Tiskʼij ruwäch Salmo 31:7 chqä 1 Pedro 5:7, y kixtzjon chrij reʼ:
¿Achkë nanaʼ rït taq natamaj chë Jehová kan nutzʼët pä ri najin nqaqʼaxaj chqä chë kan poqän nunaʼ ran taq nutzʼët chë röj nqatäj poqän?
7. Dios xtchüp ruwäch jontir ri najin nbʼanö chë nqatäj poqän
Tiskʼij ruwäch Isaías 65:17 chqä Apocalipsis 21:3, 4, y kixtzjon chrij reʼ:
Jehová nuʼij chë xtchüp ruwäch jontir ri najin nbʼanö chë ri winäq nkitäj poqän. ¿Nukʼuqbʼaʼ komä akʼuʼx rït ri natamaj riʼ? ¿Achkë rma?
¿Ataman rït reʼ?
Satanás xtzʼük tzij chrij Jehová taq xuʼij ri naʼäy tzʼukün tzij. Reʼ ntel chë tzij chë xtzʼilbʼisaj rubʼiʼ Jehová rma xrajoʼ xuʼij chë ryä ma pa rubʼeyal ta nqʼatö tzij chqä chë ma ütz ta runaʼoj. Xa jbʼaʼ chik apü, Jehová xtchʼajchʼobʼej rubʼiʼ taq xtchüp ruwäch jontir ri najin nbʼanö chë ri winäq nkitäj poqän. Taq ryä xtuʼän riʼ, xtkʼüt chë ri Ruqʼatbʼäl Tzij ya riʼ ri más ütz. Ri qʼij taq Jehová xtchʼajchʼobʼej rubʼiʼ, ya riʼ jun chkë ri kʼo más ruqʼij chwäch xa bʼa achkë na chik jun (Mateo 6:9, 10).
JOJUN WINÄQ NKIʼIJ REʼ: «Dios xqryaʼ chwäch le Ruwachʼulew xa xuʼ rchë nqatäj poqän».
¿Achkë naʼij rït?
RI XQATAMAJ QA
Satanás chqä ri naʼäy qateʼ qatataʼ, ya riʼ ye ajmak chë kʼo kowan itzelal chwäch le Ruwachʼulew. Jehová kan poqän nunaʼ ran taq nutzʼët chë röj nqatäj poqän, rma riʼ ya xtchüp ruwäch jontir ri itzelal.
Tqakamluj ri xqatzʼët qa
¿Achkë tzʼukün tzij xuʼij ri Diablo che rä Eva?
¿Achkë xkʼäm pä pa qawiʼ röj ri xkichaʼ xkiʼän Adán y Eva?
¿Achkë rma nqaʼij chë Jehová kan poqän nunaʼ ran taq nutzʼët chë röj nqatäj poqän?
RCHË NATAMAJ MÁS
Tqatzʼetaʼ achkë nuʼij le Biblia chrij ri achkë riʼ ri mak.
Tatamaj más chrij ri achkë xrajoʼ xuʼij Satanás chrij Jehová chpan ri jardín de Edén.
«¿Achkë rma Dios najin nuyaʼ qʼij chë nqatäj poqän?» (Ri Chajinel, 1 de enero, 2014)
Tatzʼetaʼ achkë rubʼanik nukʼuqbʼaʼ qakʼuʼx ruqʼalajsaxik jun kʼutunïk ri ma chaq bʼaʼ ta nawïl ruqʼalajsaxik.
Tatzʼetaʼ achkë xtamaj jun achï ri kowan xtäj poqän chpan rukʼaslemal.