TJONÏK 51
¿Achkë ütz nqaʼän rchë Jehová kiʼ rukʼuʼx nuʼän rkʼë ri rubʼanik nqtzjon?
Taq Jehová xqr-än, ryä xyaʼ qa jun utziläj spanïk chqë: ri nqkowin nqtzjon. ¿Kan kʼo komä ruqʼij chwäch ryä achkë rubʼanik nqaksaj ri spanïk riʼ? ¡Jaʼ, kan kʼo ruqʼij! (Taskʼij ruwäch Santiago 1:26). Rma riʼ, ¿achkë ütz nqaʼän rchë Jehová kiʼ rukʼuʼx nuʼän rkʼë ri rubʼanik nqtzjon?
1. ¿Achkë ütz nqaʼän rchë kan pa rubʼeyal xtqaksaj re spanïk reʼ?
Le Biblia nuʼij reʼ chqë: «Tikʼuqbʼalaʼ ikʼuʼx chqä titolaʼ iwiʼ chiwäch» (1 Tesalonicenses 5:11). ¿Kʼo komä jun winäq ataman ruwäch rït ri nkʼatzin nkʼuqbʼäx rukʼuʼx? ¿Kʼo komä jun yakowin naʼän rchë natoʼ? Takʼutuʼ chwäch ri winäq riʼ chë kowan nawajoʼ. Rkʼë jbʼaʼ ütz naʼij che rä achkë ütz atzʼeton chrij. ¿Kʼo komä jun texto nnatäj chawä ri rkʼë jbʼaʼ xtkʼuqbʼaʼ rukʼuʼx jun winäq ri ataman ruwäch? Kan kʼïy textos ye kʼo. Y, ma tamestaj ta chë rkʼë ri rubʼanik yatzjon rkʼë jbʼaʼ kan xtakʼuqbʼaʼ kikʼuʼx ri nkʼaj chik. Rma riʼ tatjaʼ aqʼij rchë ronojel mul kan jaʼäl rubʼanik yatzjon kikʼë jontir (Proverbios 15:1).
2. ¿Achkë tzij ma ütz ta yeqaʼij taq nqtzjon?
Le Biblia nuʼij: «Ma ttel ta pan ichiʼ tzij ri ye achiʼel tiʼäj ri chwirnäq» (taskʼij ruwäch Efesios 4:29). Reʼ ntel chë tzij chë kʼo chë ma yeqaʼij ta itzel taq tzij o kʼo yeqaʼij chkë ri nkʼaj chik xa xuʼ rchë yeqasök o nqaqasaj kiqʼij. Chqä, kʼo chë ma yeqaʼän ta mololen taq tzij o nqatzʼük tzij chkij ri nkʼaj chik (taskʼij ruwäch Proverbios 16:28).
3. ¿Achkë xtqtoʼö rchë kan yë ri ütz xtqatzjoj chkë ri nkʼaj chik?
Rkʼë ri yeqaʼij nqakʼüt achkë nqaquʼ chqä achkë nqanaʼ (Lucas 6:45). Rma riʼ kʼo chë nkʼuluj chqë nqchʼobʼon chrij ri ütz, ntel chë tzij, chrij ri kan ye tzij, chrij ri ye chʼajchʼöj chqä chrij ri nkiʼän chqë chë nqjowan (Filipenses 4:8). Rchë nqaʼän riʼ, kʼo chë yeqakanuj utziläj qachiʼil chqä nqatzʼët achoq chrij ütz nqkʼastan wä (Proverbios 13:20). Chqä, ütz nqaquʼ na achkë yeqaʼij. Taquʼ achkë rkʼë jbʼaʼ xtkinaʼ ri nkʼaj chik rkʼë ri xtaʼij chkë. Le Biblia nuʼij: «Ri winäq ri ma nchʼobʼon ta taq ntzjon, ri rutzij kan nsokon achiʼel nsokon jun espada. Ye kʼa ri rutzij jun ajnaʼoj winäq, kan yaturknaj» (Proverbios 12:18).
TQATAMAJ MÁS CHRIJ RE NAʼOJ REʼ
Tqatzʼetaʼ achkë rubʼanik kʼo chë nqtzjon rchë Jehová kiʼ rukʼuʼx nuʼän qkʼë chqä rchë nqakʼuqbʼaʼ kikʼuʼx ri nkʼaj chik.
4. Tachajij awiʼ rkʼë ri yeʼaʼij
Jantäq kʼo yeqaʼij y chrij riʼ nqatzolij qiʼ rma xqaʼij riʼ (Santiago 3:2). Tiskʼij ruwäch Gálatas 5:22, 23 y kixtzjon chrij reʼ:
Rchë naqʼät awiʼ rkʼë ri yeʼaʼij, ¿achkë chkë re naʼoj reʼ xtakʼutuj rït che rä Jehová? ¿Achkë rubʼanik xkatkitoʼ re naʼoj reʼ?
Tiskʼij ruwäch 1 Corintios 15:33 y kixtzjon chrij reʼ:
¿Nkijäl komä ri rubʼanik yatzjon ri awachiʼil yeʼachaʼ chqä ri achoq chrij yakʼastan wä? ¿Achkë rubʼanik?
¿Achkë rkʼë jbʼaʼ xtbʼanö chawä chë ütz o ma ütz ta rubʼanik xkatzjon?
Tiskʼij ruwäch Eclesiastés 3:1, 7 y kixtzjon chrij reʼ:
¿Ajän riʼ taq ütz majun nqaʼij ta o nqayoʼej na jbʼaʼ rchë nqtzjon?
5. Ütz katzjon chkij ri nkʼaj chik
¿Achkë ütz nqaʼän rchë ma yeqaʼij ta poqän taq tzij chkë ri nkʼaj chik? Titzʼetaʼ ri VIDEO y kixtzjon chrij reʼ:
¿Achkë rma ri qachʼalal ri xel pa video xrajoʼ xjäl ri rubʼanik najin wä ntzjon chkij ri nkʼaj chik?
¿Achkë xtoʼö rchë chë xkowin xuʼän riʼ?
Tiskʼij ruwäch Eclesiastés 7:16 y kixtzjon chrij reʼ:
¿Achkë kʼo chë nnatäj chqë taq ya nqtzjon itzel chrij jun winäq?
Tiskʼij ruwäch Eclesiastés 7:21, 22 y kixtzjon chrij reʼ:
Taq jun winäq kʼo jun nuʼij chawij ri ma ütz ta, ¿yatkitoʼ komä re textos reʼ rchë naqʼät ri nanaʼ? ¿Achkë rma?
6. Kan jaʼäl anaʼoj tabʼanaʼ rkʼë a-familia taq yatzjon kikʼë
Jehová nrajoʼ chë jaʼäl qanaʼoj nqaʼän rkʼë qa-familia taq nqtzjon kikʼë. Titzʼetaʼ ri VIDEO y kixtzjon chrij reʼ:
¿Achkë xkatoʼö rchë jaʼäl anaʼoj xtaʼän rkʼë a-familia taq xkatzjon kikʼë?
Tiskʼij ruwäch Efesios 4:31, 32 y kixtzjon chrij reʼ:
Rchë kiʼ kikʼuʼx nkiʼän, ¿achkë rubʼanik kʼo chë yetzjon ri familias chkiwäch?
Jehová kan xuʼij ri nunaʼ wä chrij Jesús, ri Rukʼajol. Tiskʼij ruwäch Mateo 17:5 y kixtzjon chrij reʼ:
¿Achkë rubʼanik nakʼän anaʼoj rït chrij Jehová taq xkatzjon rkʼë a-familia?
Takanuj rubʼanik rchë naʼij chkë ri nkʼaj chik ri ütz atzʼeton chkij.
JOJUN WINÄQ NKIʼIJ REʼ: «Nqä o ma nqä ta chkiwäch ri nkʼaj chik ri nbʼij, riʼ ma nmak ta chik rïn».
¿Ke riʼ chqä naquʼ rït? ¿Achkë rma?
RI XQATAMAJ QA
Jontir ri yeqaʼij rkʼë jbʼaʼ xkerutoʼ o xkerusök ri winäq. Röj kʼo chë nqaquʼ na achkë xtqaʼij, ajän xtqaʼij riʼ chqä achkë rubʼanik xtqaʼij apü.
Tqakamluj ri xqatzʼët qa
¿Achkë komä xtaʼij rït chkë ri nkʼaj chik rchë nakʼuqbʼaʼ kikʼuʼx?
¿Achkë tzij ma ütz ta yeqaksaj taq nqtzjon?
¿Achkë xtqtoʼö rchë ronojel mul kan yë ri ütz xtqatzjoj chkë ri nkʼaj chik chqä jaʼäl qanaʼoj nqaʼän kikʼë?
RCHË NATAMAJ MÁS
¿Achkë xtqtoʼö rchë kan yë ri ütz xtqatzjoj chkë ri nkʼaj chik?
Tatzʼetaʼ achkë xttoʼö awchë rchë ma xkeʼaʼij ta itzel taq tzij.
«¿Kan itzel komä we yenbʼij itzel taq tzij?» (Reʼ xtawïl pa jw.org)
Tatamaj achkë ütz naʼän rchë ma naʼän ta mololen taq tzij.
Tatzʼetaʼ achkë rubʼanik xtoʼöx jun achï rma Jehová rchë ma xeruʼij ta chik itzel taq tzij.
«Xinchäp ruquʼik achkë kʼaslemal nkʼwan» (Ri Chajinel, 1 de agosto, 2013)