KIKʼOJLIBʼÄL WUJ PA INTERNET Watchtower
Watchtower
KIKʼOJLIBʼÄL WUJ PA INTERNET
Kaqchikel occidental
ä
  • ä
  • ë
  • ï
  • ö
  • ü
  • bʼ
  • kʼ
  • tʼ
  • tzʼ
  • qʼ
  • BIBLIA
  • JALAJÖJ WUJ
  • RI QAMOLOJ
  • w23 junio ruxaq 2-7
  • Ukʼwäy taq bʼey, tikʼamaʼ inaʼoj chrij Gedeón

Majun ta video ri ntzjon chrij ri xachaʼ.

Kojakuyuʼ, komä ma ütz ta natzʼët ri video.

  • Ukʼwäy taq bʼey, tikʼamaʼ inaʼoj chrij Gedeón
  • Ri Chajinel ri Nyaʼö Rutzjol ri Ruqʼatbʼäl Tzij Jehová (2023)
  • Ruqʼaʼ ri tzijonem
  • Junan bʼaʼ rkʼë
  • TAQ KʼAYEWAL NUʼÄN CHIWÄCH MA NINAʼ TA IWIʼ
  • TAQ KʼAYEWAL NUʼÄN CHIWÄCH NINMAJ TZIJ CHQÄ MA NIXIʼIJ TA IWIʼ
  • TAQ NINAʼ CHË NAJIN YIXKOS
  • Gedeón nchʼakon chkij ri madianitas
    Ri ntamaj chpan le Biblia
  • «Jät rkʼë ri awchqʼaʼ kʼo»
    Wuj rchë ri qamoloj: Qakʼaslemal chqä Qasamaj röj ri Cristianos (2021)
Ri Chajinel ri Nyaʼö Rutzjol ri Ruqʼatbʼäl Tzij Jehová (2023)
w23 junio ruxaq 2-7

TJONÏK 25

Ukʼwäy taq bʼey, tikʼamaʼ inaʼoj chrij Gedeón

«Ma xtqʼiʼ ta n-tiempo si xtintzjoj chiwä chrij Gedeón» (HEB. 11:32).

BʼIX 124 Siempre fieles y leales

RI XTQATZʼËT QAa

1. Rkʼë ri nuʼij chpan 1 Pedro 5:2, ¿achkë utziläj spanïk kilon ri ukʼwäy taq bʼey?

JEHOVÁ yeruchaʼon jojun ukʼwäy taq bʼey rchë yekichajij ri rusamajelaʼ. Ryeʼ kan nkiloqʼoqʼej nkiʼän ri samaj riʼ chqä nkitäj kiqʼij rchë yeʼok utziläj taq «yuqʼunelaʼ» (Jer. 23:4; taskʼij ruwäch 1 Pedro 5:2). ¡Kan jaʼäl chë chpan ri congregaciones ye kʼo qachʼalal ri kowan yesamäj!

2. ¿Achkë kʼayewal nuʼän chkiwäch jojun ukʼwäy taq bʼey?

2 Taq ri ukʼwäy taq bʼey nkiʼän kisamaj, ryeʼ kan kʼïy kʼayewal nkïl chqä. Rchë nkichajij ri congregación, ryeʼ kan kʼïy samaj nkʼatzin nkiʼän. Tqatzʼetaʼ ri xbʼanatäj rkʼë Tony, jun ukʼwäy bʼey aj Estados Unidos. Ryä xqʼalajin chwäch chë ma jontir ta samaj ütz nukʼän. Tony nuʼij: «Taq xchapatäj ri COVID-19, kʼo kʼïy xkʼatzin xbʼan rchë xebʼan qamoloj chqä rchë xqatzjoj le Biblia, y rïn kan xinkʼän jontir ri samaj ri xkiʼij chwä. Ye kʼa tapeʼ ntäj wä nqʼij, kʼo chik jun samaj ntel pä. Taq xqʼax ri tiempo, ma kan ta xinskʼij chik ruwäch n-Biblia, ma xintjoj ta chik wiʼ chrij chqä ma kan ta xichʼö chik rkʼë Jehová». Ilir, jun qachʼalal aj Kosovo, kʼo chik nkʼaj kʼayewal xrïl. Ryä kʼo wä chpan jun tinamït ri akuchï kʼo chʼaʼoj chqä kʼayewal wä nuʼän chwäch nusmajij ri naʼoj xyaʼ rutinamit Jehová che rä. Ryä nuʼij: «Taq ri sucursal xuʼij chwä chë kentoʼ ri qachʼalal ri xxiʼin rij kikʼaslemal, kan xinxiʼij wiʼ. Y ma xa xuʼ ta riʼ, rïn ma kan ta ütz xintzʼët ri naʼoj xyaʼöx pä chwä». Tim, jun misionero ri kʼo Asia, kʼayewal xuʼän chwäch xuʼän jontir rusamaj yaʼon. Ryä nuʼij: «Kʼo mul majun ta chik nwajoʼ nbʼän». ¿Achkë ütz nkiʼän ri ukʼwäy taq bʼey rchë yeqʼax chkiwäch kʼayewal achiʼel reʼ?

3. ¿Achkë rma jontir nkʼatzin nqakʼän qanaʼoj chrij Gedeón?

3 Ri ukʼwäy taq bʼey kʼo kʼïy naʼoj yekowin nkitamaj qa chrij Gedeón (Heb. 6:12; 11:32). Ryä xkʼwaj bʼey chwäch rutinamit Dios chqä xchajij (Juec. 2:16; 1 Crón. 17:6). Achiʼel Gedeón, ri ukʼwäy taq bʼey ye kʼo komä nkʼatzin nkichajij rutinamit Dios chpan jun tiempo ri kan kʼayewal rubʼanon (Hech. 20:28; 2 Tim. 3:1). Rma riʼ ryeʼ kʼo kʼïy yekowin nkitamaj qa chrij Gedeón. Ryä xqʼax chwäch chë ma jontir ta nkowin nuʼän, ma xnaʼ ta riʼ, xnmaj tzij chqä ma xkos ta. Chqä, ri xuʼän Gedeón xkerutoʼ jontir ri ye kʼo chpan ri congregación rchë nkiloqʼoqʼej más ri samaj nkiʼän ri ukʼwäy taq bʼey chqä rchë kan rkʼë ronojel kan nkinmaj kitzij (Heb. 13:17).

TAQ KʼAYEWAL NUʼÄN CHIWÄCH MA NINAʼ TA IWIʼ

4. ¿Achkë rubʼanik xkʼüt Gedeón chë ma jontir ta nkowin nuʼän chqä chë ma xnaʼ ta riʼ?

4 Gedeón xqʼax chwäch chë ma jontir ta nkowin nuʼän chqä ma xnaʼ ta riʼ.b Taq jun ángel xuʼij che rä chë xchaʼöx rma Jehová rchë yeruköl ri israelitas ri ye kʼo wä pa kiqʼaʼ ri madianitas, Gedeón xuʼij che rä: «Ri n-familia ma más ta ruqʼij chkikojöl rujatzul Manasés y rïn kan majun ta nqʼij chkiwäch ri wachʼalal» (Juec. 6:15). Ryä xquʼ chë ma taqäl ta chrij nuʼän ri samaj riʼ. Ye kʼa Jehová retaman chë ryä nkowin nuʼän riʼ, y rkʼë rutoʼik Jehová Gedeón kan ütz xel jontir chwäch.

5. ¿Achkë rkʼë jbʼaʼ nbʼanö chë ri ukʼwäy taq bʼey kʼayewal nuʼän chkiwäch ma nkinaʼ ta kiʼ?

5 Ri ukʼwäy taq bʼey nkitäj kiqʼij rchë nkitzʼët chë ma jontir ta yekowin nkiʼän chqä rchë ma nkinaʼ ta kiʼ (Miq. 6:8; Hech. 20:18, 19). Ryeʼ ma nkinaʼ ta kiʼ rma ri yekowin nkiʼän o rma ri samaj ri kan ütz ntel chkiwäch. Chqä ma npë ta kiyowal taq yesach o kʼo jun ma ütz ta ntel chkiwäch. Ye kʼa kʼo mul rkʼë jbʼaʼ kʼayewal nuʼän chkiwäch nkitzʼët chë ma jontir ta yekowin nkiʼän chqä rchë ma nkinaʼ ta kiʼ. Jojun tzʼetbʼäl. Rkʼë jbʼaʼ jun ukʼwäy bʼey nukʼän jontir ri samaj nyaʼöx che rä, ye kʼa chrij riʼ nqʼalajin chwäch chë ma nkowin ta nuʼän jontir. Rkʼë jbʼaʼ itzel xketzjon chrij rma ri rubʼanik xsöl jun kʼayewal o xtyaʼöx ruqʼij rma jun samaj ri kan ütz xel chwäch. Taq nbʼanatäj riʼ, ¿achkë rubʼanik yerutoʼ ri ukʼwäy taq bʼey ri xuʼän Gedeón?

Jun ukʼwäy bʼey najin nukʼüt chwäch jun qachʼalal akuchï yekʼol wä ri exhibidores.

Achiʼel Gedeón, ri ukʼwäy taq bʼey ri nqʼax chkiwäch chë ma jontir ta yekowin nkiʼän nkikʼutuj kitoʼik, achiʼel taq nkʼatzin nbʼan rubʼanik jontir rchë ntzjöx le Biblia chkij ri exhibidores. (Tatzʼetaʼ ri peraj 6).

6. ¿Achkë rubʼanik nkikʼän kinaʼoj ri ukʼwäy taq bʼey chrij Gedeón? (Tatzʼetaʼ chqä ri achbʼäl).

6 Tikʼutuj itoʼik. Gedeón xqʼax chwäch chë ma jontir ta nkowin nuʼän, rma riʼ xkʼutuj rutoʼik chkë ri nkʼaj chik (Juec. 6:27, 35; 7:24). Ri ukʼwäy taq bʼey ri kʼo kinaʼoj kan ke riʼ chqä nkiʼän. Tony, ri xqatzjoj qa chpan ri peraj 2, nuʼij: «Rma ri rubʼanik xikʼiytisäx pä, rukʼulun chwä ye nkʼän kʼïy samaj tapeʼ ma yikowin ta yenbʼän jontir. Rma riʼ xinquʼ chë xtqtzjon chrij riʼ taq xtqayaʼ ruqʼij Dios pa qachoch y xinkʼutuj che rä wixjayil achkë nuquʼ ryä chrij riʼ. Chqä xintzʼët ri video Tal como Jesús, capacitemos a otros y confiemos en ellos ri kʼo chpan jw.org». Tony xkʼutuj rutoʼik chkë ri nkʼaj chik. Ryä nutzjoj chqë achkë utzil xrïl: «Pa congregación jontir ri samaj kan pa rubʼeyal nbʼan che rä, y komä kʼo más n-tiempo rchë nkowirsaj wachbʼilanïk rkʼë Jehová».

7. ¿Achkë rubʼanik nkikʼän kinaʼoj ri ukʼwäy taq bʼey chrij Gedeón taq kʼo jun qachʼalal itzel ntzjon chkij? (Santiago 3:13).

7 Ma tpë ta iyowal we itzel xketzjon chiwij. Jun chik kʼayewal nkïl ri ukʼwäy taq bʼey ya riʼ taq ri nkʼaj chik itzel yetzjon chkij. Ye kʼa ri xuʼän Gedeón kowan xkerutoʼ ryeʼ. Gedeón ma xmestaj ta chë xa kʼo qa mak chrij, y taq rujatzul Efraín itzel xetzjon chrij, ryä ma xpë ta ruyowal chkë (Juec. 8:1-3). Pa rukʼexel riʼ Gedeón xqasaj riʼ y xyaʼ ruxkïn chkë chqä kan ütz runaʼoj xuʼän kikʼë. Ri ukʼwäy taq bʼey ye achiʼel Gedeón. Taq kʼo jun qachʼalal itzel ntzjon chkij, ryeʼ nkiyaʼ kixkïn che rä chqä kan ütz kinaʼoj nkiʼän rkʼë (taskʼij ruwäch Santiago 3:13). Taq ryeʼ nkiʼän riʼ yetoʼon rchë ma njeʼ ta chʼaʼoj pa congregación.

8. ¿Achkë nkʼatzin nkiʼän ri ukʼwäy taq bʼey taq nbʼix chkë chë ütz xkiʼän che rä jun kisamaj? Tayaʼ jun tzʼetbʼäl.

8 Tiyaʼ ruqʼij Jehová rkʼë jontir ri niʼän. Taq ri israelitas ütz xetzjon chrij Gedeón rma xchʼakon chkij ri madianitas, ryä xyaʼ ruqʼij Jehová rkʼë ri xuʼij chkë (Juec. 8:22, 23). ¿Achkë rubʼanik nkikʼän kinaʼoj ri ukʼwäy taq bʼey chrij Gedeón? Taq nkiyaʼ ruqʼij Jehová rkʼë ri nkiʼän (1 Cor. 4:6, 7). We jun ukʼwäy bʼey nbʼix che rä chë kan jaʼäl nuʼän che rä rutzijonem, ryä ütz nuʼij chë jontir ri xtzjoj chpan le Biblia xresaj wä chqä chë rutinamit Jehová kowan nqrtjoj. Jantäq, ütz chë ri ukʼwäy taq bʼey nkikʼutuj qa chkiwäch we ri rubʼanik nkiyaʼ kitzijonem nuyaʼ ruqʼij Jehová o xa kiqʼij ryeʼ nuyaʼ. Tqatzʼetaʼ ri xbʼanatäj rkʼë ri qachʼalal Timothy. Taq xok ukʼwäy bʼey, ryä kan kowan xqä chwäch xeruyaʼ tzijonem. Timothy nuʼij: «Taq nchäp ntzijonem, kan kʼïy tiempo nksaj chkij ri naʼäy taq tzij chqä taq yenyaʼ jojun tzʼetbʼäl. Rma riʼ ri qachʼalal nkiʼij wä chwä chë kan jaʼäl nbʼän chkë ri ntzijonem. Ye kʼa xqʼalajin chi nwäch chë xa rïn nwajoʼ nyaʼöx nqʼij y ma yë ta Jehová o le Biblia». Taq xqʼax ri tiempo, Timothy xqʼalajin chwäch chë nkʼatzin njäl ri rubʼanik yeruyaʼ rutzijonem rchë ma yë ta ryä nyaʼöx más ruqʼij (Prov. 27:21). ¿Achkë xbʼanatäj taq xuʼän riʼ? Ryä nuʼij: «Komä ye kʼo qachʼalal nkiʼij chwä chë ri ntzijonem xerutoʼ rchë xkiköchʼ jun kʼayewal o rchë más junan xuʼän kiwäch rkʼë Jehová. Komä más kiʼ nkʼuʼx nkʼoxaj ya reʼ chwäch ri nkiʼij wä chwä rubʼanon qa».

TAQ KʼAYEWAL NUʼÄN CHIWÄCH NINMAJ TZIJ CHQÄ MA NIXIʼIJ TA IWIʼ

Gedeón xnmaj tzij chqä xerutzolij äl jojun chkë ru-soldado; xa xuʼ xekanaj qa 300 achiʼaʼ rkʼë ri xkikʼüt chë kitaman chik achkë nkʼatzin nkiʼän we kʼo jun npë chkij (Tatzʼetaʼ ri peraj 9).

9. ¿Ajän riʼ taq Gedeón xkʼatzin xkʼüt chë nunmaj tzij chqä chë ma nuxiʼij ta riʼ? (Tatzʼetaʼ ri achbʼäl ri kʼo pä chwäch re revista reʼ).

9 Taq Jehová xchaʼ yän Gedeón rchë ntok ukʼwäy bʼey pa kiwiʼ ri israelitas, ryä xkʼatzin xkʼüt chë nunmaj tzij chqä chë ma nuxiʼij ta riʼ. Ryä xbʼix che rä chë nkʼatzin nuwulaj ru-altar rutataʼ, jun altar akuchï nyaʼöx wä ruqʼij Baal (Juec. 6:25, 26). Chrij riʼ, Gedeón xerumöl ye kʼïy soldados, ye kʼa Jehová kaʼiʼ mul xuʼij che rä chë más ye kʼïy ye kʼo rkʼë (Juec. 7:2-7). Y pa rukʼisbʼäl, Gedeón nkʼaj aqʼaʼ xkʼatzin xuʼän chʼaʼoj kikʼë ri itzel wä nkinaʼ chkë rma yë Jehová xbʼin che rä (Juec. 7:9-11).

10. ¿Achkë rkʼë jbʼaʼ xtbʼanö chë jun ukʼwäy bʼey kʼayewal xtuʼän chwäch xtnmaj tzij?

10 Ri ukʼwäy taq bʼey nkʼatzin nkinmaj tzij (Sant. 3:17). Taq jun ukʼwäy bʼey nunmaj tzij, ma nukʼewaj ta nusmajij ri nuʼij le Biblia chqä ri nuʼij pä rutinamit Dios. Taq ryä nuʼän riʼ nuyaʼ qa jun utziläj tzʼetbʼäl chkiwäch ri nkʼaj chik. Ye kʼa, rkʼë jbʼaʼ kʼo mul kʼayewal nuʼän chwäch nunmaj tzij. Kʼo mul rkʼë jbʼaʼ kʼayewal nuʼän chwäch nuskʼij jontir ri naʼoj ri nuyaʼ pä rutinamit Dios o rkʼë jbʼaʼ nukʼutuj qa chwäch we ri naʼoj ri xyaʼöx pä kan ya riʼ ri nkʼatzin. O kʼo jun nkʼutüx che rä ri xa xtuʼän chë xtyaʼöx pacheʼ. Taq nbʼanatäj riʼ, ¿achkë ütz nkiʼän ri ukʼwäy taq bʼey rchë nkikʼän kinaʼoj chrij Gedeón?

11. ¿Achkë xketoʼö ri ukʼwäy taq bʼey rchë xtkinmaj tzij?

11 Tiyaʼ ixkïn che rä ri nbʼix pä chiwä chqä tismajij. Dios xuʼij che rä Gedeón achkë rubʼanik xtwulaj ru-altar rutataʼ, akuchï nkʼatzin nuʼän jun altar che rä Jehová y achkë chköp nkʼatzin yerutzüj che rä. Gedeón ma xpabʼaʼ riʼ chwäch Jehová; ryä xuʼän ri xbʼix che rä. Komä chqä, ri rutinamit Jehová nutäq pä cartas chqä jojun rutzjol chkë ri ukʼwäy taq bʼey rchë nkitamaj achkë nkʼatzin nkiʼän. Jontir ri naʼoj riʼ nkʼatzin rchë yojchajïx chqä rchë más junan nuʼän qawäch rkʼë Jehová. Rma ri ukʼwäy taq bʼey kan nkiʼän ri nbʼix pä chkë, röj kowan yeqajoʼ. Ryeʼ kan nkinmaj tzij, rma riʼ jontir ri ye kʼo chpan ri congregación nkïl utzil (Sal. 119:112).

12. Taq rutinamit Jehová kʼo jun nrajoʼ nujäl, ¿achkë rubʼanik nkismajij ri ukʼwäy taq bʼey ri nuʼij Hebreos 13:17?

12 Ma tikʼewaj ta nijäl xa bʼa achkë jun ri nkʼatzin. Tnatäj chqë chë Jehová xuʼij che rä Gedeón chë nkʼatzin yerutzolij äl jbʼaʼ ma jontir chkë ru-soldados (Juec. 7:8). Rkʼë jbʼaʼ ryä xquʼ ya reʼ: «¿Nkʼatzin nbʼän ya reʼ? ¿Ütz komä xttel jontir chqawäch?». Tapeʼ ke riʼ, Gedeón xnmaj rutzij Jehová. ¿Achkë rubʼanik nkikʼän kinaʼoj ri ukʼwäy taq bʼey chrij ryä? Taq nkijäl ri nuʼij pä rutinamit Jehová chë nkʼatzin njal (taskʼij ruwäch Hebreos 13:17). Jojun tzʼetbʼäl. Pa 2014, ri Molaj Ukʼwäy Bʼey xjäl ri rubʼanik nmol ri päq ri nkʼatzin rchë yeyak Salones del Reino chqä Salones de Asambleas (2 Cor. 8:12-14). Rubʼanon qa, nqaj wä päq chkë ri congregaciones rchë nkiyäk ki-salón, y chrij riʼ nkʼatzin nkitzolij ri päq riʼ. Ye kʼa komä nksäx ri kchaj ri nkitäq pä jontir ri congregaciones rchë yeyak jay akuchï nyaʼöx ruqʼij Dios chpan, tapeʼ xa bʼa jaruʼ na kchaj yekowin nkiyaʼ ri congregaciones. Taq José, jun ukʼwäy bʼey, xtamaj chrij reʼ, xa kaʼiʼ rukʼuʼx xuʼän chrij. Ryä xquʼ: «Nkʼaj chik tinamït yekowin nkiʼän riʼ, ye kʼa aweʼ ma nqkowin ta. Nixta jun Salón xtqkowin ta xtqayäk». Tapeʼ ke riʼ, ryä xtoʼon rkʼë re jun kʼakʼakʼ chʼobʼoj reʼ. ¿Achkë rma? Ryä nuʼij: «Xnatäj chwä ri nuʼij Proverbios 3:5, 6. Rïn nkʼatzin wä nkʼuqbʼaʼ nkʼuʼx chrij Jehová. ¡Y komä ntzʼeton jontir ri samaj bʼanon pä! Ma xa xuʼ ta qayakon más Salones del Reino, xa kan xqatamaj chqä xqayaʼ qakchaj tapeʼ xa jbʼaʼ, ye kʼa rkʼë ri nkitäq pä ri nkʼaj chik nmolotäj ruchiʼ».

Jun qachʼalal najin nutzjoj le Biblia che rä jun achï akuchï nkiyoʼej wä chʼichʼ ri winäq. Kʼo jun policía chkij.

Röj nqkowin ma nqaxiʼij ta qiʼ nqatzjoj le Biblia yajün chkipan tinamït ri akuchï qʼaton chqawäch nqayaʼ ruqʼij Dios. (Tatzʼetaʼ ri peraj 13).

13. a) ¿Achkë xyaʼ chwäch ran Gedeón? b) ¿Achkë ütz nkiʼän ri ukʼwäy taq bʼey rchë nkiʼän achiʼel xuʼän Gedeón? (Tatzʼetaʼ chqä ri achbʼäl).

13 Ma tixiʼij ta iwiʼ niʼän ri nqä chwäch Jehová. Gedeón xnmaj rutzij Jehová tapeʼ kʼo mul xxiʼij riʼ o xxiʼin rij rukʼaslemal (Juec. 9:17). Taq Jehová xuʼij yän che rä chë xttoʼö pä, Gedeón kan xyaʼ chwäch ran chë Jehová xttoʼö pä rchë xtchajij rutinamit. Ri ukʼwäy taq bʼey ri ye kʼo chkipan tinamït ri akuchï ma yaʼon ta qʼij chqë nqayaʼ ruqʼij Dios, ye achiʼel Gedeón. Ryeʼ ma nkixiʼij ta kiʼ nkiʼän jontir ri nkʼatzin rchë yebʼan qamoloj o ntzjöx le Biblia tapeʼ rkʼë jbʼaʼ xkeyaʼöx pacheʼ, xtbʼan kʼutunïk chkë, xtesäx kisamaj o xkechʼay.c Taq xtchapatäj ri nimaläj tijöj poqonal, ri ukʼwäy taq bʼey xtkʼatzin ma xtkixiʼij ta kiʼ rchë xtkiʼän ri xtuʼij pä rutinamit Jehová tapeʼ xtxiʼin rij kikʼaslemal. Rkʼë jbʼaʼ jun chkë ri xtuʼij pä rutinamit Jehová ya riʼ ri rutzjol xtqayaʼ chkë ri winäq chqawäch apü ri njnamäx kikʼë mamaʼ taq saqbʼöch. O rkʼë jbʼaʼ xtuʼij pä achkë xtkʼatzin xtqaʼän rchë xtqachajij qiʼ taq Gog aj Magog xtkatäj pa chqij (Ezeq. 38:18; Apoc. 16:21).

TAQ NINAʼ CHË NAJIN YIXKOS

14. ¿Achkë rkʼë jbʼaʼ xbʼanö chë Gedeón ma ta xuʼän chik ri xkʼatzin xuʼän?

14 Taq Gedeón xkʼwaj bʼey chwäch ri tinamït Israel, xkʼatzin xuʼän kʼïy samaj. Taq ri madianitas xeʼanmäj äl ri aqʼaʼ riʼ chwäch Gedeón, ryä xertzeqelbʼej äl chriʼ pa juyuʼ Jezreel kʼa taq xeʼapon chuchiʼ ri raqän yaʼ Jordán, ri rkʼë jbʼaʼ kowan qʼayis chqä kʼïx chuchiʼ (Juec. 7:22). ¿Achkë xuʼän Gedeón? ¿Xkanaj qa chriʼ? Manä. Tapeʼ ryä chqä ri 300 achiʼaʼ ri ye bʼenäq äl rkʼë kowan ye kosnäq, ryeʼ xkiqʼaxaj ri raqän yaʼ y xebʼä chkij ri madianitas. Pa rukʼisbʼäl, xekiqʼiʼ y xekikamsaj (Juec. 8:4-12).

15. ¿Achkë xtbʼanö chë jun ukʼwäy bʼey kʼayewal chik xtuʼän chwäch xtuʼän rusamaj?

15 Rma ri ukʼwäy taq bʼey nkʼatzin nkichajij ri congregación chqä ri ki-familia, ryeʼ kʼo mul yekos. ¿Achkë rubʼanik nkikʼän kinaʼoj chrij Gedeón ri ukʼwäy taq bʼey ri ke riʼ kinaʼon?

Chpan jun hospital, jun ukʼwäy bʼey nuksaj le Biblia rchë nukʼuqbʼaʼ kikʼuʼx jun kʼlaj qachʼalal. Ryeʼ ye tzʼyül chuxkïn jun qʼopoj ri kʼo pa chʼat.

Ri ukʼwäy taq bʼey yekitoʼ ri nkʼatzin kitoʼik chqä kan ütz kinaʼoj nkiʼän kikʼë. (Tatzʼetaʼ ri peraj 16 chqä 17).

16, 17. a) ¿Achkë xtoʼö rchë Gedeón rchë ma xkos ta? b) ¿Achkë ütz nkiyaʼ chwäch kan ri ukʼwäy taq bʼey? (Isaías 40:28-31; tatzʼetaʼ chqä ri achbʼäl).

16 Tiyaʼ chwäch iwan chë Jehová xtyaʼ iwchqʼaʼ. Ya riʼ xuʼän Gedeón, y Jehová kan xtoʼ pä (Juec. 6:14, 34). Kʼo jmul, Gedeón chqä ri achiʼaʼ ri ye bʼenäq rkʼë xkitzeqelbʼej äl chkaqän kaʼiʼ qʼatöy taq tzij aj Madián ri rkʼë jbʼaʼ xeʼanmäj äl chkij ki-camellos (Juec. 8:12, 21). Ye kʼa, rkʼë rutoʼik Jehová, ri israelitas riʼ xekibʼeqʼiʼ y xekikamsaj. Ri ukʼwäy taq bʼey chqä ütz nkikʼuqbʼaʼ kikʼuʼx chrij Jehová, ri Dios ri «majun bʼëy nkos ta». Ryä xtyaʼ kichqʼaʼ taq xtkʼatzin chkë (taskʼij ruwäch Isaías 40:28-31).

17 Tqatzʼetaʼ ri xbʼanatäj rkʼë Matthew, ri kʼo chpan jun Comité de Enlace con los Hospitales. ¿Achkë xtoʼö rchë ryä rchë ma xkos ta? Ryä nuʼij: «Rïn nnaʼon achkë rubʼanik bʼanatajnäq wkʼë ri nuʼij Filipenses 4:13. Taq rïn yïn kosnäq y nnaʼ chë ma yikowin ta chik nbʼän ri nsamaj, yichʼö rkʼë Jehová y ntäj nqʼij chrij rchë nuyaʼ pä wuchqʼaʼ rchë yentoʼ ri qachʼalal. Taq nbʼän riʼ, nnaʼ achkë rubʼanik nuyaʼ pä wuchqʼaʼ Jehová». Achiʼel xuʼän Gedeón, ri ukʼwäy taq bʼey chqä nkiʼän jontir ri kʼo pa kiqʼaʼ rchë nkichajij ri congregación tapeʼ kʼo kʼayewal nkïl. Kantzij na wä chë ryeʼ nkʼatzin nqʼax chkiwäch chë ma jontir ta ri kichʼobʼon ryeʼ yekowin nkiʼän. Ye kʼa, ri ukʼwäy taq bʼey kikʼuqbʼan kikʼuʼx chë Jehová yerukʼoxaj chqä chë xtyaʼ pä kichqʼaʼ rchë xtkiʼän kisamaj (Sal. 116:1; Filip. 2:13).

18. Rkʼë ri qatzʼeton pä, ¿achkë rubʼanik nkikʼän kinaʼoj ri ukʼwäy taq bʼey chrij Gedeón?

18 Achiʼel qatzʼeton pä, ri ukʼwäy taq bʼey kʼo kʼïy nkitamaj qa chrij Gedeón. Taq nyaʼöx nkʼaj chik kisamaj o taq ri nkʼaj chik ütz o itzel yetzjon chkij, ryeʼ nkʼatzin ma nkinaʼ ta kiʼ chqä nqʼax chkiwäch chë ma jontir ta yekowin nkiʼän. Chqä nkʼatzin nkinmaj tzij chqä ma nkixiʼij ta kiʼ, más komä ri ya xtchup ruwäch jontir ri itzelal. Ri ukʼwäy taq bʼey nkʼatzin nkiyaʼ chwäch kan chë, tapeʼ xa bʼa achkë na xtbʼanatäj, Jehová xtyaʼ kichqʼaʼ rchë xtkiʼän kisamaj. Kantzij na wä chë kan kowan yeqaloqʼoqʼej re achiʼaʼ reʼ ri kan kʼïy samaj nkiʼän (Filip. 2:29).

¿ACHKË RUBʼANIK NKIKʼÜT RI UKʼWÄY TAQ BʼEY RE UTZILÄJ TAQ NAʼOJ REʼ RI XQʼALAJIN CHRIJ GEDEÓN?

  • Ri nqʼax chkiwäch chë ma jontir ta yekowin nkiʼän chqä ri ma nkinaʼ ta kiʼ

  • Ri nkinmaj tzij chqä ma nkixiʼij ta kiʼ

  • Ri ma yekos ta

BʼIX 120 Seamos apacibles y humildes como Cristo

a Jehová xchaʼ Gedeón rchë nukʼwaj bʼey chwäch rutinamit chqä rchë nuchajij chpan jun tiempo ri akuchï ri israelitas kan kʼïy kʼayewal xkïl. Gedeón 40 junaʼ xuʼän ri samaj riʼ tapeʼ kʼo kʼayewal xrïl. Chpan re tjonïk reʼ xtqatzʼët achkë rubʼanik nkikʼän kinaʼoj ri ukʼwäy taq bʼey chrij ryä taq nkïl kʼayewal.

b Ri ma nanaʼ ta awiʼ chqä ri nqʼax chawäch chë ma jontir ta yakowin naʼän kan kikʼwan kiʼ. Jun winäq ri nqʼax chwäch chë ma jontir ta nkowin nuʼän kan pa rubʼeyal nutzʼët qa riʼ, y ri winäq ri ma nunaʼ ta riʼ ma nuqasaj ta kiqʼij ri nkʼaj chik chqä nunaʼ chë ryeʼ kʼo más kiqʼij chwäch ryä (Filip. 2:3). Rma riʼ, jun winäq ri ma nunaʼ ta riʼ nqʼax chwäch chë ma jontir ta nkowin nuʼän.

c Tatzʼetaʼ ri tjonïk «Ma tqayaʼ ta qa Jehová tapeʼ ri qʼatbʼäl tzij xtyaʼ tijöj poqonal pa qawiʼ» ri xel chpan ri wuj Ri Chajinel rchë julio 2019, ruxaq 10 chqä 11, peraj 10 kʼa 13.

    Wuj pa Cakchiquel rchë Sololá (2018-2025)
    Rchë yatel äl
    Rchë yatok
    • Kaqchikel occidental
    • Rchë natäq äl
    • Ri más nqä chawäch
    • Copyright © 2025 Watch Tower Bible and Tract Society of Pennsylvania
    • Rubʼanik naksaj ri qa-sitio
    • Rubʼanik nchajïx ri a-datos
    • Rubʼanik nchajïx ri a-datos
    • JW.ORG
    • Rchë yatok
    Rchë natäq äl