Tayaʼ chawäch natamaj kʼakʼakʼ taq naʼoj taq natjoj awiʼ

Taq ya nqachäp nqatjoj qiʼ chrij qaBiblia o chkij qapublicaciones, rkʼë jbʼaʼ nqaquʼ ya reʼ: «¿Achkë nwajoʼ ntamaj?». Tapeʼ qachaʼon chik achkë nqajoʼ nqatjoj qiʼ chrij, reʼ ma ntel ta chë tzij chë qataman chik jontir chrij riʼ chqä chë majun ta chik jun kʼakʼakʼ naʼoj xtkʼüt Jehová chqawäch. Rma riʼ, ¿achkë ütz nqaʼän?

Takʼutuj anaʼoj che rä Jehová. Tapeʼ kʼo ataman chik chrij ri nawajoʼ natjoj awiʼ chrij, takanuj nkʼaj chik naʼoj chrij riʼ (Prov. 3:5, 6). Taʼij che rä Jehová chë katurtoʼ pä rchë natzʼët achkë naʼoj nrajoʼ ryä rchë natamaj komä (Sant. 1:5).

Tayaʼ qʼij chë Rchʼaʼäl Dios nusmajij akʼaslemal. «Ri rchʼaʼäl Dios kan kʼäs» (Heb. 4:12). Ronojel mul ri nqaskʼij rwäch le Biblia, kʼo kʼakʼakʼ taq naʼoj nqatamaj qa chpan chqä jalajöj rbʼanik nqrtoʼ wä, ye kʼa xa xuʼ xtqkowin xtqaʼän riʼ we nqayaʼ chqawäch nqatamaj kʼakʼakʼ taq naʼoj chpan.

Tatyoxij che rä Jehová jontir ri nukʼüt chqawäch. Jontir ri naʼoj nukʼüt ryä chqawäch ye achiʼel «jaʼäl rkïl taq wäy» (Is. 25:6). Ye kʼo rkïl wäy, taq yeqatzʼët, nqaquʼ chë ma xkeqä ta chqawäch, ye kʼa taq yeqatäj, ma xa xuʼ ta xkeqä chqawäch, xa kan kʼo chqä utzil xtkikʼäm pä che rä qachʼakul. Ke riʼ chqä jbʼaʼ nbʼanatäj kikʼë ri naʼoj yerkʼüt Jehová. Ma tqaquʼ ta chë ye kʼo jojun naʼoj ma xkeqä ta chqawäch xkeqaskʼij o xtqanukʼuj kij, rma taq xtqanukʼuj kij, ma xa xuʼ ta xtqä chqawäch xkeqaskʼij, xa kan kʼo chqä utzil xtkikʼäm pä qawiʼ.