Raneh Chitri Yik Aṅ Kòrin
3 Lökten kahōlö, ötkô Chin vë-ekūö yīö öich sā ṙôre öich vë-ekūö yip tö sā mufē ngam Tēv, vë-ekūö yīö pöri chū-ö öich sā ṙôre öich vë-ekūö yip tö sā mufē ngih panam* hēk sā yip tëṅnö nyīö amòk tūt nö in Kristū. 2 Höng kē-ěkūö yīö chū-ö tö tūt, öt kētö töngëḵ nyā-aṅkūö, pò yīö ötkô misī hacham nup töngëḵ nyā-aṅkūöre, rö-ö pöi öl inrē töngamuh kô, 3 pò yīö ṙömöng aṅ ngih panam töngamuh. Elhôi yīö ngam kumnyahlōn hēk linā-alkūö, röh öi sā yip tarik aṅkūö ngih panam? Hēk röh öi sā inlahen tinrīken yip tarik? 4 Ōt yip tö ngö ṙô nö in yīö, “Mahaköp chin Chū-ö in Pôl,” ngaich ngö ṙô yip tahëng, “In Apòlös chin Chū-ö” ngaich hö-ö hòng yī-ö öi sā tinrīken yip tarik aṅkūö ngih panam yěi ngatī inlahen?
5 Asuh ang Apòlös? Hēk asuh ang Pôl? Töng mahalanṙen nan, sā inlahen ngam Mā nö kētö la-en ngòh tö hěngtak hēk lökten yīö inrē öi ṙatö-ellōnre. 6 Teūchhöti chū-ö ngaich ṙöstö mak ang Apòlös, ngam Tēv pöri ma-asīöp ṙôken u, 7 lökten ngam tameūichhöti hēk tö ngam ṙamöstö mak nöng töng rö-övö, höng ngam Tēv pöri ma-asīöpö u. 8 Ngòh tameūichtö chōn tö ngam kamëtö mak im hinëngö cha-a,* kö teūngen pöri min ngòh tö hěngtak tö raneushö ngam la-enre. 9 Hamòlṙen ngam Tēv in ayī-ö. Panô-òṅ ngam Tēv yin yī-ö öi tö teūichtu aṅ hēk patī ngam Tēv inrē.
10 Ngam tökiröng miṙēḵlōn ngam Tēv nö ikui chu, löktö in e Chū-ö öich sā öp töheuveū-en mamānö nö ṙāḵtö rööntö machööḵlö ngaich tahëng pöri öp ṙamāḵtö rööntö machööḵlö ngam patī, hòṅ chumkūöṙen ön ngòh tö hěngtak tö inlahen chūök tīre nö ṙāḵtö rööntö machööḵlö ngam patī ngam tö mānlöng tö ò. 11 Lökten nö öt hěngtak tökô tarik nö ṙāḵtö tahëng machööḵlö nö in ngam machööḵlö tö ngaich nö ṙāḵtu, anga-aṅ ön ngòh machööḵlö ang Yēsū Kristū. 12 Ōt yip mi-ikui e tī nö asöklö nup patī vahīre nö chehetī tö sunna, chantī hēk töpōiṙāi ihong ngaich ōt tö chehetī tö chōn, tönyô kiyôp hēk vòhtit inrē. 13 Sitih mikahkūö pöri min ayī-ö tö la-en ngòh tö hěngtak tarik, hē e min öi akahakūö ip sakāmö ò min nö kalaha, pò ngam tameūiyö min nö angū-ö mahameuknyö nup taṙòkhöre töng sitih la-en ngòh tö hěngtak tarik. 14 Yěn tö keūngö rööntö machööḵlö min öp patī mahānlö ò, teūngen min anga-aṅ tö raneushö re; 15 ngaich yěn öktikūö pöri öp patī ngaich höng yanëngen ò min angū-ö, rö-ö min anga-aṅ pön laklöng, sön pöri min anga-aṅ nöng sā inlahen öp tö öhngövah nö ökngö tökūö tameūiyö.
16 Öt akahakūö öi yī-ö tarik töre öi patī ngam Tēv hēk tö ngam töhet kumlēḵ ngam Tēv nöng iyöng nö in yīö? 17 Yěn ōt pumyāingö ngam patī ngam Tēv ngaich ahetiyö min anga-aṅ tö ngam Tēv, pò ngam patī ngam Tēv nö töhet ngaich yī-ö patī ngam Tēv.
18 Un tarīku mahachīlöre, yěn ōt in yīö tö ngö mufē töre nö tö akaha i ngih ṙētak,* hökngen ò yēḵ nö vī-ingre nö kulō-ovö, hòṅ ò nö vīngöre nö tö akaha. 19 Kumlō-ov ön ngih mikah ngih panam nö imat ngam Tēv, pön ngö kinūichngö angū-ö: “Vīten më tö akaha tarik anga-aṅ nö vönhöt nö in minë inlahenre.” 20 Hēk ngö kinūichö ön inrē: “Akahakūö ang Yāvē* tö ṙô më tö akaha nö mikahten nöng chanök alaha.” 21 Lökten nö un hěngtak tö ineū-euvö nö ikūö tarik, pò minë taṙòkhöre nöng chehen yīö, 22 yěn pòrô nö Pôl hēk Apòlös hēk Kīfös* hēk ngih panam hēk kinpaha hēk nômö hēk nup tö ṙònghëichṙen töngamuh hēk nup yamih, höng ṙòkhöre anū-ö nö chehen yīö; 23 ngaich aṅ in Kristū min yī-ö, ngaich Kristū nö aṅ im Tēv.